(ភ្នំពេញ)៖ ព្រះឧបាលិវង្ស វ៉ង់ គឹមសន ព្រះរាជាគណៈថ្នាក់ត្រី គណៈមហានិកាយនៃព្រះរាជាណាចក្រកម្ពុជា ព្រះវិន័យធរគណរាជធានីភ្នំពេញ ព្រះគ្រូអនុគណខណ្ឌ ពោធិ៍ សែនជ័យ និងជាព្រះចៅអធិការវត្តជម្ពូវ័ន ព្រមទាំងសហការី និងព្រះចៅអធិការគ្រប់វត្តក្នុងខណ្ឌពោធិ៍សែនជ័យ បានផ្ញើលិខិតអបអរសាទរ ចំពោះសម្តេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង និងជាប្រធានគណៈកម្មាធិការជាតិ រៀបចំបុណ្យជាតិ-អន្តរជាតិ ដែលត្រូវបានរាជរដ្ឋាភិបាល សម្រេចអនុញ្ញាតឱ្យរដ្ឋបាលរាជធានីភ្នំពេញ ប្រសិទ្ធនាមផ្លូវ២០០៤ ទៅជាមហាវិថីសម្តេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល។

លិខិតដែលអង្គភាពព័ត៌មាន Fresh News ទទួលបានគូសបញ្ជាក់យ៉ាងដូច្នេះថា៖ «នេះជាសក្ខីភាពមួយបង្ហាញ ឱ្យឃើញអំពីការខិតខំប្រឹងប្រែងអស់ពីកម្លាំងកាយចិត្ត ប្រាជ្ញា ស្មារតី ថ្វាយ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត និងថ្វាយ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ទទួលបានលទ្ធផលល្អប្រសើរ ក្នុងការបម្រើជាតិ សាសនា ព្រះមហាក្សត្រ»។

សូមបញ្ជាក់ថា រាជរដ្ឋាភិបាលកម្ពុជា បានសម្រេចប្រសិទ្ធនាមផ្លូវ២០០៤ ទៅជាមហាវិថីសម្តេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល ដែលមហាវិថីនេះ ចាប់ពីចំណុចមហាវិថីខេមរភូមិន្ទ (ផ្លូវលេខ២៧១) រហូតដល់ចំណុចមហាវិថីសហព័ន្ធរុស្ស៊ី ប្រវែង ៤៤៥០ម៉ែត្រ និងមានទទឹងប្រវែង ២០ម៉ែត្រ ស្ថិតនៅខណ្ឌសែនសុខ និងខណ្ឌពោធិ៍សែនជ័យ។ នេះបើតាមលិខិតរបស់ ទីស្តីការគណៈរដ្ឋមន្ត្រី ចុះថ្ងៃទី១៦ ខែមេសា ឆ្នាំ២០២០៕