(ពោធិ៍សាត់)៖ លោក ម៉ៅ ធនិន អភិបាលខេត្តពោធិ៍សាត់ នាថ្ងៃទី១០ ខែមិថុនា ឆ្នាំ២០២០នេះ បានណែនាំដល់ប្រជាកសិករ ត្រូវជ្រើសរើសពូជស្រូវណាដែលសុទ្ធល្អ មិនប្រកាន់រដូវ ចំណាក់ប្រាក់ដើមតិច ដើម្បីទទួលបានទិន្នផល និងមានតម្លៃខ្ពស់ ឆ្លើយតបទៅនឹងតម្រូវការទីផ្សារក្នុង និងក្រៅស្រុក។
លោកអភិបាលខេត្ត បានណែនាំបែបនេះ ក្នុងឱកាសដែលលោកដឹកនាំមន្ត្រីចុះជួបសំណេះសំណាល និងភួររាស់សាបព្រោះស្រូវ ជូនបងប្អូនប្រជាកសិករ ក្នុងភូមិកំពង់សំបួរ ឃុំស្យា ស្រុកកណ្តៀង ខេត្តពោធិ៍សាត់ ដោយបានការចូលរួមពី លោក ម៉ក់ រ៉ា ប្រធានក្រុមប្រឹក្សាខេត្ត,លោកស្រី ឯម ប៉ុណ្ណា សមាជិការដ្ឋសភា, លោកស្រី ហ៊ុន ចាន់ធី ម៉ៅ ធនិន ប្រធានកិត្តិយស សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្ត, អភិបាលរងខេត្ត ថ្នាក់ដឹកនាំមន្ទីរអង្គភាពនានាជុំវិញខេត្ត កងកម្លាំងប្រដាប់អាវុធទាំង៣ អាជ្ញាធរស្រុក ឃុំ និងប្រជាពលរដ្ឋចូលរួមយ៉ាងច្រើនកុះករ។
លោក ឡាយ វិសិដ្ឋ ប្រធានមន្ទីរ កសិកម្ម រុក្ខាប្រមាញ់ និងនេសាទ ខេត្តពោធិ៍សាត់ បានឱ្យដឹងថា គិតមកដល់សប្តាហ៍ទី២ នៃខែមិថុនា ឆ្នាំ២០២០នេះ ការងារបង្កបង្កើនផលទូទាំងខេត្តអនុវត្តន៍បានជាង ៤១ពាន់ហិកតា ស្មើនឹង៣៦.១៣% លើផែនការជាង ១១ម៉ឺនហិកតា។ ដំណាំរួមផ្សំគ្រប់ប្រភេទ សម្រេចបាន ២៤៥ហិកតា ស្មើនឹង៦៧.០៥% លើផែនការ ៣៩៨ហិកតា ហើយក្រៅពីនោះ នៅមានដំណាំឧស្សាហកម្ម គ្រួសារកសិករ ជាច្រើនដែលបាននឹងកំពុងទទួលផលជាបន្តបន្ទាប់។
លោក ម៉ៅ ធនិន បានលើកឡើងថា ជាទម្លាប់របស់ប្រជាកសិករ កន្លងមកតែងតែប្រើប្រាស់ពូជស្រូវ ទៅតាមការយល់ឃើញរៀងៗខ្លួន តែមកដល់សម័យទំនើបនេះ ក្រសួង និងមន្ទីរកសិកម្ម រុក្ខាប្រមាញ់ និងនេសាទ បានបន្សុទ្ធគ្រាប់ពូជស្រូវជាច្រើនប្រភេទ ដែលពូជទាំងនោះ មិនប្រកាន់រដូវ ទទួលបានទិន្នផលខ្ពស់ ចំណាយប្រាក់ដើមតិច និងមានតម្លៃខ្ពស់ លើទីផ្សារក្នុង និងក្រៅស្រុក។ ជាក់ស្តែងថ្ងៃនេះ រដ្ឋបាលខេត្តបានយកពូជ ស្រូវសែនក្រអូប មកសាបព្រោះនៅទីនេះ សម្រាប់បើកការធ្វើស្រែដើមរដូវ និងជាគម្រូបង្ហាញឱ្យឃើញពីការពិត ដើម្បីឱ្យកសិករ យកទៅប្រើប្រាស់គ្រប់ក្រុមគ្រួសារ ជាប្រយោជន៍បង្កើនជីវភាពគ្រួសារ ឱ្យកាន់តែប្រសើរឡើង។
លោកអភិបាលខេត្ត បានបញ្ជាក់ថា ប្រជាពលរដ្ឋក្នុងខេត្តពោធិ៍សាត់ទាំងមូល ពិតជាមានភ័ព្វសំណាងណាស់ ដោយទទួលបាននូវសមិទ្ធផលជាច្រើន ពីរាជរដ្ឋាភិបាល ដូចជាទំនប់ស្ទាក់ទឹកទី៣ និងទី៥ ដែលទំនប់ទាំង២ មានសមត្ថភាពស្តុកទឹកបានរហូតដល់ជាង ៥១លានម៉ែត្រគូប សម្រាប់ស្រោចស្រពស្រូវ ជូនប្រជាពលរដ្ឋក្នុងរដូវប្រាំង, រួមទាំងប្រព័ន្ធស្រោចស្រពធំៗមួយចំនួនទៀត គឺប្រឡាយមេដំណាក់ឈើក្រម ប្រឡាយមេដំណាក់អំពិល និងប្រឡាយមេចារឹក, ផ្លូវជាតិលេខ៥៥ ជាង១៨០គីឡូម៉ែត្រ តភ្ជាប់ពីផ្លូវជាតិលេខ៥ ទៅកាន់ឃុំថ្មដា ស្រុកវាលវែង ជាប់ព្រំប្រទល់ខេត្តត្រាតប្រទេសថៃ ក្រៅពីនោះនៅមានហេដ្ឋារចនាសម្ព័ន្ធជាច្រើនផ្សេងទៀត។ លោកថ្លែងថា សមិទ្ធផលទាំងនេះ កើតឡើយដោយសារតែប្រទេសជាតិ មានសុខសន្តិភាព និងមានការអភិវឌ្ឍ ក្រោមការដឹកនាំដ៏ត្រឹមត្រូវ របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។
លោកបានបន្ថែមថា ខេត្តពោធិ៍សាត់មកដល់បច្ចុប្បន្ន ពុំទាន់មានករណីកូវីដ១៩នៅឡើយទេ ដើម្បីរក្សាបាននូវភាពជោគជ័យបន្តទៅទៀតនោះ សូមប្រជាពលរដ្ឋទាំងអស់ ត្រូវអនុវត្តទៅតាមការណែនាំ របស់ក្រសួងសុខាភិបាលជាប្រចាំ។ ជាមួយគ្នានោះ សូមប្រជាពលរដ្ឋ ត្រូវថែររក្សាការពារសុខភាព ចូលរួមគោរពច្បាប់ចរាចរណ៍ គោលនយោបាយ ភូមិ ឃុំ មានសុវត្ថិភាព និងខិតខំរកស៉ីទទួលទានតាមរយៈការចិញ្ចឹមសត្វ ដាំដំណាំ និងមុខរបរផ្សេងៗទៀត ក្នុងគោលបំណងបង្កើនជីវភាពគ្រួសារ ឱ្យកាន់តែប្រសើរឡើង។
នាឱកាសនោះ លោក ម៉ៅ ធនិន និងលោកស្រី ហ៊ុន ចាន់ធី រួមទាំងប្រតិភូ ក៏បានចែកជូនវត្ថុកំដរដៃ ដល់អ្នកចូលរួមប្រមាណ ១៥០នាក់ ក្នុងម្នាក់ៗទទួលបាន សាងរុង១ និងក្រមា១ ព្រមទាំងបន្តភ្ជួរ រាស់ និងសាបព្រោះស្រូវ សម្រាប់បើកធ្វើស្រែដើមរដូវផងដែរ៕
