(ភ្នំពេញ)៖ លោក កន សុខកាយ អភិបាលស្រុក និងជាប្រធានគណៈកម្មការ អនុសាខាកាកបាទក្រហមកម្ពុជា ស្រុកល្វាឯម ព្រមទាំងសមាជិកសមាជិការ និងមន្ត្រីក្រុមការងារនៃគណៈកម្មការ អនុសាខាកាកបាទក្រហមស្រុក នៅសៀលថ្ងៃសុក្រ ២រោច ខែពិសាខ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី០៨ ខែឧសភា ឆ្នាំ២០២០ បានអញ្ជើញចូលរួមទទួលអំណោយមនុស្សធម៌ ពីព្រះសុធម្មមុនី ភោគ រស់ ព្រះអនុគណស្រុកល្វាឯម និងជាព្រះគ្រូចៅអធិការវត្តពោធិ៍មាស ព្រមទាំងព្រះមន្រ្តីសង្ឃព្រះគ្រូចៅអធិការវត្តទាំង៣២ក្នុងស្រុក។
អំណោយដែលទទួលបានរួមមាន គ្រឿងបរិក្ខាសម្ភារប្រើប្រាស់ចំនួន៨១ឈុត និងថវិកាដែលបានចូលរួមចំណែកពីព្រះអនុគណស្រុក មន្រ្តីសង្ឃឋានានុក្រមក្នុងស្រុក និងព្រះគ្រូចៅអធិការវត្តសរុបចំនួន ៣,៥០០,០០០រៀល។
នាឱកាសដ៍ថ្លៃថ្លានោះផងដែរ លោក កន សុខកាយ អភិបាលស្រុក និងជាប្រធានគណៈកម្មការអនុសាខាកបាទក្រហមស្រុក បានមា នប្រសាសន៍គោរព ថ្លែងអំណរគុណយ៉ាងជ្រាលជ្រៅបំផុត ចំពោះព្រះសង្ឃគ្រប់ព្រះអង្គ ដែលបានយកព្រះទ័យទុកដាក់ ក្នុងវិស័យមនុស្សធម៌គ្រប់ពេលវេលាមិនដែលខាន។
លោក កន សុខកាយ បានបន្តទៀតថា សម្ភារ និងថវិការដែលគណៈកម្មការអនុសាខាកាកបាទក្រហមកម្ពុជាស្រុកទទួលបាននេះ នឹងយកទៅ ប្រើប្រាស់ឲ្យចំគោលដៅ និងធ្វើការចែកជូនបងប្អូនប្រជាពលរដ្ឋទីទល់ក្រ ចាស់ជរា គ្មានទីពឹង និងពលរដ្ឋងាយរងគ្រោះ ឬដោយសារគ្រោះធម្មជាតិផ្សេងៗ ដោយភាពស្មោះត្រង់បំផុត៕
