(កំពង់ចាម)៖ តំណាងរាស្ដ្រមណ្ឌលកំពង់ចាម លោកបណ្ឌិត ម៉ា ឈឿន បានអញ្ជើញប្រកាសបញ្ចូលសមាជិកថ្មី គណបក្សប្រជាជនកម្ពុជា ៦៥៣នាក់ ដែលប្រព្រឹត្ដទៅនៅសាលាស្រុកជើងព្រៃ នាថ្ងៃទី២៣ ខែមករា ឆ្នាំ២០២០នេះ។

តំណាងរាស្ដ្រ ម៉ា ឈឿន បានថ្លែងថា «ថ្ងៃនេះ គឺជាប្រវិត្ដសាស្ដ្ររបស់ស្រុកជើងព្រៃ ដែលមានពន្លកថ្មី កុលបុត្រ កុលធីតា ជាកូនចៅរបស់មាតាបិតា ដែលជាសមាជិក សមាជិកការបក្សប្រជាជនកម្ពុជាផ្ទាល់តែម្ដង បានមកចូលរួមរស់ជាមួយគណបក្សប្រជាជន»។

មិនថាពន្លកថ្មី ឫចាស់ គឺសុទ្ធសឹងតែជាសមាជិកគណបក្សប្រជាជនតែមួយ និងជាគ្រួសារតែមួយ ក្រោមតំបូលសុខសន្តិភាពតែមួយ ក្រោយថ្ងៃរំដោះនៃទិវារជ័យជំនះ០៧មករា ហើយយើងត្រូវចាត់ទុកថា ថ្ងៃ៧មករា ជាមាតាទី២របស់ ដែលបានផ្ដល់កំណើតទី២របស់យើងទាំងអស់គ្នា ព្រោះបានរំដោះប្រជាជនយើង ឱ្យរួចផុតពីរបបប្រល័យពូជសាសន៍ នឹងនាំមកនូវការអភិវឌ្ឍលើគ្រប់វិស័យ ជាស្នាដៃរបស់ថ្នាក់ដឹកនាំកំពូល របស់គណបក្សប្រជាជនកម្ពុជា ដែលមានសម្ដេចតេជោ ហ៊ុន សែន ជាប្រធាន។

តំណាងរាស្ដ្រ ម៉ា ឈឿន បានថ្លែងបន្ដថា «យើងត្រូវបន្តរួមគ្នាគាំទ្រសម្តេចតេជោ កាន់ដៃគ្នាថែរក្សាសន្តិភាព ថែរក្សាស្នាដៃសមិទ្ធិផលយ៉ាងច្រើនដែលរាជរដ្ឋាភិបាលខំកសាងឡើង។ យើងទាំងអស់គ្នា សូមថ្លែងអំណរគុណសម្ដេចតេជោ ហ៊ុន សែន ដែលជាវីរៈជនដ៏អង់អាចក្លាហានមួយរូប របស់ប្រជាជនកម្ពុជា ដែលតែងតែនៅរួមសុខទុក្ខជាមួយ ប្រជាពលរដ្ឋជាប់ជានិច្ច ជាពិសេសដឹកនំាកម្ពុជា នាំមកនូវសន្ដិភាពយ៉ាងពិតប្រាកដ»។

សន្ដិភាព ពិតជានាំមកនូវជោគជ័យ និងអភិវឌ្ឍលើគ្រប់វិស័យ ដែលធ្វើឱ្យយើងទាំងអស់គ្នាគ្រប់មជ្ឈដ្ឋានទាំងប្រជាជនក្នុង និងក្រៅស្រុកបាននិយាយថា អរគុណសន្ដិភាព អរគុណសម្ដេចតេជោ ដែលជាវីរៈជនដ៏អង់អាចក្លាហានរបស់កម្ពុជា។

សន្ដិភាព ពិតជានំាមកនូវអ្វីៗគ្រប់យ៉ាងទាំងអស់ ទាំងការអភិវឌ្ឍន៍ សិទ្ធិសេរីភាព និងលទ្ធិប្រជាធិបតេយ្យ ជាពិសេស សេចក្ដីសុខសាន្ដជូនប្រជាជន និងប្រទេសជាតិ។ បើគ្មានសន្ដិភាព គ្មានទេពាក្យថាលទ្ធិប្រជាធិបតេយ្យ និងសិទ្ធិមនុស្សនោះឡើយ, ជាក់ស្ដែងដូចនៅមជ្ឈិបូព៌ា ដែលកំពុងតែឆាបឆេះដោយភ្លើងសង្គ្រាម គឺដោយសារតែបដិវត្ដន៍ពណ៌។ ដូច្នេះយើងទាំងអស់គ្នាត្រូវគាំទ្រសន្ដិភាព ត្រូវអរគុណសន្ដិភាព ត្រូវចូលរួមគ្នាថែរក្សាសន្ដិភាព ត្រូវគាំទ្រគណបក្សប្រជាជនកម្ពុជា ក្នុងការដឹកនាំប្រទេស ទៅកាន់សន្ដិភាព រឹងមាំជាបន្ដបន្ទាប់រៀងរហូត៕