(ភ្នំពេញ)៖ កូនស្រីច្បងលោក មាជ សុវណ្ណរ៉ា សកម្មជនគណបក្សសង្រ្គោះជាតិ បានសរសេរលិខិតមួយច្បាប់ទៅប្រធានាធិបតីសហរដ្ឋអាមេរិកលោកបារ៉ាក់ អូបាម៉ា។ លិខិតចុះថ្ងៃទី១៣ ខែមករា របស់កូនស្រីច្បង លោក មាជ សុវណ្ណារ៉ា ឈ្មោះ មាជ សុជាតា បានសរសេរបន្តថា៖ «លោកប្រធានាធិបតី ខ្ញុំនឹកឪពុកខ្ញុំណាស់។ ប្អូនស្រីខ្ញុំជេន្នី មានអាយុ១១ឆ្នាំ និងប្អូនស្រី ពៅ សារ៉ាយ អាយុ៧ឆ្នាំ មានក្តីទុក្ខព្រួយបំផុត។ គាត់មិនអាចផ្តោតអារម្មណ៍ក្នុងការសិក្សាទៀតផង។ ចំណែកម្តាយរបស់ពួកយើងបានក្លាយ ជាស្រី្តម្នាក់ឯងរត់តាមពេលវេលាក្នុងការថែទាំកូនផង និងធ្វើជំនួញគ្រប់គ្រងកាសែតខ្មែរប៉ុស្តិ៍ផង។ រីឪពុកក៏មានជំងឺ ដោយរុញច្រានឲ្យនាងខ្ញុំវិលវល់ដោយមិនដឹងត្រូវធ្វើអ្វី។ នាងខ្ញុំមានអារម្មណ៍អស់សង្ឃឹម និងឈឺចុកចាប់យ៉ាងខ្លាំង»។
កញ្ញាបានបញ្ជាក់ថា៖ «ក្នុងវ័យរបស់ខ្ញុំអាយុប្រហាក់ប្រហែលកូនស្រី របស់លោកប្រធានាធិបតី នាងខ្ញុំជឿជាក់ថា លោកពិតជាស្រឡាញ់កូនស្រី របស់លោកខ្លាំងណាស់ ដូចឪពុករបស់យើងខ្ញុំក៏ស្រឡាញ់ពួកយើងខ្ញុំខ្លាំងណាស់ដែរ»។
គួរបញ្ជាក់ថា កាលពីថ្ងៃទី២១ ខែកក្កដា ឆ្នាំ២០១៥ សាលាដំបូងរាជធានីភ្នំពេញបានផ្ដន្ទាទោសលោក មាជ សុវណ្ណារ៉ា ឲ្យជាប់ពន្ធនាគារ២០ឆ្នាំពីបទដឹកនាំ និងចូលរួមក្នុងចលនាកុប្បកម្មនាំឲ្យមានហិង្សា នៅក្បែរទីលានប្រជាធិបតេយ្យ កាលពីខែកក្កដា ឆ្នាំ២០១៤៕
