(បន្ទាយមានជ័យ)៖ នៅវេលាម៉ោង២និង៣០នាទីរសៀល ថ្ងៃទី០៩ ខែមករា ឆ្នាំ២០១៦នៅចំណុច លើខ្នងប្រលាយស្ថិតក្នុងភូមិ កោះកែវ ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ កម្លាំងការិយាល័យបទល្មើសគ្រឿងញៀន សហការជាមួយកម្លាំងកងរាជអាវុធហត្ថមូលដ្ឋានស្រុកមង្គលបូរី ដឹកនាំដោយលោក ស ប៊ុនសឿង មេបញ្ជាការរងកងរាជអាវុធហត្ថខេត្តទទួលលើការងារបទល្មើសគ្រឿងញៀន បានធ្វើប្រតិបត្តិការបង្រាបករណីជួញដូរគ្រឿងញៀន ឃាត់ខ្លួនជនសង្ស័យបានចំនួនម្នាក់និងវត្ថុតាងមួយចំនួន។
លោកឧត្តមសេនីយ៍ត្រីឱ បូរិន្ទមេបញ្ជាការអ ហខេត្តបានអោយដឹងថ្ងៃអាទិត្យនេះថា ជនសង្ស័យមានឈ្មោះ ហឿន ម៉ានិត ភេទប្រុស អាយុ១៦ឆ្នាំ ជនជាតិខ្មែរដែលមានទីលំនៅបច្ចុប្បន្ន ភូមិ ឬស្សីក្រោក ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ ព្រមទាំងដកហូតវត្ថុតាងគ្រឿងញៀនមេតំហ្វេតាមីន ទឹកកក ចំនួន២កូនថង់កិប ទម្ងន់២,៣ក្រាម។
តាមការសួរចម្លើយរបស់កំលាំងអាវុធហត្ថ ជនសង្ស័យបានឆ្លើយសារភាពថារូបគេពិតជាធ្លាប់លក់គ្រឿងញៀនពិតមែន។ បច្ចុប្បន្នកម្លាំងជំនាញកំពុងកសាងសំណុំរឿងបញ្ជូនទៅសាលាដំបូងខេត្តចាត់ការតាមនិតិវិធីច្បាប់៕
