(ត្បូងឃ្មុំ)៖ នៅថ្ងៃទី១៧ ខែមីនា ឆ្នាំ២០២០នេះ សាខាកាកបាទក្រហមកម្ពុជាខេត្តត្បូងឃ្មុំ បានចុះសួរសុខទុក្ខ និងនាំអំណោយមនុស្សចែកជូន ដល់បងប្អូនប្រជាពលរដ្ឋរងគ្រោះ និងងាយរងគ្រោះចំនួន ១៤គ្រួសារ នៅស្រុកក្រូចឆ្មារ ខេត្តត្បូងឃ្មុំ។
ការចុះសួរសុខទុក្ខ និងចែកអំណោយនេះដឹកនាំដោយលោក ហាក់ សុខមករា អភិបាលរងខេត្តត្បូងឃ្មុំ និងជាអនុប្រធានអចិន្ត្រៃយ៍គណ:កម្មាធិការសាខាកាកបាទក្រហមកម្ពុជាខេត្ត ហើយគ្រួសាររងគ្រោះ និងងាយរងគ្រោះទាំង ១៤គ្រួសារ ដែលទទួលបានអំណោយនៅពេលនេះរួមមាន៖
*ទី១៖ គ្រួសារ រងគ្រោះដោយអគ្គិភ័យបណ្តាលឱ្យឆេះផ្ទះ ១ខ្នង ឈ្មោះ សា សាលី នៅភូមិជំនីក ឃុំជំនីក ត្រូវខូចខាតទាំងស្រុង
*ទី២៖ បងប្អូនប្រជាពលរដ្ឋងាយរងគ្រោះ នៅឃុំព្រែកអាជី ៦គ្រួសារ នៅឃុំកំពង់ទ្រាស ៥គ្រួសារ និងរងគ្រោះដោយគ្រោះថ្នាក់ចរាចរណ៍ ២គ្រួសារផង។
នៅក្នុងឱកាសជួបសំណេះសំណាលជាមួយបងប្អូនរងគ្រោះ នៅទីតាំង ៣កន្លែងផ្សេងៗគ្នា លោក ហាក់ សុខមករា បានសម្តែងការសោកស្តាយចំពោះគ្រោះអគ្គិភ័យ ដែលបានបំផ្លាញលំនៅដ្ឋាន របស់បងប្អូន ក៏ដូចជាសំដែងនូវការអាណិតអាសូរ ចំពោះបងប្អូនងាយរងគ្រោះទាំង១៣គ្រួសារ ផ្សេងទៀត ដែលបានជួបទុក្ខលំបាកក្នុងជីវភាពរស់នៅប្រចាំថ្ងៃ។
លោក ហាក់ សុខមករា ក៏បានពាំនាំនូវការផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលលោកតែងតែគិតគូរពីសុខទុក្ខ និងការលំបាករបស់បងប្អូនគ្រប់ពេលវេលា និងតែងបានដាស់តឿនឱ្យមន្ត្រីក្រោមឱវាទ ត្រូវយកចិត្តទុកដាក់ ចុះជួបសួរសុខទុក្ខការលំបាក និងជួយដោះស្រាយរាល់បញ្ហាលំបាកក្នុងពេលបងប្អូន ជួបគ្រោះអគ្គីភ័យ ក៏ដូចជាងាយរងគ្រោះដោយហន្តរាយ និងឧបទ្ទវហេតុផ្សេងៗ ផងដែរ។
អំណោយដែលបានផ្តល់ជូនបងប្អូន ទាំង១៤គ្រួសាររួមមានក្នុង ១គ្រួសារៗ ទទួលបានរួមមាន៖
*អង្ករ ២៥គីឡូក្រាម, ត្រីខ១០ កំប៉ុង, ទឹកត្រី ០១យួរ, ទឹកស៊ីអ៊ីវ ០១យួរ, មីសាច់មាន់ ០១កេះ, ប្រេងឆារ ០១ដប និងថវិកា ៥០,០០០រៀល។ ដោយឡែក គ្រួសារគ្រោះដោយអគ្គីភ័យឆេះផ្ទះ ត្រូវបានផ្តល់អង្ករ ៥០គីឡូក្រាម ក្រណាត់តង់ ១ផ្ទាំង ថវិកា ៤០,០០០រៀល និងសម្ភាររបស់ព្រះគ្រូ ចៅអធិការវត្តជំនីក មានអង្ករ ៥០ គីឡូក្រាម បច្ច័យ ១០ម៉ឺនរៀល និងសម្ភារផ្ទះបាយមួយចំនួនទៀតផងដែរ៕
