(សៀមរាប)៖ ក្នុងឱកាសដឹកនាំគណៈប្រតិភូបំពេញការងារនៅទីក្រុងតូក្យូ ប្រទេសជប៉ុន នៅព្រឹកថ្ងៃទី៤ ខែកុម្ភៈ ឆ្នាំ២០២០ លោកស្រី ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរា បានចូលជួបសម្តែងការគួរសម និងពិភាក្សាការងារជាមួយលោក NAKAYAMA Norihiro អនុរដ្ឋមន្ត្រីក្រសួងការទេសជប៉ុន លើកិច្ចសហប្រតិបត្តិការផ្នែកវប្បធម៌ ការជួសជុលប្រាង្គប្រាសាទបុរាណក្នុងរមណីយដ្ឋានអង្គរ និងការបណ្តុះបណ្តាលធនធានមនុស្ស។

ជំនួបដ៏ថ្លៃថ្លានេះបានពង្រីកបន្ថែមនូវកិច្ចសហប្រតិបត្តិការរវាងកម្ពុជា និងជប៉ុនឱ្យកាន់តែមានភាពខ្លាំងក្លាជាងមុន ព្រមទាំងបង្កើតនូវបរិយាកាសយ៉ាងល្អប្រសើរ ដើម្បីលើកកម្ពស់ការផ្លាស់ប្តូរបទ ពិសោធន៍រវាងគ្នា និងគ្នាទៅលើកិច្ចការវប្បធម៌ និងអនុវត្តនូវគម្រោងអភិរក្សប្រាង្គប្រាសាទបុរាណខ្មែរនៅរមណីយដ្ឋានអង្គរ៕