(សៀមរាប)៖ ពាក់ព័ន្ធនឹងករណីបញ្ហាអតីតកម្មករចំនួន ១២៦នាក់ បម្រើការងារក្នុងគម្រោងការដ្ឋានអន្តរជាតិនៃប្រាសាទមេបុណ្យខាងលិច ដឹកនាំដោយសាលាបារាំងចុងបូព៌ារ (EFEO) នៃប្រទេសបារាំង អាជ្ញាធរជាតិអប្សរាបានបញ្ជាក់ជូនសាធារណជនទាំងអស់ថា តាមរយៈកិច្ចព្រមព្រៀងហិរញ្ញប្បទានរវាងរដ្ឋាភិបាលបារាំង និងរាជរដ្ឋាភិបាលកម្ពុជាចំនួន ២ សម្រាប់រយៈពេល៦ឆ្នាំ (ឆ្នាំ២០១២-ឆ្នាំ២០១៨) ការដ្ឋានអន្តរជាតិជួសជុលប្រាសាទមេបុណ្យខាងលិច ត្រូវបានស្ថិតក្រោមការគ្រប់គ្រងផ្នែកហិរញ្ញវត្ថុ រដ្ឋបាល និងបច្ចេកទេសទាំងស្រុង ពីសាលាបារាំងចុងបូព៌ារ នៃប្រទេសបារាំង ពោលការគ្រប់គ្រង និងប្រើប្រាស់ហិរញ្ញប្បទានទាំងអស់ ដែលបានមកពីប្រទេសបារាំង និងប្រាក់បដិភាគរបស់រាជរដ្ឋាភិបាលកម្ពុជា គឺស្ថិតក្រោមទំនួលខុសត្រូវទាំងអស់ របស់សាលាបារាំងចុងបូព៌ារ ក្នុងនោះត្រូវបានប្រើប្រាស់ដូចជា សម្រាប់ចំណាយលើការទិញសម្ភារ ឧបករណ៍នានាបំរើការឱ្យគម្រោង និងប្រាក់បៀវត្សកម្មករចំនួន ១២៦នាក់ ដែលបារាំងជ្រើសរើស និងចុះកិច្ចសន្យាដោយផ្ទាល់ ព្រមទាំងមន្រ្តីបរទេសនានា។

ដោយឡែក អាជ្ញាធរជាតិអប្សរាគ្រាន់តែទទួលបន្ទុកសម្របសម្រួលដោះស្រាយគោលនយោបាយផ្នែកបញ្ហាកម្មសិទ្ធិសំណង់ និងដីធ្លី ដែលអាចរងផលប៉ះពាល់ និងបង្ករភាពងាយស្រួលក្នុងការបំពេញការងារជូនមន្រ្តីបច្ចេកទេស និងអ្នកជំនាញបរទេស ក៏ដូចជាចូលរួមពិនិត្យការដ្ឋានប៉ុណ្ណោះ។

អាជ្ញាធរជាតិអប្សរា បានបន្តថា នៅក្នុងដំណើរការគ្រប់គ្រងកម្មករការដ្ឋានប្រាសាទមេបុណ្យខាងលិច សាលាបារាំងចុងបូព៌ាបានចុះអនុសញ្ញារួមមួយជាមួយសហព័ន្ធសហជីពកម្មករសំណង់ និងព្រៃឈើអន្តរជាតិ នៅឆ្នាំ២០១៣ ដើម្បីការពារសិទ្ធិកម្មករ ស្របតាមច្បាប់ការងារនៃវិស័យឯកជន ដោយពុំបានផ្តល់ដំណឹងជាផ្លូវការមកអាជ្ញាធរជាតិអប្សរាឡើយ។

បន្ទាប់ពីនេះទៀត នៅដើមឆ្នាំ២០១៨ សាលាបារាំងចុងបូព៌ា បានជូនដំណឹងទៅសហជីពកម្មករមេបុណ្យអំពីការសម្រេចចិត្តបញ្ឈប់គម្រោងជួសជុលដោយមូលហេតុវិបត្តិហិរញ្ញវត្ថុរបស់ក្រសួងកិច្ចការអឺរ៉ុប និងការបរទេសបារាំង។

តាមរយៈនេះ ស្ថានទូតបារាំងបានប្រគល់ទាំងស្រុងនូវសម្ភារៈ ឧករណ៍ និងទំនួលខុសត្រូវនៃការដ្ឋានមេបុណ្យខាងលិចជូនអាជ្ញាធរជាតិអប្សរា នៅថ្ងៃទី០៣ ខែឧសភា ឆ្នាំ២០១៨។

ក្រោយពីទទួលបានការផ្ទេរ ក្រុមការងាររដ្ឋបាល និងនាយកដ្ឋានជំនាញអាជ្ញាធរជាតិអប្សរា បានចុះទៅជួបផ្ទាល់នៅការដ្ឋានជាមួយតំណាង EFEO តំណាងសហជីព និងកម្មករទាំងអស់ ដើម្បីស្វែងរកដំណោះស្រាយ ដោយស្នើការស្ម័គ្រចិត្តចូលបំពេញការងារវិញ និងក្រោយពីមានការពន្យល់ពីគោលការណ៍គ្រប់គ្រងថ្មីស្របទៅតាមច្បាប់មុខងារសាធារណៈ និងគ្រឹះស្ថានសាធារណៈរដ្ឋ ក៏ដូចជាប្រាក់បៀវត្ស និងអត្ថប្រយោជន៍នានាដែលទទួលបាន។

ឆ្លើយតបនឹងការស្នើសុំរបស់អាជ្ញាធរជាតិអប្សរា សហជីព និងកម្មករទាំង ១២៦នាក់ បានសម្រេចបដិសេធមិនចូលបំរើការងារជូនអាជ្ញាធរជាតិអប្សរា ដោយមូលហេតុប្រាក់ខែតិចជាង និងមិនមានអត្ថប្រយោជន៍ដូចច្បាប់ការងារវិស័យឯកជន ហើយសម្រេចចិត្តស្វែងរកការងារខាងក្រៅវិញ។

តាមរយៈនេះ ដោយមិនអាចទុកការដ្ឋានជួសជុលមិនដំណើរការ អាជ្ញាធរជាតិអប្សរា បានសម្រេចជ្រើសរើសពលករសប្តាហ៍ចំនួន ១១២នាក់ បំពេញការងារជួសជុលជាថ្មី ដោយប្រើប្រាស់កញ្ចប់ថវិកាជាតិ និងក្រោមការគ្រប់គ្រងទាំងស្រុងរបស់អាជ្ញាធរជាតិអប្សរា ពោលគឺមិនទាក់ទងនឹងសាលាបារាំងចុងបូព៌ាទៀតទេ។

ប៉ុន្តែ ក្រោយមកទៀតសហព័ន្ធសហជីពកម្មករសំណង់ និងព្រៃឈើអន្តរជាតិ ក៏ដូចជាសាខាសហព័ន្ធសហជីពនៅកម្ពុជា បានបង្ហាញភាពមិនសុខចិត្តរបស់ខ្លួន ហើយបានផ្ញើការតវ៉ាទៅគ្រប់ភាគីពាក់ព័ន្ធ ដោយបញ្ជាក់នូវមូលហេតុដដែលៗ ដូចជាអាជ្ញាធរជាតិអប្សរាបានបំពានសិទ្ធិកម្មករ និងសិទ្ធិសហជីព ជ្រើសរើសកម្មករគ្មានជំនាញ និងពាក់កណ្តាលជំនាញ កម្ពុជាត្រូវបានគេដកសិទ្ធិអនុគ្រោះ ២០% ដោយសារការរំលោភសិទ្ធិនេះ ហើយស្នើសុំផ្តល់ការងារជូនកម្មករទាំង ១២៦នាក់វិញ ដោយផ្តល់អត្ថប្រយោជន៍មិនតិចជាងអនុសញ្ញារួមដើមចុះជាមួយ EFEO ទទួលបានសិទ្ធិបង្កើតសហជីព និងសំណងសមរម្យសម្រាប់រយៈពេលខកខានបំពេញការងារជាដើម ដែលមូលហេតុទាំងអស់នេះ សុទ្ធតែមិនអាចទទួលយកបាន ក្នុងនាមជាស្ថាប័នសាធារណៈរបស់រដ្ឋ ដែលគ្រប់គ្រងដោយច្បាប់រដ្ឋ និងមិនស្ថិតក្រោមច្បាប់ការងារ នៃវិស័យឯកជន។

អាជ្ញាធរជាតិអប្សរា ក៏ធ្លាប់បានអញ្ជើញសហព័ន្ធសហជីពសាខាកម្ពុជាមកពន្យល់ម្តងមកហើយ កាលពីថ្ងៃទី០៦ ខែកញ្ញា ឆ្នាំ២០១៩ ហើយបញ្ជាក់ថា ករណីនេះ គឺជាបញ្ហារវាងសហព័ន្ធសហជីព និងសាលាបារាំងចុងបូព៌ាប៉ុណ្ណោះ (ប៉ុន្តែជាក់ស្តែង EFEO បានបើកផ្តល់នូវប្រាក់សំណងជូនកម្មករអស់ហើយ ក្រោយពីសម្រេចបញ្ចប់ការងារខ្លួនក្រោមមូលហេតុហិរញ្ញវត្ថុដូចមានជម្រាបជូនខាងលើ) ប៉ុន្តែសហព័ន្ធសហជីពនៅតែមិនព្រមយល់ ហើយថ្មីៗនេះ បានផ្ញើលិខិតមួយច្បាប់ជូនរដ្ឋបាលខេត្តសៀមរាប ស្នើសុំសិទ្ធិជួបជុំគ្នារហូតដល់មានដំណោះស្រាយផងដែរ៕