(រតនគិរី)៖ នាព្រឹកថ្ងៃទី២៥ ខែកុម្ភៈ ឆ្នាំ២០២០នេះ នៅសាលប្រជុំមន្ទីរអភិវឌ្ឍន៍ជនបទខេត្តរតនគិរី មានការរៀបចំកិច្ចប្រជុំផ្សព្វផ្សាយលទ្ធផលនៃការអនុវត្តការងារឆ្នាំ២០១៩ និងលើកទិសដៅការងារឆ្នាំ២០២០ របស់ក្រសួងអភិវឌ្ឍន៍។
កិច្ចប្រជុំនេះធ្វើឡើងក្រោមអធិបតីភាពលោក ប៊ុន ចាន់វណ្ណៈ រដ្ឋលេខាធិការក្រសួងអភិវឌ្ឍន៍ជនបទ និងមានការអញ្ជើញពីលោក ស៊ឹម សនឡៃ សមាជិកក្រុមប្រឹក្សាខេត្ត, លោក លន់ សុភាព អភិបាលរងខេត្តរតនគិរី ព្រមទាំងមានការចូលរួមពីអាជ្ញាធរក្រុង ស្រុក មន្ទីរ អង្គភាពជុំវិញខេត្ត អង្គការដៃគូរសង្គមស៊ីវិល ដែលប្រតិបត្តិការនៅក្នុងមូលដ្ឋានខេត្តជាច្រើនរូបទៀត។
លោក លន់ សុភាព បានថ្លែងនូវការកោតសរសើរចំពោះកិច្ចខិតខំប្រឹងប្រែងរួមចំណែកយ៉ាងសំខាន់របស់មន្ត្រីនៃមន្ទីរអភិវឌ្ឍន៍ជនបទខេត្ត អាជ្ញាធរពាក់ព័ន្ធ ក្នុងការលើកកម្ពស់ការអនុវត្តការងារ ធ្វើឲ្យសម្រេចបានសមិទ្ធផលសំខាន់ជាច្រើនក្នុងខេត្ត ជំរុញឲ្យមានការផ្លាស់ប្តូរជីវភាពរស់នៅរបស់ប្រជាជន ជនបទប្រកបដោយបរិយាប័ន្ន ទាំងផ្នែកសេដ្ឋកិច្ច សង្គមកិច្ច វប្បធម៌ និងបរិស្ថាន។ ទន្ទឹមគ្នានេះ លោកអភិបាលរងខេត្ត ក៏បានណែនាំឲ្យអ្នកពាក់ព័ន្ធទាំងអស់ ត្រូវធ្វើការផ្សព្វផ្សាយឲ្យបានទូលំទូលាយអំពីគម្រោងអភិវឌ្ឍន៍នានា ដើម្បីឲ្យពលរដ្ឋបានយល់ដឹងកាន់តែច្បាស់ និងមានការចូលរួម។
សូមបញ្ជាក់ថា ក្នុងអាណត្តិរបស់រាជរដ្ឋាភិបាលនីតិកាលតី៦ នៃរដ្ឋសភា ក្រសួងអភិវឌ្ឍន៍ជនបទ បានកំណត់យកភាពចាំបាច់ក្នុងការលើកកម្ពស់គុណភាព និងការថែទាំហេដ្ឋារចនាសម្ព័ន្ធជនបទ ការទទួលបានទឹកស្អាតប្រកបដោយសុវត្ថិភាព និងការជំរុញការលើកកម្ពស់អនាម័យជនបទជាទិសដៅចម្បងរបស់ខ្លួន សំដៅរួមចំណែកធ្វើឲ្យសម្រេចបាននូវការបន្តជំរុញការអភិវឌ្ឍជនបទឲ្យរស់រវើក ដោយបន្តវិនិយោគលើផ្លូវជនបទ ប្រព័ន្ធធារាសាស្ត្រខ្នាតតូច ការពង្រីកការគ្របដណ្តប់ការប្រើប្រាស់អគ្គិសនី ការពង្រីកការទទួលបានទឹកស្អាត ការលើកកម្ពស់អនាម័យ ការរៀបចំភូមិ និងលំដៅដ្ឋាន ព្រមទាំងការលើកកម្ពស់ជីវភាពប្រជាជន តាមរយៈការបន្តអនុវត្តចលនាភូមិ១ ផលិតផល១ និងចលនាភូមិថ្មី។
ក្នុងស្មារតីខាងលើនេះ ក្រសួងបានដាក់ចេញនូវផែនការយុទ្ធសាស្ត្រឆ្នាំ២០១៩-២០២៣ ដោយផ្តោតសំខាន់លើ៖ ១៖ ការពង្រឹងស្ថាប័ន អភិវឌ្ឍន៍សមត្ថភាព និងធនធានមនុស្ស, ២៖ អភិវឌ្ឍន៍ហេដ្ឋារចនាសម្ព័ន្ធរូបវ័ន្ត និងគមនាគមន៍, ៣៖ លើកកម្ពស់លក្ខណ្ឌនៃការរស់នៅរបស់សហគមន៍ជនបទ និង៤៖ ការធ្វើពិពិធកម្មសេដ្ឋកិច្ចនៅតំបន់ជនបទ៕
