(ភ្នំពេញ)៖ លោក ឯក សំអុល ប្រធានសមាគមមិត្តភាពកម្ពុជា-ចិន នៅថ្ងៃទី៣១ ខែមីនា ឆ្នាំ២០២០នេះ បានលើកឡើងថា ការមកដល់របស់ក្រុមវេជ្ជបណ្ឌិតចិន និងជំនួយសម្ភារ បរិក្ខារពេទ្យរបស់ចិន គឺសមតាមពាក្យស្លោកខ្មែរថា «ស្រឡាញ់គ្នាក្នុងគ្រាក្រ-ស្គាល់មិត្តល្អក្នុងគ្រាលំបាក» កម្ពុជា និងចិនរួមចិត្តគ្នាតែមួយ។
ការលើកឡើងបែបនេះ បានធ្វើឡើងក្នុងឱកាសដែល លោក ឯក សំអុល ផ្ដល់កិច្ចសម្ភាសន៍ជូនក្រុមអ្នកសារព័ត៌មាន នៅទីស្នាក់ការកណ្ដាលរបស់សមាគមមិត្តភាព កម្ពុជា-ចិន នារសៀលថ្ងៃទី៣១ ខែមីនា ឆ្នាំ២០២០នេះ។
តាងនាមសមាគមមិត្តភាពកម្ពុជា-ចិន លោកសូមស្វាគមន៍យ៉ាងកក់ក្តៅបំផុត ចំពោះក្រុមវេជ្ជបណ្ឌិតប្រទេសចិន មកបំពេញបេសកកម្មនៅកម្ពុជា ដើម្បីរួមជាមួយ វេជ្ជបណ្ឌិតកម្ពុជា ក្នុងភារកិច្ចប្រយុទ្ធប្រឆាំង ជាមួយមេរោគកូវីដ-១៩ ។ សកម្មភាពនេះបានឆ្លុះបញ្ចាំងនូវអត្ថន័យសំខាន់ ដូចតទៅ៖
១៖ មិត្តភាព និងសហប្រតិបត្តិការ កម្ពុជា-ចិន កសាងឡើងរវាងបេះដូង និងបេះដូង ហើយមានអាយុកាល៦២ឆ្នាំហើយ តាំងពីជំនាន់ព្រះករុណា ព្រះបរមរតនកោដ្ឋ នរោត្តម សីហនុ ជាមួយលោក ម៉ៅ សេទុង, លោក ជូ អេនឡាយ។
២៖ សហប្រតិបត្តិការ កម្ពុជា-ចិន បានក្លាយជាដៃគូយុទ្ធសាស្ត្រ គ្រប់ជ្រុងជ្រោយតាំងពីឆ្នាំ២០១០មក រយៈពេល១០ឆ្នាំចុងក្រោយនេះ ចិន បានឆ្លើយតប ទៅនឹង សំណូមពរ តម្រូវការរបស់កម្ពុជា ក្នុងការកសាង និងអភិវឌ្ឍន៍ប្រទេសជាតិ លើគ្រប់វិស័យ។ ចិន ជាប់ចំណាត់ថ្នាក់លេខមួយ ច្រើនវិស័យ ក្នុងការអភិវឌ្ឍន៍កម្ពុជា។
៣៖ គឺជាការឆ្លើយតប ទៅនឹងកិច្ចព្រមព្រៀង កម្ពុជា-ចិន ចុះហត្ថលេខានៅថ្ងៃទី២៨ ខែមេសា ឆ្នាំ២០១៩ នៅក្រុងប៉េកាំង ស្តីពី ការកសាងសហគមន៍ រួមវាសនាតែមួយ ជាការឆ្លើយតប ទៅនឹងគំនិតផ្តួចផ្តើម «ខ្សែក្រវ៉ាត់ ផ្លូវ» របស់ចិន។
៤៖ គឺជាការឆ្លើយតប ទៅនឹងទស្សនកិច្ចរបស់សម្តេចតេជោ ហ៊ុន សែន កាលពីថ្ងៃទី០៥ ខែកុម្ភៈ ឆ្នាំ២០២០ នៅទីក្រុងប៉េកាំង ក្នុងពេលដែលចិន កំពុងលំបាកបំផុត ក្នុងការប្រយុទ្ធប្រឆាំងមេរោគកូវីដ-១៩។ ពេលនោះ បណ្តាប្រទេសក្នុងតំបន់នៅអ៊ឺរ៉ុប អូស្ត្រាលី និងសហរដ្ឋអាមេរិក គេមើលស្រាល គេរើសអើងចិន។
ជាមួយគ្នានោះ លោក ឯក សំអុល បានគូសបញ្ជាក់ថា «យើងត្រូវដឹងថា ប្រទេសចិន ជាមហាអំណាចសេដ្ឋកិច្ចទីពីរ ក្នុងលោក។ ទន្ទឹមនឹងភារកិច្ចត្រូវបំពេញ ក្នុងប្រទេសចិន មានការទទួលខុសត្រូវធំធេង លើភារកិច្ចអន្តរជាតិ ក្នុងសម័យសកលភាវូបនីយកម្ម ជួយដល់បណ្តាប្រទេស ដើម្បីការអភិវឌ្ឍន៍ពិភពលោក និងដើម្បីជោគវាសនារបស់មនុស្សជាតិ។ មេរោគកូវីដ-១៩ ជាសត្រូវស្លាប់រស់ របស់មនុស្សជាតិ»។
លោកបានថ្លែងទៀតថា សមាគមមិត្តភាព កម្ពុជា-ចិន សូមវាយតម្លៃខ្ពស់ចំពោះកាយវិការដ៏ល្អប្រពៃ របស់ប្រទេសចិន ដែលបានសម្រេចជួយដល់ប្រទេសផ្សេងៗ ដែលកំពុង រងគ្រោះដោយ កូវីដ-១៩។ សព្វថ្ងៃនេះ គ្មានប្រទេសណាមួយ អាចរស់តែម្នាក់ឯងបានទេ។ ចិន បានជួយដល់ប្រទេសផ្សេងៗ មានអត្ថន័យថា ចិនជួយខ្លួនឯងផងដែរ។
ប្រធានសមាគមមិត្តភាព កម្ពុជា-ចិន បានបន្ថែមទៀតថា «ទន្ទឹមនេះ គឺជាការឆ្លុះបញ្ចាំងអំពីសមត្ថភាព គុណធម៌របស់ប្រទេសចិន ក្នុងឆ្នាំ២០២០។ ពីមុនមនុស្សគ្រប់ប្រទេសអភិវឌ្ឍន៍ សម្លឹងតែទៅលើអឺរ៉ុប និងសហរដ្ឋអាមេរិកទេ។ ប៉ុន្តែពេល នេះប្រែប្រួលហើយ គេត្រូវងាកមករកចិន។ អ្នកណាប្រឆាំងចិន គឺពិតជាល្ងង់ខ្លៅបំផុត»។
គូសបញ្ជាក់ថា ក្រុមគ្រូពេទ្យជំនាញរបស់ចិន ចំនួន៧នាក់ ដែលមានបទពិសោធខ្ពស់ ក្នុងការព្យាបាលកូវីដ១៩ បានមកដល់ប្រទេសកម្ពុជា នាព្រឹកថ្ងៃទី២៣ ខែមីនា ឆ្នាំ២០២០ ដើម្បីចែករំលែកបទពិសោធន៍ ក្នុងការព្យាបាលជំងឺកូវីដ១៩ នៅក្នុងប្រទេសកម្ពុជា។
ក្រុមគ្រូពេទ្យចិន ដែលមកកម្ពុជានេះ មិនមែនមកតែមនុស្សនោះទេ ពួកគេព្រមទាំងបាននាំមកនូវសម្ភារៈបរិក្ខាពេទ្យមកជាមួយផងដែរ ហើយអ្វីដែលពិសេសជាងនេះ ទៅទៀត គឺនៅគ្រប់សម្ភារៈបរិក្ខាពេទ្យចិនទាំងអស់ បានបំពាក់ដោយទង់ជាតិកម្ពុជា-ចិន ជាមួយនឹងពាក្យស្លោកថា «ស្រឡាញ់គ្នាក្នុងគ្រាក្រ-ស្គាល់មិត្តល្អក្នុងគ្រាលំបាក»៕
