(ភ្នំពេញ)៖ ក្រុមហ៊ុនអេសស៊ីជី ដែលជាអ្នករៀបចំព្រឹត្តិការណ៍ SCG MUANGTHONG UNITED ASEAN Tour ឆ្នាំ២០១៦ បានរៀបចំពិធីជប់លាងដ៏ធំមួយនៅថ្ងៃទី១៥ ខែមករា  ដោយមានការចូលរួមពីភ្ញៀវកិត្តិយសជាតិ និងអន្តរជាតិជាច្រើន ដើម្បីអបអរសាទរការប្រកួតរវាង ក្រុម SCG MuangThong United និងក្រុម K-Cement Cambodian All Stars ដែលនឹងប្រព្រឹត្តិទៅនៅថ្ងៃទី១៦ មករា នេះ នៅពហុកីឡាដ្ឋានជាតិអូឡាំពិក ។

ព្រឹត្តិការណ៍នេះ គឺជាព្រឹត្តិការណ៍បាល់ទាត់ជាលក្ខណៈមិត្តភាព និងមនុស្សធម៌ ដោយថវិកាដែលទទួលបានពីការលក់សំបុត្រ និងវត្ថុអនុស្សាវរីយ៍ផ្សេងៗ និងបរិច្ចាគទៅដល់មន្ទីរពេទ្យគន្ធបុប្ផាទាំងស្រុង។
កម្មវិធីនេះក៏មានការអញ្ជើញចូលរួមដោយ នាយឧត្តមសេនីយ៍ សៅ សុខា មេបញ្ជាការកងរាជអាវុធ ហត្ថលើផ្ទៃប្រទេស  លោក Nutthavut Photisaro អគ្គរាជទូតថៃប្រចាំប្រទេសកម្ពុជា លោក Roongrote Rangsiyopash ប្រធានអគ្គនាយកក្រុមហ៊ុនអេសស៊ីជី ប្រទេសថៃ ភ្ញៀវកិត្តយសជាតិ និងអន្តរជាតិ ក៏ដូចជា ក្រុមកីឡាករទាំងសងខាងផងដែរ ។
ក្នុងឱកាសនោះ លោក Roongrote Rangsiyopash ប្រធានអគ្គនាយកក្រុមហ៊ុនអេសស៊ីជី បានឲ្យដឹងថា «ក្នុងនាមជាក្រុមហ៊ុនអាជីវកម្មឈានមុខគេមួយក្នុងតំបន់អាស៊ាន អេសស៊ីជី មានទស្សនវិស័យ និងការប្តេជ្ញាចិត្ត ក្នុងការចូលរួមចំណែកលើកកម្ពស់ និងអភិវឌ្ឍសង្គម និងសហគមន៍ដែលយើងធ្វើប្រតិបត្តិការ ដោយជ្រុងដ៏សំខាន់មួយរបស់យើង គឺកីឡា ។ យើងជឿរជាក់យ៉ាងមុតមាំថា កីឡាជាសកម្មភាព ដែលបណ្តុះសាមគ្គីភាព និងមិត្តភាព ដូចជា ភាសា សាកលសម្រាប់មនុស្សជាតិដូច្នោះដែរ »

លោកបន្ថែមទៀតថា «ព្រឹត្តិការណ៍ SCG Muangthong United ASEAN Tour ឆ្នាំ២០១៦ នេះ អាចទទួលជោគជ័យទៅបាន ក៏ដោយសារមានការសហការគាំ​ទ្រពីភាគីពាក់ព័ន្ធ​ទាំងអស់ ក្នុងប្រទេសកម្ពុជា និងប្រទេសថៃ ដូច្នេះ ខ្ញុំសូមថ្លែងអំណរគុណអ្នកគ្រប់គ្នាជាខ្លាំង»។

នាយឧត្តមសេនីយ៍ សៅ សុខា ក៏បានថ្លែងផងដែរថា «ការប្រកួតនេះ មិនមែនជាការប្រយុទ្ធគ្នានោះទេ តែជាការបង្ហាញនូវមិត្តភាព និងសាមគ្គីភាព ហើយព្រឹត្តិការណ៍ធ្វើឡើងនេះ ក៏ដូចជាការអបអរ​សាទរខួប ៦៥ឆ្នាំ នៃទំនាក់ទំនងការទូតរវាងប្រទេសទាំងពីរ កម្ពុជា-ថៃ ដែរ ហើយខ្ញុំ និងក្រុមកីឡាករ ពិតជារីករាយ និងមានមោទនភាព ក្នុងការចូលរួមអបអរសាទរ​ព្រឹត្តិការណ៍នេះ »

គួរបញ្ចាក់ផងដែរថា ការប្រកួតនេះជាការប្រកួតមួយ ដែលមានការទន្ទឹងរងចាំពីអ្នកគាំទ្រកីឡាបាល់ទាត់ជាច្រើននៅក្នុងប្រទេសកម្ពុជា ពីព្រោះក្រុម K-Cement Cambodian All Stars គឺជាក្រុមមួយដែលបានជ្រើសរើសជាពិសេស ដោយសម្រិតសម្រាំងកីឡាករមានទេពកោសល្យ ជាច្រើនក្នុងប្រទេសកម្ពុជា ដូចជា ប្រធានក្រុមជម្រើសជាតិកម្ពុជាលោក ធារី ចន្ថាប៊ីន និងខ្សែប្រយុទ្ធល្បី ចាន់ វឌ្ឍនាកា ជាដើម។ ចំណែក ក្រុម SCG MuangThong United វិញ ក៏ជាក្រុមដ៏ខ្លាំង និងពេញនិយមបំផុតមួយ ក្នុងប្រទេសថៃផងដែរ ។ នៅរដូវកាលនេះ ក្រុម SCG MuangThong United បានជាប់លេខពីរនៅក្នុងក្របខ័ណ្ឌលីកកំពូលរបស់ប្រទេសថៃ ។
ការប្រកួតនៅថ្ងៃសៅរ៍ទី ១៦នេះ ទ្វារនឹងបើកទទួលអ្នកចូលទស្សនាចាប់ពីម៉ោង ៤ល្ងាច ហើយការប្រកួតជាក់ស្តែងនឹងចាប់ផ្តើមនៅម៉ោង ៦ល្ងាច ៕