(ភ្នំពេញ)៖ ស្ថានទូតអាម៉េរិកប្រចាំនៅកម្ពុជានៅថ្ងៃនេះ បានប្រកាសថា ជ័យជម្នះ ៧ មករា ឆ្នាំ១៩៧៩ គឺជាព្រឹត្តការណ៍ ដែលកម្ពុជា បានរួចផុតពីវាលពិឃាតដ៏ឃោរឃៅរបស់ ប៉ុល ពត ហើយជាជ័យជម្នះរបស់ប្រជាពលរដ្ឋកម្ពុជាទាំងអស់គ្នា។ ការប្រកាសរបស់ស្ថាន ទូតអាមេរិក បានធ្វើឡើងស្របពេល ដែលរាជរដ្ឋាភិបាល កម្ពុជា មកពីគណបក្សប្រជាជនកម្ពុជា កំពុងប្រារព្ធខួប ៣៧ឆ្នាំ នៃថ្ងៃជ័យ ជម្នះ ៧ មករា យ៉ាងមហោឡារឹក។

តាមរយៈទំព័រ Facebook របស់ខ្លួនស្ថានទូតអាមេរិកប្រចាំនៅកម្ពុជា នៅរសៀលថ្ងៃទី០៧ ខែមករា ឆ្នាំ២០១៦នេះ បានលើកឡើងថា «ជ័យជម្នះ របស់ប្រទេសកម្ពុជានៅថ្ងៃទី៧ ខែមករា កត់សម្គាល់ការរំដោះទីក្រុងភ្នំពេញពីរបបខ្មែរក្រហម ដែលជារបបមួយគេមើល ឃើញច្បាស់ថា ស្ថិតក្នុងចំណោមរបប ដ៏អាក្រក់បំផុត នៅក្នុងប្រវត្តិសាស្រ្ត។ ជ័យជម្នះ លើពួកខ្មែរក្រហម គឺជាជ័យជម្នះ របស់ប្រជាជន កម្ពុជាទាំងអស់»។

ការប្រកាសរបស់ស្ថានទូតអាមេរិក ដែលប្រទេសមហាអំណាចពិភពលោកមួយនេះ គឺ ផ្ទុយទៅនឹងការលើកឡើងរបស់ប្រធានគណ បក្សសង្រ្គោះជាតិ លោក សម រង្ស៊ី និង លោក កឹម សុខា អនុប្រធាន ដែលមិនដែលទទួលស្គាល់ជ័យជម្នះមួយនេះឡើយ ហើយតែង ធ្វើការបន្ទោសបង្អាប់ជានិច្ចថា ជាថ្ងៃដែលបរទេសចូលឈ្លានពានទឹកដីកម្ពុជា។

នៅក្នុងសេចក្តីប្រកាសនេះ ស្ថានទូតអាមេរិក ក៏បានចូលសំដែងទុក្ខសោក ចំពោះការបាត់បង់ជីវិតជិត ២លាននាក់ និងការខ្ចាត់ព្រាត់ នៅក្នុងជីវិតមនុស្សជាច្រើនទៀត។ នៅថ្ងៃខួប នៃជ័យជម្នះរបស់គណបក្សប្រជាជនកម្ពុជានេះ អាមេរិក បានបង្ហាញការចង់ឃើញប្រជា ជនកម្ពុជារស់នៅប្រកបដោយវិបុលភាព។

ស្ថានទូតអាមេរិក បានបញ្ជាក់យ៉ាងដូច្នេះ «ក្នុងនាមជាមិត្តរបស់ប្រជាជនកម្ពុជា បំណង ដ៏មុតមាំរបស់យើង គឺចង់ឃើញប្រជាជនកម្ពុជា ក្នុងគ្រប់ជំនឿទាំងអស់បន្តធ្វើការជាមួយគ្នា ដើម្បីកសាងអនាគតមួយ ដែលមានវិបុលភាព និង ប្រជាធិបតេយ្យកាន់តែច្រើនឡើង»។

សូមរំលឹកថា ក្នុងរយៈពេលកាន់កាប់របស់សម័យកម្ពុជាប្រជាធិបតេយ្យ ដែលហៅថាសម័យ ប៉ុល ពត ដ៏សែនប្រល័យត្រឹមរយៈពេល ៣ឆ្នាំ ៨ខែ និង ២០ថ្ងៃ បានសម្លាប់ប្រជាពលរដ្ឋកម្ពុជាប្រមានជិត ៣លាននាក់ និង ធ្វើឲ្យប្រទេសកម្ពុជា ធ្លាក់ដល់កម្រិតសូន្រផងដែរ។

តែយ៉ាងណា ក៏ដោយក្រោយពីមានការរំដោះរបស់កម្លាំងតស៊ូរបស់រណសិរ្សសាមគ្គីសង្រ្គោះជាតិ ដឹកនាំដោយយុទ្ធជនសម្តេច ហេង សំរិន សម្តេច ជា ស៊ីម សម្តេចតេជោ ហ៊ុន សែន រួមអ្នកស្នេហាជាតិជាច្រើនរូបទៀត នៅថ្ងៃ ៧ មករា ឆ្នាំ១៩៧៩ បានធ្វើឲ្យប្រទេស កម្ពុជា មានសុខសន្តិភាពនិងរីកចម្រើន ជាបន្តបន្ទាប់រហូតដល់បច្ចុប្បន្ន៕