(ភ្នំពេញ)៖ លោក នង វាសនា ប្រធានក្រុមហ៊ុនវិនិយោគ កុល វាសនា ដែលជាអ្នកវិនិយោគក្នុងស្រុកដ៏ល្បីមួយរូប នៅក្នុងប្រទេសកម្ពុជា បានប្រាប់អំពីកាលានុវត្តភាព និងបញ្ហាប្រឈមនៃការវិនិយោគ ក្នុងវិស័យកសិកម្ម និងកសិ-ឧស្សាហកម្ម នៅកម្ពុជា។

លោកថា វិស័យកសិកម្ម និងកសិ-ឧស្សាហកម្មនៅកម្ពុជា នៅតែមានឱកាសច្រើន សម្រាប់ទាក់ទាញអ្នកវិនិយោគ។

ក្នុងកម្មវិធី «ភ្ញៀវពិសេសប្រចាំសប្តាហ៍» របស់ទូរទស្សន៍ Fresh News លោក នង វាសនា បានឲ្យដឹងថា «វិស័យកសិកម្ម គឺជាវិស័យ ដែលអាចមានហានិភ័យខ្ពស់ ត្រូវការរយៈពេលយូរ ហើយកម្រិតនៃប្រាក់ចំណេញ ប្រហែលជាមិនមានច្រើនប៉ុន្មាននោះទេ ប៉ុន្ដែនៅពេលដែលយើងធ្វើទៅក្លាយជារបបប្រចាំថ្ងៃ របស់ក្រុមគ្រួសាររបស់យើងហើយ វាក្លាយជារឿងធម្មតា»។

លោកបានលើកឡើងថា «រឿងដែលពិបាក អ្នកដែលធ្វើកសិកម្ម គឺគាត់មិនចេះធ្វើ គាត់មិនដឹងអំពីបច្ចេកទេស អ្វីៗគឺគាត់ជួលគេទាំងអស់ ទោះគាត់ធ្វើតាមរបៀបខុស ក៏គាត់មិនដឹង គាត់ចំណាយខុសក៏គាត់មិនដឹង ហើយមិនមានលទ្ធផល ហើយគាត់មិនអាចផលិត នៅក្នុងតម្លៃមួយសមរម្យ ដែលអាចប្រកួតប្រជែង ទៅលើទីផ្សារ»។

ប្រធានក្រុមហ៊ុនវិនិយោគ កុល វាសនា រូបនេះ ក៏បានគូសបញ្ជាក់ផងដែរថា សក្ដានុពលនៃការវិនិយោគកសិកម្ម និងកសិ-ឧស្សាហកម្ម នៅកម្ពុជា នៅតែមាន ដោយសារតែមានតម្រូវការក្នុងស្រុកច្រើន ជាមួយនឹងការផ្គត់ផ្គង់ទីផ្សារអន្ដរជាតិ។

ចំពោះបញ្ហាប្រឈមនៃការវិនិយោគ ក្នុងវិស័យកសិកម្ម និងកសិ-ឧស្សាហកម្ម លោក នង វាសនា គិតថាកត្ដាមួយ ដែលសំខាន់បំផុតនោះ គឺការផ្គត់ផ្គង់ទឹក ជាកត្ដាធំបំផុត ដែលធ្វើឲ្យវិស័យកសិកម្មខ្លាំងក្លា និងកត្ដាទី២៖ ទិន្នផលរបស់កម្ពុជា នៅមានកម្រិតមធ្យមនៅឡើយ ដែលមិនទាន់មានលក្ខណៈប្រកួតប្រជែងខ្លាំង បើប្រៀបធៀបទៅនឹងប្រទេសជិតខាងកម្ពុជា។

អ្នកវិនិយោគរូបនេះក៏បានប្រាប់ថា បញ្ហាថ្លៃដើមកម្ពុជាខ្ពស់ ដោយសារកម្ពុជានាំចូល ដូចជាប្រេងឥន្ទនៈ និងភ្លើងដែលមានតម្លៃមិនទាន់ទាប ជាងប្រទេសជិតខាង ខណៈចំពោះវិស័យកសិកម្ម ការប្រើប្រាស់ជី និងថ្នាំកសិកម្ម សឹងតែនាំចូល១០០ភាគរយ ហើយមានតម្លៃថ្លៃ ហើយជាមុខចំណាយធំបំផុតមួយ ក្នុងការផលិតផលិតផលកសិកម្ម និងកសិ-ឧស្សាហកម្ម។

លោក នង វាសនា បានបញ្ជាក់ថា «បើសិនជាយើងមិនមានលទ្ធភាព ក្នុងការផលិតថ្នាំកសិកម្ម ក៏ដូចជាជីកសិកម្ម ឲ្យបានបរិមាណច្រើន ហើយមានតម្លៃសមរម្យនោះទេ គឺចំណូលរបស់ប្រជាជន ដែលបានពីវិស័យកសិកម្ម និងកសិឧស្សាហកម្ម ច្បាស់ជាថយចុះ ព្រោះយើងចំណាយច្រើន ក្នុងការនាំចូល»។

បន្ថែមពីនោះទៀត លោក នង វាសនា បានបន្ដថា ចំណុចដែលខ្វះខាតខ្លាំង គឺថាក្នុងវិស័យកសិកម្ម និងកសិឧស្សាហកម្មកម្ពុជា ខ្សោយខ្លាំងនៅក្នុងការរកទីផ្សារ ព្រោះថា កម្ពុជាមិនសូវមានភាពប៉ិនប្រសប់ ក្នុងការផ្សព្វផ្សាយផលិត ដែលខំផលិតខ្លួនឯង នៅលើទីផ្សារអន្ដរជាតិ៕

ព័ត៌មានលម្អិតសូមទស្សនាវិដេអូ នៃកិច្ចសម្ភាសទាំងស្រុងដូចខាងក្រោម៖