(កណ្ដាល)៖ ស្នងការនគរបាលខេត្តកណ្តាល លោកឧត្តមសេនីយ៍ត្រី ឈឿន សុចិត្ត នៅថ្ងៃទី០៦ ខែមីនា ឆ្នាំ២០២០នះ បានជំរុញ និងលើកទឹកចិត្ត ដល់នគរបាលជាស្ត្រីភេទ ឲ្យមានកម្លាំងចិត្ត ក្នុងការធ្វើការងារ និងរៀបចំតំឡើងឋានន្តរសក្ដិ ទៅតាមសមត្ថភាពផងដែរ។
ការជំរុញ និងលើកទឹកចិត្តបែបនេះ បានធ្វើឡើងក្នុងឱកាសដែល លោកឧត្តមសេនីយ៍ត្រី ឈឿន សុចិត្ត អញ្ជើញជួបសំណេះសំណាល និងសាកសួរសុខទុក្ខ មន្ត្រីនគរបាលស្ត្រីចំនួន៩១រូប ដើម្បីអបអរខួបលើកទី១០៩ ទិវាអន្តរជាតិនារី ៨ មីនា ក្រោមប្រធានបទ «មានសន្តិភាព មានការលើកកម្ពស់ សមាសភាពយេនឌ័រ»។
ក្នុងជួបសំណេះសំណាល និងសាកសួរសុខទុក្ខ នាព្រឹកថ្ងៃទី០៦ ខែមីនា ឆ្នាំ២០២០នេះ បានការចូលរួមពីលោក-លោកស្រី ស្នងការរង, លោកនាយការិយាល័យជំនាញ និងមន្ត្រីនគរបាលស្ត្រី ចំនួន៩១រូបផងដែរ។
បន្ទាប់ពីស្តាប់ លោកស្រីឧត្តមសេនីយ៍ត្រី ឈឹម វណ្ណនី ស្នងការរងទទួលការងារយេនឌ័រ អានរបាយការណ៍ស្វាគមន៍ និងព្រះរាជសាររបស់សម្តេចព្រះមហាក្សត្រី នរោត្តម មុនីនាថសីហនុរួចមក លោកស្នងការ បានពាំនាំការសួរសុខទុក្ខពីសំណាក់ នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ។
លោកឧត្តមសេនីយ៍ស្នងការ បានស្នើដល់លោក-លោកស្រី ស្នងការរង និងលោកនាយ ការិយាល័យបុគ្គលិក ធ្វើការពិនិត្យមើលសមត្ថភាព មន្ត្រីនគរបាលស្ត្រី និងលើកទឹកចិត្តពួកគាត់ ដោយរៀបចំតំឡើងឋានន្តស័ក្តិ និងតួនាទីតាមលទ្ធភាពដែលអាចធ្វើបាន។
លោកឧត្តមសេនីយ៍ត្រី ឈឿន សុចិត្ត បានចែកជូនក្រណាត់សំពត់អំបោះខ្មែរ ជាវត្ថុអនុស្សាវរីយ៍ និងថវិកា១០ម៉ឺនរៀល ដល់មន្ត្រីនគរបាលស្ត្រីម្នាក់ៗផងដែរ៕
