(កំពង់ស្ពឺ)៖ លោក ហ៊ុន ម៉ានី អនុប្រធានទីមួយ ក្រុមការងារគណបក្សប្រជាជនកម្ពុជា ចុះជួយខេត្តកំពង់ស្ពឺ និងក្រុមការងារ នាព្រឹកថ្ងៃទី២៥ ខែមេសា ឆ្នាំ២០២០នេះ បានអញ្ជើញចុះសាកសួរសុខទុក្ខ និងស្តាប់ពីលទ្ធផល នៃការអនុវត្តវិធានការនានា របស់រាជរដ្ឋាភិបាល ក្នុងការទប់ស្កាត់ការ រីករាលដាលនៃជំងឺកូវីដ ១៩ កន្លងមក និងក្នុងអំឡុងពេលបុណ្យចូលឆ្នាំថ្មីប្រពៃណីជាតិ ក៏ដូចជាស្វែងយល់ពីស្ថានភាព ជីវភាពរស់នៅរបស់ប្រជាពលរដ្ឋមូលដ្ឋាន ពីថ្នាក់ដឹកនាំស្រុកឧដុង្គ ឃុំចាន់សែន និងឃុំក្រាំងចេកនៃស្រុកឧដុង្គ ក្រុងច្បារមន និងឃុំត្រពាំងគង នៃស្រុកសំរោងទង ខេត្តកំពង់ស្ពឺ។
ក្នុងឱកាសនោះ លោក ហ៊ុន ម៉ានី ក៏បានពាំនាំបណ្តាំផ្ញើសួរសុខទុក្ខ និងការថ្លែងអំណរគុណ ពីសំណាក់ថ្នាក់ដឹកនាំ ជាពិសេសសម្តេចតេជោ នាយករដ្ឋមន្រ្តី និងលោកកិត្តិសេដ្ឋាបណ្ឌិត ឆាយ ថន ចំពោះកិច្ចខិតខំប្រឹងប្រែង ក៏ដូចជាការលះបង់ទាំងកំលាំងកាយចិត្ត របស់ថ្នាក់ដឹកនាំ មន្រ្តីគ្រប់ជាន់ថ្នាក់ កងកម្លាំងគ្រប់ប្រភេទ ក្នុងការចុះផ្សព្វផ្សាយអប់រំណែនាំ ពីហានិភ័យ និងការបង្ការការឆ្លងជំងឺដល់ប្រជាពលរដ្ឋ ក្នុងដំណាក់កាលដែលប្រទេសជាតិ កំពុងប្រឈមនឹងការរីករាលដាលនៃជំងឺកូវីដ ១៩នេះ៕
