(ភ្នំពេញ)៖ រដ្ឋមន្ត្រីថ្មីនៃក្រសួងយុត្តិធម៌ លោក កើត រិទ្ធ បានអួលដើមក និងស្រក់ទឹកភ្នែកទាំងមិនដឹងខ្លួន ក្នុងពេលរំលឹកដល់គុណធម៌ និងគុណូបការៈនៃការបណ្តុះបណ្តាល ព្រមទាំងមនោសញ្ចេតនាអនុស្សាវរីយ៍ទាំងឡាយក្នុងពេលបំពេញការងារក្រោមឱវាទរបស់លោក អង្គ វង្ស វឌ្ឍនា អតីតរដ្ឋមន្ត្រីក្រសួងយុត្តិធម៌ រយៈពេល១៣ឆ្នាំ។

ក្នុងពេលឡើងប្តេជ្ញាចិត្តក្នុងពិធីប្រកាសចូលកាន់តំណែងនៅរសៀលថ្ងៃទី០១ ខែមេសា ឆ្នាំ២០២០នេះ លោក កើត រិទ្ធ បានរំលឹកថា ក្នុងពេលលោកនៅជារដ្ឋលេខាធិការក្រសួងយុត្តិធម៌ ក្រោមឱវាទរបស់លោក អង្គ វង្ស វឌ្ឍនា លោកទទួលបានការអប់រំការបណ្តុះបណ្តាល និងបទពិសោធន៍ការងារយ៉ាងច្រើនពីសំណាក់លោក អង្គ វង្ស វឌ្ឍនា។

ពេលរំលឹកដល់អនុស្សាវរីយ៍ និងគុណូបការៈរបស់អតីតមេកើយរបស់ខ្លួន លោក កើត រិទ្ធ ក៏ចាប់ក្តុកក្តួលរំជួលចិត្ត ហើយរុញច្រានទឹកភ្នែកឱ្យហូរចេញមកទាំងរហូតថ្លែងសារលែងចង់ចេញ។

តាមរយៈដំណក់ទឹកភ្នែកនាំឱ្យគេវាយតម្លៃ និងសន្និដ្ឋានពីមនោសញ្ចេតនាយ៉ាងជ្រាលជ្រៅរវាងលោក អង្គ វង្ស វឌ្ឍនា អតីតរដ្ឋមន្ត្រី និងលោក កើត រិទ្ធ ដែលជារដ្ឋមន្ត្រី។ តាមរយៈអ្វីដែលលេចចេញមកនេះ ក៏មានការវាយតម្លៃចំពោះអត្តចរិត និងលក្ខណៈសម្បត្តិរបស់លោក កើត រិទ្ធ ថាជាបុគ្គលផ្តល់តម្លៃខ្ពស់ចំពោះគុណធម៌។

សូមបញ្ជាក់ថា លោក កើត រិទ្ធ ដែលមានអាយុ៤១ឆ្នាំ ត្រូវបានសម្តេចតេជោ ហ៊ុន សែន នាយករដ្ឋមន្ត្រីកម្ពុជា សម្រេចជ្រើសតាំងជារដ្ឋមន្ត្រីក្រសួងយុត្តិធម៌ ជំនួសលោក អង្គ វង្សវឌ្ឍនា ដែលកាន់នៅក្រសួងនេះរយៈពេល១៦ឆ្នាំ។ លោក កើត រិទ្ធ ត្រូវបានរដ្ឋសភាផ្តល់សេចក្តីទុកចិត្តនៅថ្ងៃទី៣០ ខែមីនា ឆ្នាំ២០២០។

លោក កើត រិទ្ធ បានក្លាយជារដ្ឋមន្ត្រីវ័យក្មេងមួយរូបទៀត បន្ទាប់ពីលោក សាយ សំអាល់ រដ្ឋមន្ត្រីក្រសួងបរិស្ថាន សម្រាប់រាជរដ្ឋាភិបាលកម្ពុជា។

លោក កើត រិទ្ធ អាយុ ៤១ឆ្នាំ កើតនៅថ្ងៃទី០២ ខែមករា ឆ្នាំ១៩៧៩ និងមានទីកំណើតនៅភូមិព្រៃទទឹង ស្រុកព្រៃឈរ ខេត្តកំពង់ចាម។ លោក គឺជានិស្សិតដែលតស៊ូព្យាយាមសិក្សា ទោះបីជាជីវភាពគ្រួសារមិនសូវធូរធារក្តី តែលោកនៅតែខិតខំជួយរបរគ្រួសារផង និងខំរៀនផង រហូតទទួលបានអាហាររូបករណ៍សិក្សាផ្នែកច្បាប់នៅប្រទេសបារាំងនៅឆ្នាំ ១៩៩៩។

ឆ្នាំ២០០០ លោកទទួលបានបរិញ្ញាបត្រនីតិឯកជនពីសាកលវិទ្យាល័យលីយ៉ុង២ ប្រទេសបារាំង។ ឆ្នាំ២០០១ លោកទទួលបានសញ្ញាបត្រ Maîtrise ផ្នែកច្បាប់ពីសាកលវិទ្យាល័យលីយ៉ុង២ ជាមួយនិទ្ទេសល្អណាស់។ ឆ្នាំ២០០២ ទទួលបានបរិញ្ញាបត្រជាន់ខ្ពស់ផ្នែកច្បាប់ព្រហ្មទណ្ឌ និងវិទ្យាសាស្រ្តនៃបទឧក្រិដ្ឋ នៅសាកលវិទ្យាល័យលីយ៉ុង៣ប្រទេសបារាំងផងដែរ។

លោក កើត រិទ្ធ បានសម្រេចចិត្តត្រឡប់មកប្រទេសកម្ពុជាវិញ ដោយជាដំបូងលោកបានធ្វើជាសាស្រ្តាចារ្យផ្នែកច្បាប់ នៅសាកលវិទ្យាល័យភូមិន្ទនីតិសាស្រ្ត និងវិទ្យសាស្រ្តសេដ្ឋកិច្ច ទាំងថ្នាក់ភាសាបារាំង និងភាសាខ្មែរ។

ចាប់តាំងពីឆ្នាំ២០០២ រហូតដល់ឆ្នាំ២០១៦ ដើម្បីចែករំលែកចំណេះដឹងដល់និស្សិតខ្មែរ និងមន្រ្តីរាជការ។ លោក កើត រិទ្ធ ជាស្ថាបនិកក្នុងការបង្កើតនូវក្រមព្រហ្មទណ្ឌ និងក្រមនីតិវិធីព្រហ្មទណ្ឌមួយរូបក្នុងចំណោមថ្នាក់ដឹកនាំផ្សេងទៀតផងដែរនៃក្រសួងយុត្តិធម៌។ នៅក្នុងអំឡុងពេលនោះ លោក កើត រិទ្ធ ក៏ជាបុគ្គលដែលបានចុះផ្សព្វផ្សាយច្បាប់ទាក់ទង នឹងក្រមព្រហ្មទណ្ឌ និងក្រមនីតិវិធីព្រហ្មទណ្ឌទៅដល់ចៅក្រម ព្រះរាជអាជ្ញា និងមន្រ្តីអនុវត្តច្បាប់ តាមបណ្តាខេត្តផងដែរ។

មានសមទ្ធិផលមួយចំនួនផងដែរ ដែល លោក កើត រិទ្ធ បានបន្សល់ទុកសម្រាប់បញ្ញវន្តជំនាន់ក្រោយ។ លោកបានចូលរួមក្នុងការធ្វើសៀវភៅច្បាប់ដែលមានដូចជា៖ សៀវភៅ សេចក្តីផ្តើមនៃច្បាប់កម្ពុជា បោះពុម្ពផ្សាយក្នុងឆ្នាំ២០០៣ និង២០០៥, សៀវភៅកំណត់ពន្យល់លើសេចក្តីព្រាងក្រមព្រហ្មទណ្ឌទាក់ទង លើវិភាគទានលើការសិក្សាច្បាប់ព្រហ្មទណ្ឌកម្ពុជា បោះពុម្ពឆ្នាំ២០០៥, អត្ថបទស្តីពីធាតុផ្សំនៃបទល្មើសរំលោភ និងការវិវត្តរបស់វានៅក្នុងច្បាប់ព្រហ្មទណ្ឌកម្ពុជា បោះពុម្ពឆ្នាំ២០០៦ ក្នុងព្រឹត្តបត្រនៃសាកលវិទ្យាល័យភូមិន្ទនីតិសាស្ត្រ និងវិទ្យសាស្ត្រសេដ្ឋកិច្ច និង សៀវភៅ នីតិកម្ពុជា បោះពុម្ពផ្សាយក្នុងឆ្នាំ២០១៦ ដើម្បីឲ្យនិស្សិត ក៏ដូចជាអ្នកសិក្សាផ្នែកច្បាប់ រឹតតែមានឯកសារសម្រាប់សិក្សាច្រើនផងដែរ។

ដោយមើលឃើញពីស្នាដៃ និងការខិតខំប្រឹងប្រែងរបស់លោក ជាពិសេសចំណេះដឹងផ្នែកច្បាប់ទូលំទូលាយ នៅថ្ងៃទី ២៧ ខែកញ្ញា ឆ្នាំ២០០៧ ព្រះករុណា ព្រះបាទសម្តេចព្រះបរមនាថ នរោត្តម សីហមុនី បានចេញព្រះរាជក្រឹត្យតែងតាំង លោក កើត រិទ្ធ ជាអនុរដ្ឋលេខាធិការក្រសួងយុត្តិធម៌ ដែលមានការស្នើសុំពីសម្តេចតេជោ ហ៊ុន សែន។ ថ្ងៃទី២៤ ខែកញ្ញា ឆ្នាំ២០១៣ ជារដ្ឋលេខាធិការក្រសួងយុត្តិធម៌ រហូតដល់ថ្ងៃ៣០ ខែមីនា ឆ្នាំ២០២០ ត្រូវបានសម្តេចតេជោ សម្រេចជ្រើសតាំងជារដ្ឋមន្រ្តីក្រសួងយុត្តិធម៌៕