(ប៉ៃលិន)៖ នៅព្រឹកថ្ងៃទី៧ ខែមករា ឆ្នាំ២០១៦នេះ នៅសាលប្រជុំគណបក្សខេត្តប៉ៃលិន បានប្រារព្ធខួបលើកទី៣៧ នៃទិវាជ័យជំនះ៧មករា (៧ មករា ១៩៧៩- ៧ មករា ២០១៦) ក្រោមអធិបតីភាពលោក អ៉ី ឈាន ប្រធានក្រុមការងារថ្នាក់កណ្តាល ចុះជួយខេត្តប៉ៃលិន និងជានាយករងខុទ្ទកាល័យ សម្តេចតេជោនាយរដ្ឋមន្ត្រី, លោក ប៉ាន សូរសក្តិ, លោក ឡី ចាន់ឆាយ, លោក កើត សុធា អភិបាលខេត្ត និងមន្ត្រីរាជការជុំវិញខេត្តជាច្រើនរូប និងសមាជិក សមាជិកា ប្រមាណ៨២៥នាក់។
ក្នុងឱកាសនោះ លោក កើត សុធា អភិបាលខេត្ត បានអានសុន្ទរកថាសម្តេចតេជោ ហ៊ុន សែន ឲ្យដឹងថា ពេលនេះយើងកំពុងឈានចូលឆ្នាំ២០១៦ ជាមួយនឹងសេចក្តីសង្ឃឹម ចំពោះជោគជ័យថ្មីៗទៀត លើគ្រប់វិស័យសម្រាប់មាតុភូមិយើង។ នៅក្នុងបរិការណ៍នេះ ការរួបរួមនៃរាល់កម្លាំងនយោបាយក្នុងសង្គម លើមូលដ្ឋានប្រកាន់ខ្ជាប់គោលការណ៍ប្រជាធិបតេយ្យ និងនីតិរដ្ឋ គឺជាកត្តាដ៏មានសារៈសំខាន់ ដើម្បីធានានូវស្ថិរភាព ការបន្តដំណើរការអភិវឌ្ឍប្រទេសជាតិ និងភាពសុខដុមរមនាក្នុងសង្គមយើង៕
