(ព្រៃវែង)៖ យុវជនម្នាក់ និងក្មេងប្រុសម្នាក់បានស្លាប់បាត់បង់ជីវិត នៅពេលដែលពួកគេ នាំគ្នាជិះទូកឆ្លងទន្លេ ហើយទូកបានលិចពេលទៅដល់កណ្តាលទន្លេ។
ហេតុការណ៍នេះ បានកើតឡើងកាលពីវេលាម៉ោង២៖១០នាទី រសៀលថ្ងៃទី២០ ខែមករា ឆ្នាំ២០២០ នៅក្នុងដងទន្លេតូច ក្នុងភូមិថ្មី ឃុំស្តៅកោង ស្រុកបាភ្នំ ខេត្តព្រៃវែង។
ជនរងគ្រោះទាំង២នាក់ រួមមាន៖ ឈ្មោះ បូ រស្មី ភេទប្រុស អាយុ១២ឆ្នាំ មានទីលំនៅក្នុង ភូមិកើតហេតុ និងឈ្មោះ សេង ប៊ុនឃាង ភេទប្រុស អាយុ១៤ឆ្នាំ មានទីលំនៅក្នុងរាជធានីភ្នំពេញ។
យោងតាមប្រភពព័ត៌មានពីសមត្ថកិច្ច បានឲ្យដឹងថា ជនរងគ្រោះគឺជាមិត្តភក្តិនឹងគ្នា ហើយមុនពេលកើតហេតុ ពួកគេរួមជាមួយមិត្តភក្តិម្នាក់ទៀតឈ្មោះពន្លក ម៉េង ភេទប្រុស អាយុ១៥ឆ្នាំ មានទីលំនៅឯរាជធានីភ្នំពេញ បាននាំគ្នាជិះទូកពីត្រើយខាងជើងទន្លេតូច ឆ្លងទៅត្រើយខាងត្បូង បំណងទៅលេងនៅទីនោះ។
ប៉ុន្តែពេលទៅដល់កណ្ដាលទន្លេ មិនដឹងយ៉ាងម៉េច ស្រាប់តែទូកពួកគេបានលិច ធ្វើឲ្យជនរងគ្រោះទាំង២នាក់ ដែលមិនចេះហែលទឹកផងនោះ បានលង់ទឹករហូតស្លាប់បាត់បង់ជីវិត ចំណែកជនរងគ្រោះឈ្មោះ ពន្លក ម៉េង ចេះហែលទឹក បានខំប្រឹងហែលរហូតមកដល់ច្រាំង ទើបបានរួចជីវិត ទាំងភ័យស្លេកស្លាំង និងបានរត់ទៅហៅអ្នកស្រុក ឲ្យមកជួយមិត្តភក្តិដែលលង់ទឹកភ្លាមៗដែរ។
បើតាមសមត្ថកិច្ច ទោះជាយ៉ាងណា អ្នកស្រុកមកដល់ ចុះរាវរកឃើញ ពួកគេបានស្លាប់បាត់ទៅហើយ ទើបបានត្រឹមនាំយកសពមកប្រគល់ឲ្យសាច់ញាតិ រៀបចំធ្វើបុណ្យតាមប្រពៃណី៕
