(ភ្នំពេញ)៖ «សមាជប្រជាជន» ជាកម្មវិធីមួយបានបង្កើតឡើងក្នុងសម័យសង្គមរាស្ត្រនិយម ដើម្បីជាការជួបជុំដោយផ្ទាល់រវាងព្រះមហាវីរក្សត្រខ្មែរ សម្តេចព្រះបរមរតនកោដ្ឋ នរោត្តម សីហនុ និងប្រជាពលរដ្ឋ ដើម្បីបានស្តាប់រាល់បញ្ហារបស់ប្រជាពលរដ្ឋ និងដាក់ចេញនូវវិធានការដោះស្រាយ។ បច្ចុប្បន្នគេមិនសូវជាបានឃើញការប្រើយន្តការជួបដោយផ្ទាល់រវាងមន្ត្រី និងប្រជាពលរដ្ឋ ដើម្បីស្តាប់ និងដោះស្រាយបញ្ហាបែបនេះឡើយ។
គេប្រហែលនឹងមានការភ្ញាក់ផ្អើលប្រសិនបានចូលទៅកាន់សាលាខេត្តពោធិ៍សាត់នៅរៀងរាល់ថ្ងៃចន្ទ នៃដើមសប្តាហ៍នីមួយៗ ព្រោះក្នុងសាលប្រជុំដ៏ធំក្នុង សាលាខេត្តនេះ គេនឹងឃើញមានប្រជាពលរដ្ឋជាច្រើននាក់អង្គុយត្រៀបត្រាលើកៅអីទល់មុខជាមួយអភិបាលខេត្តពោធិ៍សាត់ គឺលោក ម៉ៅ ធនិន អមដោយមន្ត្រីមួយចំនួនទៀត។ ប្រជាពលរដ្ឋទាំងនោះ បានស្កាត់មកពីគ្រប់ទិសទីក្នុងខេត្តពោធិ៍សាត់ ដើម្បីស្វែងរកដំណោះស្រាយដោយផ្ទាល់ពី លោកអភិបាលខេត្តលើបញ្ហាផ្សេងៗគ្នាពាក់ព័ន្ធជីវិតប្រចាំថ្ងៃរបស់ពួកគាត់។
លោក ម៉ៅ ធនិន បានចាត់ទុកការជួបស្តាប់ និងដោះស្រាយបញ្ហាដោយផ្ទាល់ជាមួយប្រជាពលរដ្ឋ គឺជាការបន្សាំ និងដាក់បញ្ចូលខ្លួនទៅក្នុងសុខទុក្ខ របស់ប្រជាពលរដ្ឋនៅក្នុងខេត្តរបស់លោក។
លោកអភិបាលខេត្ត បានបញ្ជាក់ដូច្នេះ «គឺជាការងារប្រចាំថ្ងៃរបស់ខ្ញុំនៅក្នុងម៉ោងពេលការងាររដ្ឋបាលជាទូទៅដែលខ្ញុំបានធ្វើកន្លងមកហើយ។ ខ្ញុំមកដឹកនាំខេត្តនេះបានរយៈពេល៥ឆ្នាំហើយ យន្តការនេះខ្ញុំគិតថា យើងបានបន្សាំ និងបញ្ចូលខ្លួនជាមួយសុខទុក្ខរបស់ពុកម៉ែបងប្អូន ប្រជាពលរដ្ឋរបស់យើងដោយយើងប្រើប្រាស់យន្តការពីរ៖ ទី១. យើងមានតួនាទីជាថ្នាក់ដឹកនាំខេត្ត គឺបានន័យថា យើងជាអ្នកអនុវត្តន៍ទៅលើផ្លូវច្បាប់ ជាអ្នកផ្តល់សេវាផ្សេងៗជាមួយពុកម៉ែរបស់យើង។ ប៉ុន្តែមួយទៀត យើងក៏ត្រូវបន្សាំខ្លួនក្នុងនាមយើងជាសមាជិកគ្រួសារពួកគាត់គ្រប់គ្នាទាំងអស់ដែរ។ ក្នុងឋានៈជាកូន ក្នុងឋានៈជាប្អូន ឬក្នុងឋានៈជាចៅ។ អ៊ីចឹងយើងត្រូវតែបន្សាំខ្លួន បញ្ចូលខ្លួនក្នុងសុខទុក្ខរបស់ពួកគាត់ ដើម្បីបានដឹងពីសុខទុក្ខរបស់ពួកគាត់ពិតប្រាកដ»។
ក្នុងសាលាខេត្តពោធិ៍សាត់រៀងរាល់ថ្ងៃចន្ទ នៃដើមសប្តាហ៍នីមួយៗ នៅសាលប្រជុំដ៏ធំមួយ ប្រជាពលរដ្ឋជាច្រើននាក់តែងមកអង្គុយត្រៀបត្រា លើកៅអីទល់មុខជាមួយអភិបាលខេត្តពោធិ៍សាត់ គឺលោក ម៉ៅ ធនិន អមដោយមន្ត្រីមួយចំនួនទៀត។ លោក ម៉ៅ ធនិន បានឱ្យដឹងថា លោកជ្រើសយកថ្ងៃចន្ទ និងថ្ងៃព្រហស្បតិ៍ នៃសប្តាហ៍នីមួយៗ ដើម្បីបានជួបស្តាប់ និងដោះស្រាយបញ្ហាជូនប្រជាពលរដ្ឋ។ ប៉ុន្តបើថ្ងៃចន្ទ ឬថ្ងៃព្រហស្បតិ៍ ត្រូវជាប់រវល់ក៏លើកទៅថ្ងៃផ្សេងជំនួសវិញ។
លោកអភិបាលខេត្តពោធិ៍សាត់ បានបញ្ជាក់ដូច្នេះ «យន្តការនេះអ៊ីចេះ។ យន្តការនេះជាទូទៅខ្ញុំដោះ២ថ្ងៃ ឬ៣ថ្ងៃ ក្នុងមួយសប្តាហ៍ គឺរៀងរាល់ព្រឹកថ្ងៃចន្ទ។ អ៊ីចឹងបើដោះថ្ងៃចន្ទហើយ គាត់អញ្ជើញមកមានបញ្ហាថ្ងៃអង្គារ អាចជម្រាបជូនគាត់ថ្ងៃព្រហស្បតិ៍ ហើយបើគាត់អញ្ជើញមកថ្ងៃសុក្រ យើងលើកមកថ្ងៃចន្ទ»។
ប្រជាពលរដ្ឋដែលមានបញ្ហាបានស្កាត់មកពីគ្រប់ទិសទីក្នុងខេត្តពោធិ៍សាត់ ដើម្បីស្វែងរកដំណោះស្រាយដោយផ្ទាល់ពីលោកអភិបាល ខេត្តលើបញ្ហាផ្សេងៗគ្នាពាក់ព័ន្ធជីវិតប្រចាំថ្ងៃរបស់ពួកគាត់។ ប្រជាពលរដ្ឋខ្លះមានជម្លោះដីធ្លី ប្រជាពលរដ្ឋខ្លះមានបញ្ហាបំណុល ប្រជាពលរដ្ឋខ្លះទៀតមានជម្លោះក្នុងគ្រួសារ និងអ្នកខ្លះទៀតរងការចាញ់បោកគេជាដើម។ ក្នុងនោះវិវាទនៅតាមទីអារាមរវាងព្រះសង្ឃ និងគណៈកម្មការវត្តក៏មានផងដែរ។
ប្រជាពលរដ្ឋដែលមកស្វែងរកដំណោះស្រាយពីលោក ម៉ៅ ធនិន គេបានដឹងព័ត៌មានពីការជួយដោះស្រាយពីលោកតាមរយៈប្រជាពលរដ្ឋក្នុងភូមិ និងខ្លះទៀតបានដឹងតាមរយៈការប្រកាសពីលោកផ្ទាល់តែម្តងនៅក្នុងកិច្ចប្រជុំនានា ក៏ដូចជានៅពេលចុះទៅតាមមូលដ្ឋាន។
ក្នុងពេលមកស្វែងរកដំណោះស្រាយ លោក ម៉ៅ ធនិន បានហៅប្រជាពលរដ្ឋមានបញ្ហាទៅអង្គុយខ្មែរខ្លួនម្តងមួយនាក់ៗ ហើយឱ្យពួកគេនិយាយរៀបរាប់ពីបញ្ហាដែលជួបប្រទះ ខណៈមន្ត្រីអមលោកមួយចំនួននាំគ្នាកត់ត្រារាល់បញ្ហាដែលប្រជាពលរដ្ឋបានលើកឡើង។ បន្ទាប់មកលោកក៏ចាត់ចែងថា តើរឿងណាត្រូវដោះស្រាយរបៀបណា? តើត្រូវចុះទៅផ្ទាល់ដល់ទីតាំងមានបញ្ហា ឬឱ្យអាជ្ញាធរជាអភិបាលស្រុក ឬមេឃុំជាអ្នកដោះស្រាយ? ករណីខ្លះទៀត លោកត្រូវចុះទៅដល់ស្រុក និងឃុំតែម្តង ដើម្បីស្វែងរកដំណោះស្រាយ។
លោកអភិបាលខេត្តបានបញ្ជាក់ដូច្នេះ «ការងារទាំងអស់ដែលពួកគាត់តែងតែមកពឹងពាក់ មកជួបនៅសាលាខេត្តនេះមិនមានបញ្ហាអ្វីធំដុំទេ។ ភាគច្រើនមានជម្លោះ មានកង្វះខាតផ្លូវ ស្ពាន ក៏ដូចជាបញ្ហាដីធ្លី ពាក់ព័ន្ធការផ្ទេរមរតកពីឪពុកម្តាយទៅកូនអ៊ីចឹងទៅ។ យើងបានបញ្ចូលខ្លួនជាសមាជិកគ្រួសារគាត់ យើងដោះស្រាយជាលក្ខណៈគ្រួសារ ហើយបានយើងយកយន្តការច្បាប់ ដើម្បីរៀបចំជាលិខិតស្នាម ឬក៏ការដោះស្រាយហ្នឹងទៅតាមផ្លូវច្បាប់ជូនគាត់»។
តាមរយៈការប្រើយន្តការជួបស្តាប់ និងចុះដល់ទីតាំងទំនាស់ លោក ម៉ៅ ធនិន បានអះអាងថា មិនទាន់មានបញ្ហារបស់ប្រជាពលរដ្ឋណាមួយដែលធ្វើឱ្យលោកដោះស្រាយមិនបាននោះទេ។ «បញ្ហាកន្លងមកដែលថា ថ្នាក់ខេត្តដោះស្រាយមិនចេញដូចជាមិនមានទេ។ ទំនាស់ភាគច្រើនយើងប្រើយន្តការជាលក្ខណៈគ្រួសារទាំងអស់ ដើម្បីយើងបន្សុាំជាមួយពួកគាត់ជាលក្ខណៈគ្រួសារ ជាបង ជាប្អូនទៅ យើងលើកហេតុផលទៅ ព្រោះបងប្អូនយើងនៅទីនេះលោកបានយល់ណាស់អ្វីដែលល្អ អ្វីដែលមិនល្អ អ្វីដែលយុត្តិធម៌ អ្វីដែលមិនយុត្តិធម៌ និយាយទៅលោកអាចទទួលយកបានទាំងអស់ ដូចជាមិនមានបញ្ហាអ្វីទេ»។
បញ្ហាដីធ្លីជារឿងវិវាទដ៏ក្តៅមួយផងដែរនៅក្នុងប្រទេសកម្ពុជានាពេលបច្ចុប្បន្ន។ ខេត្តពោធិ៍សាត់មុនពេលលោក ម៉ៅ ធនិន ចូលទៅគ្រប់គ្រង ក៏កើតមានវិវាទដីធ្លីជាច្រើនករណីផងដែរ។ រយៈពេលប្រមាណជា ៥ឆ្នាំមកនេះ លោក ម៉ៅ ធនិន បានដោះស្រាយវិវាទដីធ្លីរហូតដល់ទៅជាង ៤០០ករណី ហើយបច្ចុប្បន្នជម្លោះដីធ្លីនេះមិនសូវកើតមានទៀតនោះទេ។
«កន្លងមកនេះយន្តការដែលយើងបានប្រើប្រាស់នេះដូចជាមានការកាត់បន្ថយ។ ចំណែកនៅក្នុងខេត្តបងរយៈពេល៥ឆ្នាំនេះដូចជាដោះជាង ៤០០ករណី អាហ្នឹងគ្រប់គ្រប់ប្រភេទទាំងអស់។ ដីរដ្ឋ និងប្រជាពលរដ្ឋ, សហគមន៍ និងប្រជាពលរដ្ឋ, ដីក្រុមហ៊ុនវិនិយោគជាមួយប្រជាពលរដ្ឋ ឬក៏ក្រុមហ៊ុនជាមួយប្រជាពលរដ្ឋ, ប្រជាពលរដ្ឋ និងប្រជាពលរដ្ឋ។ បញ្ហាដីនេះមិនមែនសម្តៅតែលើប្រជាពលរដ្ឋជាមួយក្រុមហ៊ុន ឬរវាងក្រុមហ៊ុនជាមួយប្រជាពលរដ្ឋទេ»។ នេះជាការបញ្ជាក់បន្ថែមរបស់លោកអភិបាលខេត្ត។
ពាក់ព័ន្ធនឹងវិវាទដីធ្លីក៏មានការលើកឡើងផងដែរថា វិវាទដីធ្លីខ្លះពិបាកក្នុងការដោះស្រាយ ព្រោះវិវាទដីធ្លីនោះជារបស់អ្នកមានឥទ្ធិពល ឬមានអំណាចជាដើម។ សម្រាប់លោក ម៉ៅ ធនិន ក្នុងខេត្តរបស់លោកគ្មានទំនាស់ដីធ្លីណាដែលដោះស្រាយមិនចេញនោះទេ ដោយលោកបានឈរលើគោលការណ៍ច្បាប់ និងយុត្តិធម៌ជាធំ។
លោក ម៉ៅ ធនិន បញ្ជាក់យ៉ាងដូច្នេះ «ការអនុវត្តន៍ច្បាប់យើងអត់មានសម្តៅលើនរណា ជានរណាទេ។ នរណាខុស គឺត្រូវទទួល នរណាយកដីគេ ត្រូវឱ្យគេវិញ។ នេះជាភាពយុត្តិធម៌មួយ ដេលមនុស្សទូទៅគេត្រូវការ។ មិនអាចថា អ្នកនេះ អ្នកនោះទេ។ យើងបានគិតថាប្រជាពលរដ្ឋក្នុងខេត្តជាគ្រួសារយើង យើងឈរជំហជាអ្នកដោះស្រាយ យើងលំអៀងម្តេចកើត ត្រូវប្រកាន់ខ្ជាប់នូវភាពសុក្រឹត និងយុត្តិធម៌»។
ក្រៅពីបង្កើតយន្តការផ្តល់ឱកាសឱ្យប្រជាពលរដ្ឋបានចូលជួបរៀបរាប់ពីបញ្ហា ដើម្បីស្វែងរកដំណោះស្រាយដោយផ្ទាល់ហើយនោះ ក្នុងឋានៈជាអភិបាលខេត្តពោធិ៍សាត់ លោក ម៉ៅ ធនិន បានដឹកនាំអភិវឌ្ឍន៍ខេត្តពោធិ៍សាត់ឱ្យលេចចេញនូវសមិទ្ធផលគួរឱ្យកត់សម្គាល់ជាច្រើនទៀត។ ក្នុងរយៈពេល៥ឆ្នាំនៃការដឹកនាំខេត្តពោធិ៍សាត់ លោក ម៉ៅ ធនិន ក៏បានរួមចំណែកលើកកម្ពស់ជីវភាពរស់នៅរបស់ប្រជាពលរដ្ឋក្នុងខេត្តឱ្យមានភាពប្រសើរផងដែរ។
សមិទ្ធផលការងារកើតចេញពីកិច្ចប្រឹងប្រែងក្នុងការដឹកនាំ និងគ្រប់គ្រងខេត្តពោធិ៍សាត់នេះ បានធ្វើឱ្យលោក ម៉ៅ ធនិន ទទួលបានការស្រឡាញ់ពេញចិត្ត និងគាំទ្រពីប្រជាពលរដ្ឋក្នុងខេត្ត។ ពលរដ្ឋខ្លះបានធ្លោយមាត់ថា ពួកគេមានសំណាងដែលមានអភិបាលខេត្តល្អមិនធ្លាប់មានពីមុនមក ហើយមិនចង់ឱ្យអភិបាលខេត្តរូបនេះចាកចេញទៅណានោះឡើយ៕
