(ព្រះសីហនុ)៖ លោក សេង ទៀង ជំនួយការផ្ទាល់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបន្ដនាំយកថវិកាសម្តេចតេជោ ហ៊ុន សែន ដែលទទួលបានពីការបរិច្ចាកពីសប្បុរសជន ចំនួន២៥ម៉ឺនដុល្លារ ទៅផ្តល់ជូនគ្រួសារសព៥នាក់ នៅខេត្តព្រះសីហនុ ដែលរងគ្រោះក្នុងឧបទ្ទវហេតុ បាក់រលំអគារកម្ពស់៦ជាន់ នៅខេត្តកែប កាលពីល្ងាចថ្ងៃទី០៣ ខែមករា ឆ្នាំ២០២០កន្លងទៅ។
ការប្រគល់ថវិកា ជូនគ្រួសារសពទាំង៥នាក់ នៅខេត្តព្រះសីហនុនេះ ធ្វើឡើងនៅរសៀលថ្ងៃទី២៧ ខែមករា ឆ្នាំ២០២០។
ក្នុងឱកាសនោះ លោក សេង ទៀង បាននាំនូវប្រសាសន៍ផ្តាំផ្ញើសាកសួរសុខទុក្ខ និងចូលរួមរំលែកទុក្ខ ចំពោះក្រុមគ្រួសារសព ពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានយកចិត្តទុកដាក់អំពាវនាវដល់សប្បុរសជន និងគិតគូរចំពោះប្រជាពលរដ្ឋដែលរងគ្រោះ ដោយអគារបាក់រលំ។
លោក សេង ទៀង បានឲ្យដឹងថា គ្រួសារសពទាំង៥នាក់ ដែលទទួលបានថវិកាឧបត្ថម្ភនេះរួមមាន៖ គ្រួសារទី១ដែលប្តីស្លាប់ សល់តែប្រពន្ធ និងកូន៤នាក់ ត្រូវទទួលបានថវិកា៥ម៉ឺនដុល្លារ ដែលបែងចែងជា៤ចំណែកស្មើៗគ្នាដល់កូនៗទាំង៤នាក់ និងគ្រួសារទី២ គឺជាគ្រួសារមេការសំណង់ ដែលបានស្លាប់ទាំងគ្រួសារមានប្តីប្រពន្ធ និងកូន២នាក់ សរុប៤នាក់ ដូច្នេះថវិកាត្រូវប្រគល់ជូនឪពុកម្តាយទាំងសងខាង ដោយម្ខាងៗទទួលបាន២ចំណែក (១០ម៉ឺនដុល្លារ)។
គួររំលឹកថា សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានប្រកាសឧបត្ថម្ភថវិកាដល់ជនរងគ្រោះ និងអ្នករងរបួសនៅក្នុងករណីបាក់រលំអគារ នៅខេត្តកែប ដោយសពជនរងគ្រោះម្នាក់ៗ ទទួលបាន៥ម៉ឺនដុល្លារ និងបន្ថែម១០លានរៀលទៀត សម្រាប់ពិធីបុណ្យសព ខណៈដែលអ្នករងរបួសម្នាក់ៗ ទទួលបានថវិកា១ម៉ឺនដុល្លារ។
ករណីបាក់រលំអគារកម្ពស់៦ជាន់ នៅក្នុងខេត្តកែប បានបណ្តាលឱ្យមនុស្សរងគ្រោះនិងបាត់បង់ជីវិតសរុប៥៩នាក់ (ស្រី២២នាក់) ក្នុងនោះបាត់បង់ជីវិតចំនួន៣៦នាក់ (ស្រី១៤នាក់) ក្នុងចំណោមជនរងគ្រោះទាំងនេះ មានក្មេងចំនួន០៦នាក់ (ក្មេងស្រី២នាក់) និងរងរបួសចំនួន២៣នាក់ (ស្រី០៨នាក់)៕
