(កំពង់ធំ)៖ ប្រជាពលរដ្ឋ សិស្សានុសិស្សជាង៥០០នាក់ បានចូលរួមក្នុង ពិធីប្រារព្វពិធីអបអរសាទរ ខួបទី៣៧ឆ្នាំ នៃទិវាជ័យជន្នះ៧មករា ឆ្នាំ១៩៧៩ និង២០១៦ នៅទីស្នាក់ការគណបក្សស្រុកប្រាសាទបល្ល័ង្គ ខេត្តកំពង់ធំ នៅព្រឹកថ្ងៃទី ៧ ខែមករា ឆ្នាំ២០១៦នេះ ក្រោមអធិបតីភាពលោក ជា អឿង តំណាងរាស្រ្តមណ្ឌលកំពង់ធំ និងជាប្រធានក្រុមការងារ ចុះជួយស្រុកប្រាសាទបល្ល័ង្គ។
លោក ជា អឿង បានថ្លែងផ្តាំផ្ញើដល់ប្រជាពលរដ្ឋ ដែលបានមកចូលរួមជាង៥០០នាក់ថា ចូរចង់ចាំនូវគុណបំណាច់របស់ គណបក្សប្រជាជនកម្ពុជា ដែលបានផ្តួលរំលំរបបបនប្រល័យ ពូជសាស្រ្តប៉ុលពត ឲ្យរួចផុតពីឋាននរក ប្រជាពលរដ្ឋខ្មែរទូទាំងប្រទេស រងទុក្ខវេទនា លំបាកខ្លោចផ្សារ ប្ដីព្រាត់ប្រពន្ឋ ម្តាយព្រាត់កូន គ្មានចំណីអាហារ ថ្នាំសង្កូវ និងចងយកទៅសម្លាប់ ចោលដោយអយុត្តធម៌ គ្មានសិទ្ធិសេរីភាពអ្វីទាំងអស់ គ្មានគណបក្សណាចេញមុខរំដោះប្រទេសជាតិ និងប្រជាជននោះទេ គឺមានតែគណបក្សប្រជាជនតែមួយគត់ ដែលតស៊ូមិនខ្លាចស្លាប់ ដើម្បី វាយរំលំបនក្បត់ឃោឃៅនេះ។
លោក ជា អឿង បានថ្លែងឲ្យដឹងទៀតថា គណបក្សប្រជាជនជាអ្នកសង្រ្គោះជាតិ ហើយបានដណ្តើមបានជ័យជន្នះ នៅថ្ងៃ៧មករា ឆ្នាំ១៩៧៩ រហូតមកដល់រយៈពេលនេះ៣៧ឆ្នាំ មានសន្តិភាព សេរីភាព មិនតែប៉ុណ្ណោះគណបក្សបានខិតខំស្តារ និងកសាងប្រទេសឡើងវិញ ដោយចាប់ពីបាតដៃទទេ រហូតបានរីកចម្រើនគ្រប់វិស័យ៕
