(ភ្នំពេញ)៖ នាយករដ្ឋមន្ត្រីនៃកម្ពុជា សម្តេចតេជោ ហ៊ុន សែន បានថ្លែងអបអរសាទរដល់រដ្ឋាភិបាលចិន ដោយសារបានរកឃើញថ្នាំគ្រុនចាញ់ ដែលមានប្រសិទ្ធភាពអាចប្រយុទ្ធប្រឆាំងនឹងជំងឺរលាកសួត ដែលបង្កឡើងដោយវីរ៉ុសកូរ៉ូណាប្រភេទថ្មី «COVID-19»។

ថ្លែងនៅព្រឹកថ្ងៃទី១៨ ខែកុម្ភៈ ឆ្នាំ២០២០នេះ ក្នុងឱកាសអញ្ជើញប្រគល់សញ្ញាបត្រដល់គរុសិស្ស គរុនិស្សិតបញ្ចប់ការសិក្សា ឆ្នាំ២០១៨-២០១៩ សម្តេចតេជោ ហ៊ុន សែន បានបង្ហាញក្តីសង្ឈឹមថា ការរីករាលដាលជំងឺបង្កដោយវីរ៉ុស «COVID19» អាចនឹងរំលត់បានក្នុងពេលដ៏ខ្លីខាងមុខ ប្រសិនបើថ្នាំគ្រុនចាញ់អាចប្រយុទ្ធប្រឆាំងជាមួយជំងឺនេះមែននោះ។

សម្តេចតេជោ ហ៊ុន សែន មានប្រសាសន៍បញ្ជាក់យ៉ាងដូច្នេះថា៖ «អ្វីដែលយើងទទួលបានព័ត៌មាន គឺពីម្សិលមិញខាងប្រទេសចិនបានប្រកាសថា ស្វែងរកឱសថដែលអាចព្យាបាលជំងឺនេះបាន តាមរយៈការប្រើប្រាស់នូវថ្នាំព្យាបាលជំងឺគ្រុនចាញ់។ ប្រសិនបើព័ត៌មាននេះវាជាការពិត ហើយព្យាបាលមនុស្សជា ខ្ញុំគិតថាសភាពការណ៍ នឹងរំលត់បាននៅក្នុងរយៈពេលដ៏ខ្លី។ ដូច្នេះយើងពិតជាមានការីករាយ នឹងព័ត៌មាន»។

សម្តេចមានប្រសាសន៍បន្តថា «ទន្ទឹមនឹងការចូលរួមរំលែកមរណទុក្ខ ជាមួយនឹងរដ្ឋាភិបាល ក៏ដូចជាប្រជាជនចិន និងប្រទេសមួយចំនួន ដែលមានប្រជាពលរដ្ឋបាត់បង់ជីវិត យើងក៏សូមអបអរនឹងកិច្ចខិតខំប្រឹងប្រែងរបស់រដ្ឋាភិបាល នៃសាធារណរដ្ឋប្រជាមានិតចិន ក្នុងការទប់ស្កាត់ការរីករាលដាលនៃជំងឺ COVID-19»។

លើសពីនេះទៅទៀត សម្តេចតេជោនាយករដ្ឋមន្ត្រី ថែមទាំងថ្លែងអំណរគុណដល់រដ្ឋាភិបាលចិន ដែលបានជួយថែរក្សានិស្សិតកម្ពុជា ដែលកំពុងរស់នៅទីនោះ រាប់ទាំងតំបន់វូហាន ២៣នាក់ ដែលពួកគេមានសុខភាពល្អ។

ឆ្លៀតក្នុងឱកាសនោះ សម្តេចតេជោ ហ៊ុន សែន បានសម្តែងការហួសចិត្តចំពោះក្រុមមនុស្សដែលផ្សព្វផ្សាយថា មាននិស្សិតកម្ពុជានៅចិនម្នាក់ បានស្លាប់ដោយសារជំងឺរលាកសួត ដែលបង្កឡើងដោយវីរ៉ុស COVID-19។ សម្តេចចាត់ទុកថា នេះជារឿងអកុសលមួយ និងដាក់សំណួរថា តើអ្នកបំភ្លៃព័ត៌មាននេះ ទទួលបានផលប្រយោជន៍អ្វីទៅ?

ដោយតាមទីភ្នាក់ងារព័ត៌មានចិនស៊ីនហួរ នៅយប់ថ្ងៃចន្ទ ទី១៧ ខែកុម្ភៈ ឆ្នាំ២០២០ ក្រុមអ្នកជំនាញ និងក្រុមវេជ្ជបណ្ឌិតចិន បានប្រកាសថា ផ្អែកលើលទ្ធផលនៃការព្យាបាលសាកល្បង ពួកគេបានទទួលស្គាល់ថា ក្លរ៉ូគីនផូស្វាត (Chloroquine Phosphate) ដែលជាថ្នាំប្រឆាំងនឹងជំងឺគ្រុនចាញ់ មានប្រសិទ្ធភាពជាក់ស្ដែងក្នុងការព្យាបាលវីរ៉ុស COVID-19។

ទីភ្នាក់ងារព័ត៌មានចិនស៊ីនហួរ ធ្វើសេចក្ដីរាយការណ៍ខាងលើ ដោយយោងទៅលើអនុប្រធានមជ្ឈមណ្ឌលជាតិចិន សម្រាប់ការអភិវឌ្ឍជីវបច្ចេកវិទ្យាដែលស្ថិតក្រោម ក្រសួងវិទ្យាសាស្ត្រ និងបច្ចេកវិទ្យាចិន គឺលោកស្រី Sun Yanrong។ ថ្លែងនៅក្នុងសន្និសីទសារព័ត៌មាននៅថ្ងៃចន្ទនោះ លោកស្រី Sun Yanrong បានបន្ថែមដូច្នេះថា៖ «ក្រុមអ្នកជំនាញបានឯកភាពគ្នាជាឯកច្ឆ័ន ក្នុងការសន្មតថា ថ្នាំក្លរ៉ូគីនផូស្វាត នឹងត្រូវបានដាក់បញ្ចូលទៅក្នុងវិធីសាស្ត្រព្យាបាលវីរ៉ុស Covid-19 ហើយការព្យាបាលសាកល្បង ទ្រង់ទ្រាយធំនឹងធ្វើឡើងក្នុងពេលឆាប់ៗនេះ តាមដែលអាចធ្វើទៅបាន»។

គិតត្រឹមព្រឹកថ្ងៃទី១៨ ខែកុម្ភៈ ឆ្នាំ២០២០នេះ ចំនួនមនុស្សដែលបាត់បង់ជីវិត ដោយសារវីរ៉ុស COVID-19 នៅក្នុងប្រទេសចិន បានកើនដល់ ១,៨៦៨នាក់ ហើយចំនួនអ្នកឆ្លងបានបន្តកើនដល់ជាង ៧២,៥០០នាក់។ នេះបើតាមការដកស្រង់ ការផ្សាយចេញពីទីភ្នាក់ងារព័ត៌មាន CGTN៕