(ភ្នំពេញ)៖ ដោយមានការអំពាវនាវស្វែងរកសប្បុរសជន ពីប្រធានមន្ទីរពេទ្យកុមារគន្ធបុប្ផា និងយល់ឃើញថាការបរិច្ចាគឈាមជួយជនរងគ្រោះ និងអ្នកត្រូវការឈាមជាចាំបាច់ ក្នុងការព្យាបាលដើម្បីសង្គ្រោះជិវិតឡើងវិញ នាល្ងាចថ្ងៃទី១២ ខែធ្នូ ឆ្នាំ២០១៩នេះ ក្រុមគ្រូពេទ្យ និងបុគ្គលិករបស់មន្ទីរពេទ្យទន្តសាស្ត្រ រំចង់ ចំនួន១៥នាក់ បានស្ម័គ្រចិត្តបរិច្ចាគឈាម ជូនដល់មន្ទីរពេទ្យកុមារគន្ធបុប្ផាទី៤ នៅរាជធានីភ្នំពេញ ក្នុងឱកាសគម្រប់ខួប២៤ឆ្នាំរបស់មន្ទីរពេទ្យទន្តសាស្ត្រ រំចង់។
ការចូលរួមចំណែកជួយដល់សង្គមមួយនេះ ក្រុមគ្រូពេទ្យ និងបុគ្គលិករបស់មន្ទីរពេទ្យទន្តសាស្ត្រ រំចង់ តែងតែធ្វើឡើងជារៀងរាល់ឆ្នាំ ចាប់តាំងពីឆ្នាំ២០១៣មកម្ល៉េះ។
នេះជាលើកទី៧ហើយ ដែលក្រុមរំចង់បានរួមគ្នាបរិច្ចាគឈាមជូនដល់មន្ទីរពេទ្យកុមារគន្ធបុប្ផា ដើម្បីចូលរួមផ្តល់លទ្ធភាពឱ្យមន្ទីរពេទ្យរក្សាបាននូវសេវាព្យាបាល ប្រកបដោយគុណភាព ជូនកុមារ និងស្រ្តីកម្ពុជា តទៅមុខទៀត។
ទន្ទឹមនឹងនោះ គណៈគ្រប់គ្រង និងបុគ្គលិករបស់ មន្ទីរពេទ្យទន្តសាស្ត្រ រំចង់ ក៏បានអំពាវនាវ និងលើកទឹកចិត្តដល់សាធារណៈជនទាំងអស់ ឲ្យចូលរួមក្នុងការបរិច្ចាគឈាម ដើម្បីជួយសង្គ្រោះជីវិតជនរងគ្រោះ និងអ្នកជំងឺគ្រប់វ័យ ដែលត្រូវការឈាមជាចាំបាច់។
ក្នុងឱកាសខួបទី ២៤ឆ្នាំ របស់មន្ទីរពេទ្យទន្តសាស្រ្ត រំចង់ គណៈគ្រប់គ្រង និងបុគ្គលិកទាំងអស់ សូមថ្លែងអំណរគុណដល់អតិថិជន ដែលជានិច្ចជាកាលតែងតែស្រលាញ់ គាំទ្រ និងជ្រើសរើស រំចង់ ជាពេទ្យធ្មេញប្រចាំគ្រួសាររបស់លោកអ្នកជារៀងរហូតមក៕
