(កំពង់ចាម)៖ លោក អ៊ុន ចាន់ដា អភិបាលខេត្តកំពង់ចាម បានថ្លែងប្រាប់បណ្តាញព័ត៌មាន Fresh News ថា ស្រ្តីជនជាតិអង់គ្លេស អាយុ៦៥ឆ្នាំ ដែលរកឃើញមានឆ្លងជំងឺ Covid-19 ត្រូវបានដឹកបញ្ជូនមកព្យាបាលនៅមន្ទីរពេទ្យឯកជនមួយក្នុងរាជធានីភ្នំពេញ នារសៀលថ្ងៃទី១១ ខែមីនា ឆ្នាំ២០២០នេះ។

លោក អ៊ុន ចាន់ដា បានបញ្ជាក់ថា «ពាក់ព័ន្ធស្រ្តីជនជាតិអង់គ្លេសផ្ទុកវីរុសកូវីដ១៩ នៅរសៀលថ្ងៃនេះខាងក្រសួងសុខាភិបាល និងអង្គការសុខភាពពិភពលោក (WHO) បានសម្រេចផ្ទេរគាត់ពីកំពង់ចាមទៅភ្នំពេញ ដោយរៀបចំទុកដាក់គាត់ នៅមន្ទីរពេទ្យឯកជនមួយដែលមានលក្ខណៈទំនើប អាចជួយសម្រួល និងព្យាបាលថែទាំគាត់បាន។ ការផ្ទេរនេះតាមយោបល់របស់សាម៉ីខ្លួន និងការពិនិត្យមើលស្ថានភាពលំបាករបស់គាត់ផង មានវ័យចាស់ គាត់មានភាពពិការនៅជើងរបស់គាត់ ពិបាកទៅបន្ទប់ទឹក ដោយសារបញ្ហានេះហើយ ខាងក្រសួងសុខាភិបាល និងអង្គភាពសុខភាពពិលោក ដោយមានការសម្របសម្រួលពីស្ថានទូតអង់គ្លេស ប្រចាំនៅកម្ពុជា គឺយើងបានបញ្ជូនគាត់តាមរថយន្តសង្គ្រោះបន្ទាន់ទៅភ្នំពេញហើយ»។

សូមបញ្ជាក់ថា រដ្ឋមន្ត្រីក្រសួងសុខាភិបាល លោកសាស្ត្រាចារ្យ ម៉ម ប៊ុនហេង នៅព្រឹកថ្ងៃទី១១ ខែមីនា ឆ្នាំ២០២០នេះ បានអញ្ជើញចុះទៅពិនិត្យដោយផ្ទាល់ ទៅលើស្ថានភាពសុខភាព លើស្ត្រីជនជាតិអង់គ្លេសម្នាក់ អាយុ៦៥ឆ្នាំ ដែលបានរកឃើញមានផ្ទុកវីរុស Covid-19 កាលពីល្ងាចម្សិលមិញ ហើយកំពុងសម្រាកព្យាបាលមន្ទីរពេទ្យ នៅខេត្តកំពង់ចាម។

សូមជម្រាបថា នៅរសៀលម៉ោង១៦៖៣០នាទីនៃថ្ងៃទី១០ ខែមីនា ឆ្នាំ២០២០ លទ្ធផលពីវិទ្យាស្ថានប៉ាស្ទ័រកម្ពុជា បានបញ្ជាក់ថា ស្រ្តីជនជាតិអង់គ្លេសម្នាក់ អាយុ៦៥ឆ្នាំ មានវិជ្ជមានវីរុសកូវីដ១៩។

ស្ត្រីមានវីរុស Covid-19 នេះ បានធ្វើដំណើរតាមយន្តហោះ ចេញពីទីក្រុងឡុងនៃប្រទេសអង់គ្លេស មកដល់ទីក្រុងហាណូយ ប្រទេសវៀតណាម នៅថ្ងៃទី០២ ខែមីនា ឆ្នាំ២០២០ ដែលមានគ្នា៥នាក់ (ជនជាតិអង់គ្លេសទាំងអស់ ធ្វើតេស្តអវិជ្ជមានចំនួន៤នាក់)។ បន្ទាប់មកពួកគាត់បានបន្តដំណើរចាកចេញតាមនាវាខាលើ ពីទីក្រុងហូជីមិញសំដៅមករាជធានីភ្នំពេញ នៅថ្ងៃទី០៥ ខែមីនា ឆ្នាំ២០២០ និងបានដល់រាជធានីភ្នំពេញ នៅថ្ងៃទី០៧ ខែមីនា ឆ្នាំ២០២០។

នៅថ្ងៃដដែលមុននឹងមកដល់រាជធានីភ្នំពេញ អ្នកទទួលខុសត្រូវអ្នកទេសចរនៃនាវានេះ បានទទួលដំណឹងថា យន្តហោះដែលស្ត្រីជនជាតិអង់គ្លេសបានជិះ នៅថ្ងៃទី០២ មីនា ឆ្នាំ២០២០នោះ មានជនជាតិវៀតណាមម្នាក់ ដែលអង្គុយជិតស្ត្រីជនជាតិអង់គ្លេសអាយុ ៦៥ឆ្នាំខាងលើនេះ ត្រូវបានរកឃើញវិជ្ជមានវីរុស Covid-19 នៅទីក្រុងហាណូយ ប្រទេសវៀតណាម។

ពេលមកដល់រាជធានីភ្នំពេញ នៅថ្ងៃទី០៧ ខែមីនា ឆ្នាំ២០២០ ជនជាតិអង់គ្លេសទាំង៥រូប ត្រូវបានបញ្ជូនទៅពិនិត្យសុខភាពនៅមន្ទីរពេទ្យមិត្តភាពខ្មែរ សូវៀត ហើយបានយកសំណាកវត្ថុវិភាគចំនួន៣នាក់ (ដោយ២នាក់ ប្រកែកមិនព្រមឲ្យយកជាដាច់ខាត ដោយគាត់សំអាងថា មិនមានបញ្ហាសុខភាព ឬរោគសញ្ញាអ្វីទាំងអស់»។ ជាលទ្ធផលអ្នកទាំង៣នាក់នេះ មានអវិជ្ជមានវីរុស Covid-19។ បន្ទាប់មកនាវាបានបន្តដំណើរទៅកាន់ខេត្តកំពង់ចាម។

ដើម្បីឲ្យមានភាពច្បាស់លាស់ មន្ទីរពេទ្យមិត្តភាពខ្មែរ-សូវៀត បានផ្តល់ព័ត៌មាន ទៅកាន់មន្ទីរសុខាភិបាលខេត្តកំពង់ចាម ដើម្បីឲ្យរង់ចាំយកវត្ថុសំណាកទាំង២នាក់ ដែលមិនទាន់ធ្វើតេស្តនោះ ដោយមានការសម្របសម្រួលពីអ្នកគ្រប់គ្រងនាវា នៅពេលចូលចតនៅចំណតនៃខេត្តកំពង់ចាម ហើយត្រូវបានក្រុមគ្រូពេទ្យពិនិត្យ និងបញ្ជូនសំណាកវត្ថុវិភាគមក វិទ្យាស្ថានប៉ាស្ទ័រកម្ពុជា នៅថ្ងៃទី០៩ ខែមីនា ឆ្នាំ២០២០។ នៅថ្ងៃទី១០ ខែមីនា ឆ្នាំ២០២០ វេលាម៉ោង៤៖៣០នាទីរសៀល ក៏ទទួលបានលទ្ធផលវិជ្ជមាន Covid-19 លើស្ត្រីជនជាតិអង់គ្លេសអាយុ៦៥ឆ្នាំ។

ក្រសួងសុខាភិបាល និងមន្ទីរសុខាភិបាលខេត្តកំពង់ចាម រួមសហការជាមួយអាជ្ញាធរខេត្ត កំពុងតែយកចិត្តទុកដាក់ក្នុងពិនិត្យស្រាវជ្រាវ និងយកវត្ថុសំណាក ពីអ្នកដែលបានប៉ះពាល់ផ្ទាល់ ឬប្រយោលនៅលើនាវាទាំងអស់ មកវិភាគនៅមន្ទីរពិសោធន៍ នៃវិទ្យាស្ថានប៉ាស្ទ័រកម្ពុជា៕