(ភ្នំពេញ)៖ ការសម្រេចបាននូវលទ្ធផលជាទីមោទនៈនានារហូតមកដល់ថ្ងៃនេះ គឺបានបង្ហាញយ៉ាងច្បាស់ពីស្មារតីទទួលខុសត្រូវ កិច្ចខិតខំប្រឹងប្រែង និងការប្តេជ្ញាចិត្តក្នុងការជំរុញវិស័យការងារ និងបណ្តុះបណ្តាលវិជ្ជាជីវៈ និងការលើកកម្ពស់ភាពជាដៃគូរវាងរដ្ឋ-ឯកជន ប្រកបដោយប្រសិទ្ធភាព និងប្រសិទ្ធផលខ្ពស់ ក្នុងគោលដៅរួមចំណែកបង្កើនល្បឿនដល់ការអភិវឌ្ឍសង្គម-សេដ្ឋកិច្ចប្រកបដោយចីរភាព។

នេះជាការលើកឡើងរបស់លោក អ៉ិត សំហេង រដ្ឋមន្ត្រីក្រសួងការងារ ថ្លែងក្នុងពិធីបើកវេទិកាសំណេះសំណាលប្រចាំឆ្នាំរវាងតំណាងរាជរដ្ឋាភិបាល និងវិស័យឯកជន ក្រោមប្រធានបទ «វឌ្ឍនភាពនៃការអនុវត្តកាតព្វកិច្ចច្បាប់ស្តីពីការងារ និងច្បាប់ស្តីពីរបបសន្តិសុខសង្គម» នាព្រឹកថ្ងៃទី២៣ ខែធ្នូ ឆ្នាំ២០១៩ នៅសណ្ឋាគារកាំបូឌីយ៉ាណា។

លោក អ៉ិត សំហេង បានបន្តថា ការបង្កើនកិច្ចសហប្រតិបត្តិការយ៉ាងជិតស្និត តាមរយៈការអនុវត្តយន្តការត្រីភាគី និងកិច្ចសន្ទនាសង្គមដែលយើងបានអនុវត្ត ប្រកបដោយប្រសិទ្ធភាពដែលជាមូលដ្ឋានគ្រឹះនៅក្នុងការធានាបាននូវភាពសុខដុមផ្នែកទំនាក់ទំនងវិជ្ជាជីវៈ ដែលធ្វើឱ្យមានការថយចុះនូវវិវាទការងារបានប្រសើរជាងមុនច្រើន។

ការបន្តចូលរួមអនុវត្តយ៉ាងសកម្មក្នុងការគាំទ្រដល់កម្មវិធីកំណែទម្រង់របស់រាជរដ្ឋាភិបាល យុទ្ធសាស្ត្រចតុកោណ គោលនយោបាយនានា ដូចជាគោលនយោបាយជាតិស្តីពីមុខរបរ និងការងារ គោលនយោបាយជាតិស្តីពីអប់រំបណ្តុះបណ្តាលបច្ចេកទេស និងវិជ្ជាជីវៈ គោលនយោបាយជាតិអភិវឌ្ឍវិស័យឧស្សាហកម្ម និងក្របខណ្ឌគោលនយោបាយជាតិគាំពារសង្គម។

ទន្ទឹមនឹងនេះ ការចូលរួមអនុវត្តប្រកបដោយស្មារតីទទួលខុសត្រូវនូវកាតព្វកិច្ចនានាដែលបានចែងក្នុងច្បាប់ស្តីពីការងារ ច្បាប់ស្តីពីសហជីព ច្បាប់ស្តីពីរបបសន្តិសុខសង្គម ច្បាប់ស្តីពីប្រាក់ឈ្នួលអប្បបរមា រួមទាំងបទដ្ឋានគតិយុត្តិនានា ពាក់ព័ន្ធនឹងវិស័យការងារផងដែរ។

បន្ថែមពីនេះ សមាគមសហព័ន្ធនិយោជកកម្ពុជា (CAFEBA) ក៏ជាដៃគូដ៏សំខាន់ផងដែរ ដែលបានចូលរួមធ្វើឱ្យក្រសួងអាចសម្រេចបានដោយជោគជ័យនូវការអនុវត្តផែនការយុទ្ធសាស្រ្តអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ ព្រមទាំងកម្មវិធីការងារសមរម្យសម្រាប់ប្រទេសកម្ពុជា និងគម្រោងនានាផងដែរ។

ក្រសួងការងារបានត្រៀមខ្លួនរួចជាស្រេចក្នុងការបន្តកិច្ចសហការជាមួយ CAFEBA សំដៅលើកកម្ពស់ភាពប្រកួតប្រជែងកម្ពុជានៅលើឆាកអន្តរជាតិ ដើម្បីរួមចំណែកជាមួយរាជរដ្ឋាភិបាល ក្នុងការសម្រេចឱ្យបាននូវចក្ខុវិស័យកម្ពុជាឆ្នាំ២០៣០ ដែលជាប្រទេសមានចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសមានចំណូលខ្ពស់។

ស្ថិតក្នុងបរិបទដែលវិស័យឯកជនកាន់តែប្រឈមកាន់តែខ្លាំងទៅនឹងលទ្ធភាពប្រកួតប្រជែងជាមួយប្រទេសនាំចេញនានា យើងបានធ្វើការយ៉ាងជិតស្និទ្ធជាមួយគ្នាស្វែងរកដំណោះស្រាយរួមគ្នា ដើម្បីធានាថាវិស័យឯកជននៅតែអាចបន្តធានាបាននូវឧត្តមភាពប្រកួតប្រជែង សមាជិកទាំងអស់របស់ CAFEBA អាចរក្សាបានដំណើរផលិតកម្ម អាជីវកម្មរបស់ខ្លួនប្រកបដោយចីរភាព។

ដូចដែលអ្វីដែលសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានសម្រេចនៅក្នុង វេទិការាជរដ្ឋាភិបាល-វិស័យឯកជន លើកទី១៨ កាលពីថ្ងៃទី២៩ ខែមីនា ឆ្នាំ២០១៩ សម្តេចតេជោនាយករដ្ឋមន្រ្តី បានដាក់ចេញនូវវិធានការកែទម្រង់មុតស្រួចជាកញ្ចប់ សំដៅពង្រឹងភាពប្រកួតប្រជែង និងជំរុញធ្វើពិពិធកម្មសេដ្ឋកិច្ចកាន់តែមានភាពល្អប្រសើរជាលំដាប់។

លោកឧកញ៉ា វ៉ាន់ ស៊ូអៀង ប្រធានសមាគមសហព័ន្ធនិយោជកកម្ពុជា (CAFEBA) បានវាយតម្លៃខ្ពស់ចំពោះលទ្ធផលការងារ ដែលយើងរួមគ្នាបំពេញប្រកបដោយភាពជោគជ័យ ក្នុងរយៈពេលកន្លងមក ដែលចូលរួមអភិវឌ្ឍសេដ្ឋកិច្ចជាតិព្រមទាំងធានាបាននូវការបន្តរក្សាបាននូវកំណើនសេដ្ឋកិច្ចជាមធ្យមជាង ៧% រយៈពេលពីរទស្សវត្តន៍កន្លងមកនេះ៕