(ព្រះសីហនុ)៖ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោក អេង ជាសាន ប្រតិភូរាជរដ្ឋាភិបាលកម្ពុជា ទទួលបន្ទុក ជាប្រធានរដ្ឋបាលជលផល, លោក គង់ វីតាណៈ អភិបាលរងខេត្ត និងសហការី នាព្រឹកថ្ងៃទី០១ ខែឧសភា ឆ្នាំ២០២០នេះ បានអញ្ជើញចុះមកពិនិត្យ ពីវឌ្ឍនភាព នៃការអភិវឌ្ឍកសិដ្ឋាន ចិញ្ចឹមបង្គាបែបធម្មជាតិ របស់ក្រុមហ៊ុន ហេង ហេង ដែលមានទីតាំងស្ថិត នៅភូមិអូរចំណារ ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។

លោក សេង ចាយ ប្រធានគ្រប់គ្រងបច្ចេកទេស បានឲ្យដឹងថា បច្ចុប្បន្នក្នុងកសិដ្ឋានមានផ្ទៃដី១០០ហិកតា បែងចែកជា ស្រះចិញ្ចឹម២០ ដោយបានអនុវត្តបច្ចេកទេស វិធីចិញ្ចឹមបង្គាដូចជាការ គ្រប់គ្រង ប្រើប្រាស់ និងសម្អាតទឹក (water treatment)។ ចំពោះការចិញ្ចឹមបច្ចុប្បន្ន ដាក់កូនបង្គា១០លានកូន ក្នុងស្រះទាំង២០ ហើយចាប់ ផ្តើមប្រមូលផលជាបណ្តើរ ចាប់ពីអាយុ៤៥ថ្ងៃ ដំណាក់កាលដំបូង សម្រាប់ធ្វើបង្គាក្រៀម ឬបរិភោគស្រស់។ ដំណាក់កាលទី២៖ អាយុបាន៣ខែ អាចប្រមូលផលបាន ៣តោន ក្នុងមួយហិកតា ហើយក្នុង១ឆ្នាំ ចាប់បាន៣ដង ក្នុង១ហិកតា ដាក់កូនបង្គា៥ម៉ឺនក្បាល។

ចំពោះកម្រៃក្នុង១ឆ្នាំ អាចរកចំណូលបាន១ម៉ឺនដុល្លារ (ដកប្រាក់ចំណាយរួច) ដោយបង្គាធម្មជាតិមានតម្លៃ៥ ទៅ៧ដុល្លារ ក្នុងមួយគីឡូ។ បង្គាធម្មជាតិនេះ ទីផ្សារកំពុង ពេញនិយមណាស់ ជាពិសេសតាមភោជនីយដ្ឋានធំៗ នៅខេត្តព្រះសីហនុ និងនៅភ្នំពេញ។ អនាគតគ្រោង នឹងពង្រីកផ្ទៃដីចិញ្ចឹមបន្ថែម ភ្ញាស់កូនបង្គា និងកូនក្តាមលក់ជូនប្រជានេសាទក្នុងតំបន់នេះ ព្រមទាំងបង្កើតសិប្បកម្មបង្គាក្រៀមផងដែរ។

ដោយឡែក កសិករដែលធ្លាប់តែធ្វើស្រែ ទទួលផលតាមយថាកម្ម បច្ចុប្បន្នងាកមកប្រកាន់យករបរចិញ្ចឹមបង្គា តាមបែបធម្មជាតិ ហើយនឹងពង្រីកផ្ទៃដីបន្ថែម ដោយអនុវត្តផលិតកម្មកសិកម្ម តាមកិច្ចសន្យាជាមួយក្រុមហ៊ុន។

ពិនិត្យឃើញទិដ្ឋភាពជាក់ស្តែង នូវហេដ្ឋារចនាសម្ព័ន្ធកសិដ្ឋាន ផលិតកម្មចិញ្ចឹមបង្គា ប្រកបដោយបច្ចេកវិទ្យាសាមញ្ញ តាមបែបធម្មជាតិ ភាតរបរិស្ថាន កំពុងដំណើរការ ទៅដោយរលូន និងទទួល ជោគជ័យជាបណ្តើរយ៉ាងដូច្នេះ លោករដ្ឋមន្រ្តី វេង សាខុន និងលោកអភិបាលរងខេត្ត បានកោតសរសើរ សម្តែងនូវទឹកចិត្តសប្បាយរីករាយ និងវាយតម្លៃខ្ពស់ចំពោះ ការចូលរួមវិនិយោគលើវិស័យវារីវប្បកម្ម ជាអនុវិស័យដ៏សំខាន់មួយ ដែលរដ្ឋបាលជលផល បាននិងកំពុងជំរុញ និងលើកទឹកចិត្ត ឲ្យវិស័យ ឯកជនចូលរួម ជាចលករក្នុងការជំរុញការអភិវឌ្ឍវិស័យនេះ ដើម្បីបង្កើនផលចាប់ធានាបាន ទាំងបរិមាណ និងគុណភាពឆ្លើយតបតាមសេចក្តីត្រូវការទីផ្សារ និងជាពិសេសចូលរួមកាត់បន្ថយ ការនាំចូលផលិតផលបង្គា ពីប្រទេសជិតខាង។

ជាងនេះនៅទៀត គឺចាប់យកកាលានុវត្តភាព ក្នុងកាលៈទេសៈ ដែលយើងកំពុងជួបវិបត្តិជំងឺឆ្លងសកលកូវីដ-១៩ តាមប្រសាសន៍ណែនាំ របស់សម្តេចតេជោ ហ៊ុន សែន នាយករដ្ឋមន្រ្តី។ មួយវិញទៀត លោកបានបញ្ជាក់ថា ការចូលរួមពីវិស័យឯកជន ក្នុងការវិនិយោគលើវិស័យកសិកម្មជារួម និងដោយឡែក វិស័យវារីវប្បកម្មនេះ ពិតជាបានចូលរួមចំណែក បង្កើតការងារជូនប្រជាពលរដ្ឋនៅមូលដ្ឋាន បង្កើនចំណូលក្នុងគ្រួសារ និងកាត់បន្ថយភាពក្រីក្រ ជាពិសេសចូលរួមអនុវត្តគោលនយោបាយ និងផែនការអភិវឌ្ឍវិស័យកសិកម្ម ស្របតាមអភិក្រម «រដ្ឋ ឯកជន ដៃគូអភិវឌ្ឍន៍ និងសហគមន៍កសិកម្ម»។

មិនតែប៉ុណ្ណោះ លោក វេង សាខុន ក៏បានសម្តែងនូវការ គាំទ្រចំពោះឆន្ទៈពង្រីកផ្ទៃដីចិញ្ចឹម នាពេលអនាគត ដែលវានឹងចូលរួមចំណែកបង្កើនផលិតផលបង្គាធម្មជាតិ សម្រាប់ទីផ្សារក្នុងស្រុក និងធ្វើការកែច្នៃសម្រាប់នាំចេញ ថែរក្សាបរិស្ថាន និងសុខភាពអ្នកបរិភោគ។

ឆ្លៀតយកឱកាសនេះ លោក វេង សាខុន បានណែនាំឲ្យក្រុមហ៊ុនសហការ ជាមួយរដ្ឋបាលជលផល និងមន្ទីរកសិកម្ម រុក្ខាប្រមាញ់ និងនេសាទខេត្ត រៀបចំផែនការផលិត កម្ម ការអនុវត្តបច្ចេកទេស និងលិខិតបទដ្ឋានគតិយុត្តរបស់ក្រសួងឲ្យបានត្រឹមត្រូវ ដើម្បីឲ្យការវិនិយោគនេះ ដំណើរការទៅដោយរលូន ចីរភាព និងនិរន្តរភាព និងសូមចូលរួមថែរក្សាព្រៃកោងកាង ដែលនៅជិតនេះ ឲ្យបានគង់វង្សដើម្បីទុកជាសម្បត្តិរដ្ឋតរៀងទៅ៕