(បាត់ដំបង)៖ ឃ្លាំងស្តុកថ្នាំកសិកម្មមួយកន្លែង នៅទីរួមខេត្តបាត់ដំបង ដែលជះក្លិនពុល ដល់ប្រជាពលរដ្ឋជិតខាង ត្រូវបានមន្ទីរបរិស្ថាន ចុះអប់រំណែនាំដល់ម្ចាស់ឃ្លាំងនៅថ្ងៃទី០៣ ខែមីនា ឆ្នាំ២០២០នេះ ដោយម្ចាស់ឃ្លាំង បានឯកភាពរុះរើចេញ ក្នុងរយៈពេលមួយអាទិត្យ ចាប់ពីថ្ងៃចុះកិច្ចសន្យានេះតទៅ។
លោក កត បូរ៉ាន ប្រធានមន្ទីរបរិស្ថាន ខេត្តបាត់ដំបង បានថ្លែងថា ក្រោយពីមានការជូនដំណឹងរបស់ប្រជាពលរដ្ឋ មន្ទីរបរិស្ថាន បានចាត់មន្ត្រីជំនាញ ចុះត្រួតពិនិត្យផ្ទាល់នៅលើទីតាំងឃ្លាំង ដែលស្ថិតនៅក្នុងភូមិកំពង់ក្របី សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។
បើតាមលោកប្រធានមន្ទីរបរិស្ថាន ខេត្តបាត់ដំបង ស្ថានភាពបច្ចុប្បន្ននេះ ឃ្លាំងស្តុកថ្នាំកសិកម្មនេះ គឺជាឃ្លាំងចាស់ដែលបានផ្អាកការប្រើប្រាស់ និងបានទុកដាក់ថ្នាំ និងសម្ភារកសិកម្មតាំង ពីឆ្នាំ២០១២មក។ នៅពេលចុះពិនិត្យ ក្រុមមន្ត្រីជំនាញ បានរកឃើញការស្តុកនិងទុកដាក់ សម្ភារចាស់ៗ ដែលហួសកាលកំណត់ប្រើប្រាស់ មួយចំនួន និងមានក្លិនជាមធ្យមព្រោះពុំ មានការថែទាំដិតដល់។
លោកបន្តថា តាមចម្លើយរបស់ម្ចាស់ឃ្លាំង ព័ត៌មានដែលថា មានការប៉ះពាល់ដល់មានការស្លាប់មនុស្សនោះ គឺមិនពិតឡើយ។
ដើម្បីដោះស្រាយបញ្ហាបណ្តឹងនេះ មន្ទីរបរិស្ថានខេត្តបាត់ដំបង បានតម្រូវឲ្យម្ចាស់ឃ្លាំងស្តុកថ្នាំកសិកម្មនេះ ត្រូវតែរៀបចំសម្អាត និងវេចខ្ចប់សម្ភារ និងថ្នាំកសិកម្មចាស់ៗ ដែលមាននៅក្នុងឃ្លាំងបច្ចុប្បន្ន ឲ្យបានរៀបរយនិងស្អាតល្អ។ ម្ចាស់ឃ្លាំងត្រូវធ្វើការគ្រប់គ្រងឃ្លាំងឲ្យបានហ្មត់ចត់។
ចំពោះមុខនៃវិធានការនេះ ម្ចាស់ឃ្លាំងស្តុកថ្នាំកសិកម្មឈ្មោះ ឡុង ខេន បានសន្យាថា នឹងរៀបចំសម្អាត និងវេចខ្ចប់សម្ភារ និងថ្នាំកសិកម្មចាស់ៗ ដែលមាននៅក្នុងឃ្លាំង ឲ្យបានស្អាត នៅមុនថ្ងៃទី១៥ ខែមីនា ឆ្នាំ២០២០ ព្រមទាំងធានាគ្រប់គ្រងឃ្លាំង ឲ្យមានលក្ខណៈល្អប្រសើរ ធានាអនុវត្តបច្ចេកទេសសមស្របដើម្បីកាត់បន្ថយ ក្លិនពីឃ្លាំង និងធានាយកសំណល់ទៅនោះ ទៅកប់ចោលនៅទីតាំងសមស្រប។
លោក កត បូរ៉ាន បានថ្លែងទៀតថា ប្រសិនបើម្ចាស់ឃ្លាំងមិនអនុវត្តតាមទេ នោះម្ចាស់អាជីវកម្ម នឹងត្រូវប្រឈមមុខតាមច្បាប់ដែលបានកំណត់៕
