(ភ្នំពេញ)៖ នៅថ្ងៃទី២ ខែមករា ឆ្នាំ២០១៦ម្សិលមិញនេះ មានគ្រោះថ្នាក់ចរាចរណ៍ នៅទូទាំងប្រទេសចំនួន៨លើក (យប់០៥លើក) បណ្តាលឲ្យមនុស្សស្លាប់៥នាក់ របួសធ្ងន់៦នាក់ និងរបួសស្រាល៣នាក់ និងមិនពាក់មួកពេលគ្រោះថ្នាក់ មាន១០នាក់ (យប់០៨នាក់) នេះបើតាមរបាយការណ៍ គ្រោះថ្នាក់ចរាចរណ៍ របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការនគរបាលជាតិ។
ប្រភពព័ត៌មានដដែលឲ្យដឹងទៀតថា ក្នុងគ្រោះថ្នាក់ចរាចរណ៍ទាំង៨លើកនេះ បានបង្កឲ្យខូចខាតយានយន្ត សរុប១៧គ្រឿង ក្នុងនោះមានម៉ូតូចំនួន៨គ្រឿង រថយន្តធុនតូច០៥គ្រឿង រថយន្តធុនធំ៤គ្រឿង ហើយមូលហេតុដែលបណ្តាលឲ្យ មានគ្រោះថ្នាក់រួមមាន៖ ល្មើសល្បឿន០៤លើក មិនប្រកាន់ស្តាំ២លើក និងមិនគោរពសិទ្ធិ១លើក។
សូមជម្រាបថា នៅថ្ងៃទី០២ នៃការអនុវត្តច្បាប់ចរាចរណ៍ផ្លូវគោកថ្មី ក៏ដូចជាប្រតិបត្តិការរឹតបន្តឹងខ្លាំងទៅលើការធ្វើ ចរាចរណ៍របស់ប្រជាពលរដ្ឋលើដងវិថីនោះ កម្លាំងនគរបាល បានរកឃើញយានយន្ត ល្មើសច្បាប់ចរាចរណ៍ប្រមាណ ៧.៩៦៣គ្រឿង ។ យានយន្តល្មើសច្បាប់ភាគច្រើនលើសលុប ជាម៉ូតូគ្មានស្លាកលេខ។ ក្នុងនោះយានយន្ត ៤២៦០គ្រឿង ក្រោយពិន័យ និង អប់រំ ក៏ត្រូវបានប្រគល់ជូន ម្ចាស់វិញ ដោយឡែកយានយន្ត ១៤៩គ្រឿង ត្រូវបានយកទៅរក្សាទុក។
យោងតាមរបាយការណ៍របស់ នាយកដ្ឋាននគរបាលចរាចរណ៍ និង សណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានឲ្យដឹងថា យានយាន្ត ដែលល្មើសច្បាប់នេះ មានរថយន្ត ៣.៨៣៦គ្រឿង ម៉ូតូ ៤.១២៧គ្រឿង។ ការផាកពិន័យលើយានយន្ត ល្មើសច្បាប់ចរាចរណ៍ បានចំនួនរហូតដល់ជាង ៧៦លានរៀល។ ផាកពិន័យពីរថយន្ត បានជាង ៤០លានរៀល និងផាកពិន័យពីម៉ូតូ បានជាង ៣៥លានរៀល៕
