(កំពង់ចាម)៖ មន្ត្រីមន្ទីរធនធានទឹក និងឧតុនិយម ខេត្តកំពង់ចាម រួមជាមួយអាជ្ញាធរស្រុកបាធាយ នៅថ្ងៃទី០៣ ខែធ្នូឆ្នាំ ២០១៩នេះ កំពុងសម្រុកបូមទឹក ដើម្បីសង្គ្រោះស្រែប្រាំង ជូនប្រជាពលរដ្ឋប្រមាណជាង១,០០០ហិកតា។
បើតាមលោក អ៊ុម វិបុល ប្រធានមន្ទីរធនធានទឹក និងឧតុនិយម ខេត្តកំពង់ចាម បានឱ្យដឹងថា ដោយមានការណែនាំពីលោក អ៊ុន ចាន់ដា អភិបាលខេត្តកំពង់ចាម បន្ទាប់ពីទទួលបានព័ត៌មានថា ស្រូវប្រជាពលរដ្ឋជាច្រើនហិកតា នៅក្នុងឃុំមេព្រីង និងឃុំតាំងក្រសាំង ក្នុងស្រុកបាធាយ ជួបប្រទះគ្រោះរាំងស្ងួត ទើបមន្ទីរធនធានទឹក និងឧតុនិយមខេត្តកំពង់ចាម បានសហការជាមួយអាជ្ញាធរស្រុកបាធាយ ដឹកនាំក្រុមការងារ ចុះអន្តរាគមន៍បន្ទាន់ បូមទឹកជួយសង្រ្គោះស្រូវប្រាំជាបន្តបន្ទាប់ ចាប់តាំងពីថ្ងៃទី០១ ខែធ្នូ រហូតមកដល់ថ្ងៃទី៣ ខែធ្នូ ឆ្នាំ២០១៩នេះ ដោយក្នុងនោះស្រូវប្រាំងរបស់ប្រជាពលរដ្ឋមានប្រមាណជាង១០០០ហិកតា ដែលត្រូវសង្គ្រោះ។
លោក ផេន សុផល អភិបាលស្រុកបាធាយបានឱ្យដឹងថា ការចុះអន្តរាគមន៍បូមទឹកជួយសង្រ្គោះដំណាំស្រូវ របស់ប្រជាពលរដ្ឋនោះ ក្នុងឃុំតាំងក្រសាំង ក្រុមការងារការងារមន្ទីរ ធនធានទឹកខេត្ត បានប្រើប្រាស់ម៉ាស៊ីនកម្លាំង២៥សេស ចំនួនជាង១០គ្រឿង និងនៅឃុំមេព្រីងជិត១០គ្រឿងទៀត ដើម្បីទាញយកទឹកសង្គ្រោះស្រូវប្រជាពលរដ្ឋប្រមាណជាជាង ១០០០ហិកតា។
លោកអភិបាលស្រុកឱ្យដឹងទៀតថា ទន្ទឹមនឹងនោះក៏មានស្រូវប្រជាពលរដ្ឋមួយចំនួនផងដែរ ដែលមិនអាចសង្គ្រោះបានដោយសារ នៅឆ្ងាយពីប្រភពទឹក។
លោកអភិបាលស្រុកបាធាយបានបញ្ជាក់ថា ចាប់ពីថ្ងៃទី០១ មកដល់ថ្ងៃទី០៣ ខែធ្នូនេះ អាជ្ញាធរស្រុករួមសហការជាមួយនឹងមន្ត្រីជំនាញ នៃមន្ទីរធនធានទឹក និងឧតុនិយមខេត្ត កំពង់ចាម កំពុងបន្តសម្រុកបូមទឹកសង្គ្រោះស្រែប្រាំងប្រជាពលរដ្ឋ ហើយការសង្គ្រោះនេះមន្ត្រីជំនាញ និងជួយឱ្យអស់ពីលទ្ធភាព ដោយមិនបានដឹងថាត្រូវបញ្ឈប់ការបូបទឹកនេះ នៅពេលណានោះទេ៕
