(កណ្ដាល)៖ លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកស៊ីម៉ាក់ ក្នុងនាម ជាប្រធានក្រុមការងាររាជរដ្ឋាភិបាល ចុះជួយស្រុកលើកដែក ខេត្តកណ្តាល និងតំណាងឱ្យអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងាររាជរដ្ឋាភិបាល ចុះជួយខេត្តកណ្តាល និងលោកស្រីកិត្តិសង្ហបណ្ឌិត ឃួន សុដារី អនុប្រធានទី២រដ្ឋសភាជាតិ អនុប្រធានទី១ គណ:អចិន្រ្តៃយ៍ក្រុមការងារគណបក្ស ចុះមូលដ្ឋានខេត្តកណ្តាល បានចុះជួបសំណេះសំណាលអតីតយុទ្ធជន និងនិវត្តន៍ជន នៅឃុំកំពង់ភ្នំ និងឃុំព្រែកទម្លាប់។
ក្នុងឱកាសចុះជួបសំណេះសំណាល ជាមួយអតីតយុវជន និងនិវត្តន៍ជន ជនពិការចំនួន១០០គ្រួសារ នៅឃុំកំពង់ភ្នំ និងឃុំព្រែកទម្លាប់ ស្រុកលើកដែក ខេត្តកណ្តាលនេះ លោក ហេង រតនា ក៏បាននាំយកអំណោយប្រគល់ជូនរួមមាន៖ អង្ករ, ទឹកស៊ីអ៊ីវ, ម៉ាស, ក្រមា សម្រាប់ការពារជំងឺកូវីដ-១៩ និងថវិកាមួយចំនួនផងដែរ។
ការចុះជួបសំណេះសំណាលនេះ លោក ហេង រតនា នឹងបន្ដធ្វើទូទាំងស្រុកលើកដែក ខេត្ដកណ្ដាល ជាក់ស្ដែកនាព្រឹកថ្ងៃទី២៥ ខែមេសា ឆ្នាំ២០២០នេះ លោកបាន ចុះមកឃុំកំពង់ភ្នំ និងឃុំព្រែកទម្លាប់ បន្ទាប់មកនៅសប្ដាហ៍ក្រោម លោកនឹងចុះបន្ដបន្ទាប់ទៀត រហូតបានគ្រប់ឃុំ។
លោក ហេង រតនា ក៏បានផ្ដាំផ្ញើការសួរសុខទុក្ខ ពីសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងសម្ដេចកិត្ដិព្រឹទ្ធិបណ្ដិត ប៊ុន រានី ហ៊ុន សែន ប្រធានកាកបាទក្រហមកម្ពុជា និងឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ទៅកាន់បងប្អូនអតីតយុវជន និងនិវត្តន៍ជនផងដែរ។
ក្នុងឱកាសនោះ លោកបានថ្លែងអំណរគុណដល់បងប្អូនប្រជាពលរដ្ឋ ដែលបានចូលរួមយ៉ាងសកម្មភាព អនុវត្តន៍នូវអនុសាសន៍ណែនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រមុខដឹកនាំប្រយុទ្ធប្រឆាំងនឹងជំងឺកូវីដ១៩ ដែលបានចូលរួមការទប់ស្កាត់រីករាលដាលជំងឺកូវីដ១៩ ទទួលបានលទ្ធផលយ៉ាងល្អប្រសើរ ដែលធ្វើឲ្យចំនួនអ្នកឆ្លងកូវីដ១៩ មិនមានកំណើន ហើយចំនួនអ្នកជាថ្មីត្រូវបានជាសះស្បើយជាបន្តបន្ទាប់។
ប៉ុន្តែបើទោះបីជា ទទួលបានលទ្ធផលប្រសើរក្នុងការប្រយុទ្ធប្រឆាំងនឹងជំងឺកូវីដនេះក្តី លោក ហេង រតនា នៅតែអំពាវនាវយ៉ាងទទូចដល់ដល់បងប្អូនប្រជាពលរដ្ឋ ត្រូវបន្ដរក្សាថែរក្សាអនាម័យ ដោយលាងដៃ ជាមួយនិងអាកុល និងសាប៊ូ ជាប់ប្រចាំ ដើម្បីទប់ស្កាត់ការរីករាលដាលជំងឺកូវីដ-១៩ ទោះបីនៅរយៈពេលប៉ុន្មាន១៣ថ្ងៃចុងក្រោយនេះ កម្ពុជាមិនការឆ្លងរីករាលដាលជំងឺយ៉ាងណាក្ដី។
លោក ហេង រតនា សង្កត់ធ្ងន់ថា «បងប្អូនប្រជាពលរដ្ឋយើងអាចភ្លេចជំងឺកូវីដ១៩ ប៉ុន្តែជំងឺកូវីដ១៩ មិនដែលភ្លេចបងប្អូន បើបងប្អូនធ្វេសប្រហែសនោះ»៕
