(ភ្នំពេញ)៖ នៅព្រឹកថ្ងៃទី០៦ ខែកុម្ភៈ ឆ្នាំ២០២០នេះ សាលាដំបូងរាជធានីភ្នំពេញ បន្តសវនាការជំនុំជម្រះលើសំណុំរឿង «សន្ទិដ្ឋិភាពជាមួយបរទេស» របស់លោក កឹម សុខា អតីតប្រធាន នៃអតីតគណបក្សសង្រ្គោះជាតិ ដោយបន្តសួរដេញដោលលើសកម្មភាពរបស់លោក ចាប់ពីឆ្នាំ២០០៧ រហូតដល់ឆ្នាំ២០១២។

នេះជាសប្តាហ៍ទី៤ និងជាសវនាការលើកទី១២ នៃការជំនុំជម្រះលើសំណុំរឿងក្បត់ជាតិរបស់ លោក កឹម សុខា ដែលជាមូលហេតុចម្បង នាំឱ្យមានការរំលាយគណបក្សសង្រ្គោះជាតិ នៅក្នុងប្រទេសកម្ពុជា។ ក្នុងសវនាការនេះ មានវត្តមានជនជាប់ចោទ កឹម សុខា, មេធាវីរាជរដ្ឋាភិបាលកម្ពុជា ដឹកនាំដោយ លោក គី តិច, មេធាវីរបស់ជនជាប់ចោទ រួមទាំងតំណាងទូត អង្គការសង្គមស៊ីវិល សមាគម និងអ្នកសារព័ត៌មានផងដែរ។

សវនាការលើកទី១១ សប្ដាហ៍ទី៤ នៅល្ងាចថ្ងៃទី០៥ ខែកុម្ភៈ ម្សិលមិញនេះ ក្រុមប្រឹក្សាជំនុំជម្រះ នៃសាលាដំបូងរាជធានីភ្នំពេញ បានបិទបញ្ចប់ជាមួយនឹងការសួរដេញដោលលើសកម្មភាពបង្កើត គណបក្សសិទ្ធិមនុស្សរបស់ជនជាប់ចោទ កឹម សុខា។

ក្នុងសវនាការចំនួន ៣សប្តាហ៍កន្លងមកនេះ អង្គជំនុំជម្រះនៃសាលាដំបូងរាជធានីភ្នំពេញ បានបញ្ចប់ដំណាក់កាលចោទសួរដេញដោល ដល់ជនជាប់ចោទទៅភស្តុតាងថ្មីជាវីដេអូរយៈពេល១ម៉ោងដែលដាក់ដោយ លោក កឹម សុខា ហើយបន្តសួរអំពីសកម្មភាពរបស់លោក ចាប់ពីឆ្នាំ២០០៧ ដល់ឆ្នាំ២០១៧ ពោលគឺសកម្មភាព នៃការបង្កើតគណបក្សសិទ្ធិមនុស្ស។

លោក កឹម សុខា ធ្លាប់ត្រូវបានសមត្ថកិច្ចចាប់ខ្លួន កាលពីថ្ងៃទី៣ ខែកញ្ញា ឆ្នាំ២០១៧ ពាក់ព័ន្ធនឹងការប្រព្រឹត្តអំពើឃុបឃិតជាមួយបរទេស ដើម្បីផ្តួលរំលំរាជរដ្ឋាភិបាលស្របច្បាប់កម្ពុជា ហើយត្រូវបានឃុំខ្លួនក្នុងពន្ធនាគារត្រពាំងផ្លុង ខេត្តត្បូងឃ្មុំ រយៈពេលជាង១ឆ្នាំ ក្រោយបែកធ្លាយវីដេអូមួយដែលលោកសារភាពពថា លោកអនុវត្តតាមការណែនាំពីបរទេសដើម្បីធ្វើការផ្លាស់ប្តូរប្រទេសកម្ពុជា ដោយយកលំនាំតាមប្រទេសយូហ្គោស្លាវី និងស៊ែប៊ី។ ក្រោយមក លោកត្រូវបានតុលាការដាក់ឱ្យស្ថិតនៅក្រោមការត្រួតពិនិត្យ ដោយមិនអនុញ្ញាតឱ្យជួប អតីតថ្នាក់ដឹកនាំ CNRP មិនឱ្យជួបជនបរទេស រួមទាំងមិនអាចចាកចេញពីព្រំដែនផ្លូវដែលតុលាការបានកំណត់។

ទោះជាយ៉ាងនេះក្តី កាលពីថ្ងៃទី១០ ខែវិច្ឆិកា ឆ្នាំ២០១៩ សាលាដំបូងរាជធានីភ្នំពេញ បានសម្រេចកែសម្រួលលក្ខខណ្ឌត្រួតពិនិត្យនេះឡើងវិញដោយដាក់ លោក កឹម សុខា ឱ្យមានសេរីភាពច្រើនជាងមុន ដោយគ្រាន់តែហាមដូចជា៖ មិនត្រូវចេញក្រៅព្រំប្រទល់ដែនដីនៃព្រះរាជាណាចក្រកម្ពុជា មិនត្រូវធ្វើសកម្មភាពនយោបាយ និងត្រូវឆ្លើយតបនឹងការកោះហៅពីគ្រប់សមត្ថកិច្ចផងដែរ៕