(បាត់ដំបង)៖ ក្នុងដំណើរអញ្ជើញជាអធិបតីបើកពិធីបុណ្យទន្លេលើកទី៦ នៅលើទឹកដីខេត្តបាត់ដំបង នៅព្រឹកថ្ងៃសៅរ៍ ទី១៤ ខែមីនា ឆ្នាំ២០២០នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា អញ្ជើញចូលជួបសំណេះសំណាល និងផ្តល់អនុសាសន៍ការងារ ជូនដល់មន្ត្រីរាជការក្នុងខេត្តប្រមាណជា ២,៣០០នាក់។

លោក ងួន រតនៈ អភិបាលខេត្តបាត់ដំបង បានប្រាប់ Fresh News នៅថ្ងៃទី១៣ ខែមីនា ឆ្នាំ២០២០ថា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ប្រធានក្រុមការងារថ្នាក់ជាតិចុះជួយខេត្តបាត់ដំបង សមាជិក សមាជិកាក្រុមការងារ ព្រមទាំងមន្ត្រីជាន់ខ្ពស់មន្ត្រីរាជរដ្ឋាភិបាលមួយចំនួនទៀត ក៏អញ្ជើញចូលរួមក្នុងកិច្ចសំណេះសំណាលនេះផងដែរ។

ក្រៅពីនោះមន្ត្រីរាជការក្នុងខេត្ត សមាជិកក្រុមប្រឹក្សាខេត្ត សមាជិកក្រុមប្រឹក្សាក្រុង-ស្រុកទាំង១៤ សមាជិកក្រុមប្រឹក្សាឃុំ-សង្កាត់ទាំង១០២ ព្រមទាំងនាយកសាលាបឋមសិក្សានៅទូទាំងខេត្ត ក៏ត្រូវបានអញ្ជើញចូលរួម ក្នុងកិច្ចសំណេះសំណាលដ៏កម្រនេះផងដែរ។

បើតាមលោកអភិបាលខេត្តបាត់ដំបង ប្រធានបទនៃកិច្ចសំណេះសំណាលមិនទាន់ដឹងនៅឡើយនោះទេ។ តែទោះជាយ៉ាងណាលោកអភិបាលខេត្ត បានបង្ហាញក្តីរីករាយ ដែលមន្ត្រីរាជការនៅទូទាំងខេត្តទទួលបានការផ្តល់កិត្តិយសដ៏ឧត្តុងឧត្តម ពីសម្តេចតេជោនាយករដ្ឋមន្ត្រី ផ្តល់កិច្ចសំណេះសំណាល និងឱវាទផ្សេងៗដោយផ្ទាល់។

លោក ងួន រតនៈ បានបន្ថែមថា ឱវាទ និងដំបូន្មានទាំងឡាយរបស់សម្តេចតេជោប្រមុខរាជរដ្ឋាភិបាលនៅក្នុងជំនួប នឹងបានជាគតិបន្ថែមទៀត ដល់មន្ត្រីរាជការក្នុងខេត្តបំពេញការងារឱ្យកាន់តែមានប្រសិទ្ធភាពខ្ពស់ ក្នុងការអភិវឌ្ឍខេត្ត ក៏ដូចជាផ្តល់សេវាជូនប្រជាពលរដ្ឋ។

សូមបញ្ជាក់ថា នៅថ្ងៃនេះ ក្រៅពីការជួបសំណេះសំណាលជាមួយមន្ត្រីរាជការ នៅពេលព្រឹកហើយនោះ នៅពេលរសៀលសម្តេចតេជោ ហ៊ុន សែន នឹងអញ្ជើញជាអធិបតីបើកពិធីបុណ្យទន្លេលើកទី៦។ ខេត្តបាត់ដំបង ជាទឹកដីមានអំណោយផលខ្ពស់លើដំណាំកសិកម្ម ហើយត្រូវបានគេប្រសិទ្ធនាមជាខេត្តជង្រុកស្រូវ នៅភាគពាយព្យនៃប្រទេសកម្ពុជាផងដែរ។

បាត់ដំបង ជាខេត្តមានវប្បធម៌ដ៏ចំណាស់មួយ ហើយក៏ជាខេត្តមានប្រវត្តិរឿងរ៉ាវយ៉ាងវែងអន្លាយមានទាំងឈឺចាប់ និងរីករាយ។ ខេត្តនេះ ក៏ជាខេត្តដែលរងគ្រោះពីវិបត្តិនៃភ្លើងសង្គ្រាមផងដែរ។ ដែនដីមួយភាគធំនៃខេត្តនេះ ទើបនឹងត្រូវបានបញ្ចប់ភ្លើងសង្គ្រាមពេញលេញនាចុងឆ្នាំ១៩៩៨ប៉ុណ្ណោះ ក្រោមនយោបាយឈ្នះ-ឈ្នះ របស់សម្តេចតេជោ ហ៊ុន សែន។

មនុញ្ញផលកើតចេញពីសុខសន្តិភាព កំពុងធ្វើឱ្យខេត្តបាត់ដំបង ទទួលបានឱកាសអភិវឌ្ឍន៍ និងមានរីកចម្រើនគួរកត់សម្គាល់ផងដែរ។ ព្រោះតែមើលឃើញពីគុណតម្លៃនៃសុខសន្តិភាពនាំឱ្យមានការអភិវឌ្ឍនៅក្នុងខេត្តមួយនេះហើយ ទើបពិធីបុណ្យទន្លេនៅក្នុងខេត្តបាត់ដំបងត្រូវបានប្រារព្ធឡើង ក្រោមប្រធានបទ «ទន្លេនៃសន្តិភាព ទន្លេនៃវិបុលភាព»។ ប្រធានបទនេះ គឺចង់បង្ហាញឱ្យឃើញថា មានសន្តិភាព ទើបនាំទៅដល់វិបុលភាព៕