(ភ្នំពេញ)៖ មន្ត្រីឋានៈអគ្គនាយកពីររូបនៃក្រុមប្រឹក្សាធម្មនុញ្ញ សម្រេចរំលែកប្រាក់បៀវត្សរបស់ខ្លួនចំនួន៥ខែ ជូនគណៈកម្មការជាតិប្រយុទ្ធប្រឆាំងជំងឺកូវីដ១៩ ដើម្បីចូលរួមដោះស្រាយការលំបាកទាំងឡាយរបស់រាជរដ្ឋាភិបាលកម្ពុជាពីការរាតត្បាតជំងឺកូវីដ១៩។

មន្ត្រីឋានៈអគ្គនាយកទាំងពីររូបនេះ រួមមាន៖ លោក ស៊ាន សូលីវុធ អគ្គនាយកសេវាច្បាប់ និងបច្ចេកទេស បរិច្ចាគថវិកា ៥០ម៉ឺនរៀលនៃប្រាក់បៀវត្សប្រចាំខែរបស់ខ្លួន ចាប់ពីខែឧសភា ដល់ខែកញ្ញា។

លោក ម៉េង ផល្លា អគ្គនាយករដ្ឋបាល និងហិរញ្ញវត្ថុ បរិច្ចាគថវិកា ៤០ម៉ឺនរៀលនៃប្រាក់បៀវត្សប្រចាំខែរបស់ខ្លួន ចាប់ពីខែឧសភា ដល់ខែកញ្ញា។

ក្នុងលិខិតប្រកាសពីការបរិច្ចាគប្រាក់បៀវត្សផ្ញើជូនលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាអនុប្រធានអចិន្ត្រៃយ៍គណៈកម្មការជាតិប្រយុទ្ធនឹងជំងឺកូវីដ១៩ នៅថ្ងៃទី០៣ ខែមេសា ឆ្នាំ២០២០នេះ លោកអគ្គនាយកទាំងពីរបានគូសបញ្ជាក់ថា ការបរិច្ចាគនេះដើម្បីរួមចំណែកក្នុងការប្រយុទ្ធប្រឆាំងជំងឺកូវូដ១៩ (COVID-19) ដែលស្ថិតក្នុងស្ថានភាពបន្តរីករាលដាលនៅក្នុងប្រទេសកម្ពុជា។

សូមបញ្ជាក់ថា ដើម្បីដោះស្រាយការលំបាកទាំងឡាយដែលកំពុងប្រឈមសម្រាប់កម្ពុជាបណ្តាលមកពីជំងឺកូវីដ១៩នោះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅទី០១ ខែមេសា ឆ្នាំ២០២០ បានប្រកាសបរិច្ចាគប្រាក់បៀវត្សរបស់សម្តេចចំនួន៧ខែ ជូនដល់គណៈកម្មការជាតិប្រយុទ្ធនឹងជំងឺកូវីដ១៩។ ប្រាក់បៀវត្សរបស់សម្តេចតេជោដែលបរិច្ចាគនេះ រាប់ចាប់ពីខែមីនា រហូតដល់ខែកញ្ញា ឆ្នាំ២០២០។

ប្រាក់បៀវត្សនាយករដ្ឋមន្ត្រីកម្ពុជា មានប្រមាណ១០លានរៀល ក្នុង១ខែ ខណៈប្រាក់ខែឧបនាយករដ្ឋមន្រ្តី ៨លាន ប្រាក់ខែទេសរដ្ឋមន្រ្តីចំនួន៦លាន និងរដ្ឋមន្ត្រីមានប្រមាណ៥លានរៀលក្នុង១ខែ។

សម្តេចពញាចក្រី ហេង សំរិន ប្រធានរដ្ឋសភា សមាជិកសភា ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី រដ្ឋលេខាធិការ អនុរដ្ឋលេខាការ មន្ត្រីរាជការ កងកម្លាំងប្រដាប់អាវុធ មន្ត្រីតុលាការ និងមន្ត្រីនៅស្ថាប័នផ្សេងៗទៀត ក៏បានសម្រេចបរិច្ចាគប្រាក់បៀវត្សប្រចាំខែរបស់ខ្លួនជាបន្តបន្ទាប់ផងដែរ ជូនដល់គណៈកម្មការជាតិប្រយុទ្ធប្រឆាំងជំងឺកូវីដ១៩ ដើម្បីរួមចំណែកគ្នាជួយដោះស្រាយការលំបាករបស់ជាតិក្នុងពេលរងការរាតត្បាតដោយជំងឺកូវីដ១៩៕