(ភ្នំពេញ)៖ បើទោះបីថាប្រទេសកម្ពុជាមិនកើតមានជំងឺផ្លូវដង្ហើមដោយសារមេរោគ «COVID19» ក៏ដោយចុះ តែសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានក្រើនរំលឹកដល់ប្រជាពលរដ្ឋឱ្យមានអនាម័យខ្ពស់ក្នុងការរស់នៅ ដើម្បីទទួលបានសុខភាពល្អប្រសើរ។ សម្តេចតេជោបានរំលឹកថា ការការពារប្រសើរជាងព្យាបាល។

តាមរយៈទំព័រ Facebook នៅព្រឹកថ្ងៃអាទិត្យ ទី០១ ខែមីនា ឆ្នាំ២០២០នេះ សម្តេចតេជោ បានរំលឹកប្រជាពលរដ្ឋឧស្សាហ៍ដុសលាងសម្អាត មុខមាត់ដៃជើងខ្លួនប្រាណជាមួយសាប៊ូ ឬសារធាតុសម្លាប់មេរោគ ដើម្បីទប់ស្កាត់ការឆ្លងរោគផ្សេងៗ។

សម្តេចតេជោ បន្ថែមថា បើទោះបីពេលនេះកម្ពុជា មិនមានជំងឺឆ្លង «COVID19» យ៉ាងណាក្តី តែសម្តេចឱ្យប្រកាន់យកវិធានការការពារប្រសើរជាងការព្យាបាល។

ដើម្បីទទួលបានសុខភាពល្អ សម្តេចតេជោនាយករដ្ឋមន្ត្រី ផ្តល់ដំបូន្មានបន្ថែមដល់ប្រជាពលរដ្ធ ចូលរួមហាត់កីឡា និងទទួលទានទឹកឱ្យបានច្រេីន។

សូមបញ្ជាក់ថា មកដល់ពេលនេះជំងឺផ្លូវដង្ហើម «COVID19» បានរីករាលដាលទៅដល់ប្រទេសជិត ៦០ប្រទេសហើយនៅលើសាកលលោក។ ជំងឺនេះបានឆ្លងទៅមនុស្ស ៨៦,៥២៩នាក់ សម្លាប់មនុស្ស ២,៩៧៩នាក់ និង ៤១,៩៥៨នាក់ បានព្យាបាលឱ្យជាសះស្បើយ៕