(ភ្នំពេញ)៖ សិក្ខាសាលាបូកសរុបលទ្ធផលការងារបុគ្គលិករយៈពេល ៥ឆ្នាំ (២០១៥-២០១៩) និងទិសដៅអនុវត្តបន្ត (២០២០-២០២៤) ដែលរៀបចំឡើងដោយនាយកដ្ឋានបុគ្គលិក ក្រសួងការពារជាតិ បានដំណើរការនាព្រឹកថ្ងៃទី២៦ ខែវិច្ឆិកា ឆ្នាំ២០១៩នេះ ក្រោមអធិបតីភាពនាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ។

ថ្លែងនៅក្នុងពិធីបើកសិក្ខាសាលានាឱកាសនោះ នាយឧត្តមសេនីយ៍ វង្ស ពិសេន បានគូសបញ្ជាក់ថា រាជរដ្ឋាភិបាលដែលមានសម្តេចតេជោ ហ៊ុន សែន ជាប្រមុខ បានដាក់ចេញនូវការអនុវត្តយ៉ាងម៉ឺងម៉ាត់កម្មវិធីកំណែទម្រង់ទាំងឡាយ ដើម្បីឲ្យមានលក្ខណៈកាន់តែទូលំទូលាយ និងស៊ីជម្រៅ។

ដោយឡែក លើកំណែទម្រង់កងយោធពលខេមរភូមិន្ទ គឺជាជម្រើសដែលមិនអាចខ្វះបាន ដើម្បីពង្រឹង ពង្រីកសមត្ថភាព លទ្ធភាព និងសក្កានុពលភាពរបស់កងទ័ពទៅតាមការវិវត្តន៍រីកចម្រើន របស់សង្គមនៃសម័យបច្ចេកវិជ្ជាទំនើប។

លើប្រសិទ្ធភាព នៃការដឹកនាំបញ្ជា និងគ្រប់គ្រងកម្លាំង នាយឧត្តមសេនីយ៍ អគ្គមេបញ្ជាការ បានស្នើឲ្យអង្គសិក្ខាសាលាត្រូវយកចិត្តទុកដាក់ពិនិត្យនូវការកំណត់ទិសដៅភារកិច្ច សម្រាប់ពេលខាងមុខដើម្បី បំពេញបន្ថែម ឬសំណូមពរចាំបាច់នានា សំខាន់លើបញ្ហាធ្វើកំណែទម្រង់លើគ្រប់វិស័យ ក្នុងនោះពាក់ព័ន្ធការបុគ្គលិករួមមាន៖

*ទី១៖ ការកែសម្រួលរចនាសម្ព័ន្ធចាត់តាំងមានលក្ខណៈសមស្រប ដែលបច្ចុប្បន្ននៅមានភាពសំពីងសំពោង ត្រួតគ្នា រវាងក្រសួងការពារជាតិ និងអគ្គបញ្ជាការ ក៏ដូចជាបណ្តាប្រភេទទ័ព យោធភូមិភាគ និងទ័ពជំនាញ។
*ទី២៖ ការគ្រប់គ្រងកម្លាំង ដឹកនាំបញ្ជាកម្លាំងទ័ព ត្រូវសមស្របតាមក្របខ័ណ្ឌកំណត់ ចៀសវាងការប្រមូលផ្តុំកម្លាំងនៅស្ថាប័នបំរើសេវាលើសការកំណត់ ការគ្រប់គ្រងកម្លាំងទ័ពត្រូវមានការឯកភាព និងការគ្រប់គ្រងតាមប្រព័ន្ធព័ត៌មានវិទ្យា។
*ទី៣៖ ការតែងតាំងផ្លាស់ប្តូរមុខងារ និងឋានន្តរស័ក្តិ កុំឲ្យពិភក្សាលំអិតលើគម្រោងផែនការដែលជំនាញបានដាក់ឲ្យ ដោយផ្អែកលើច្បាប់ស្តីពីលក្ខន្តិកៈទូទៅចំពោះយោធិន នៃកងយោធពលខេមរភូមិន្ទ និងបទដ្ឋានគតិយុត្តិនានា។
*ទី៤៖ ការដាក់យោធិនឲ្យចូលនិវត្តន៍តាមច្បាប់កំណត់ តាមសេចក្តីណែនាំរបស់ក្រសួងការពារជាតិ និងអគ្គបញ្ជាការដ្ឋាន។
*ទី៥៖ ការជ្រើសរើសទ័ពបំពេញក្របខ័ណ្ឌ ត្រូវយកចិត្តទុកដាក់សម្រិតសម្រាំងតាមលក្ខខណ្ឌកំណត់ ដើម្បីធានាបានទាំងបរិមាណ និងគុណភាណ។
*ទី៦៖ ការបណ្តុះបណ្តាល ត្រូវជ្រើសរើសនាយទាហាន នាយទាហានរង និងពលទាហាន មានស្នាដៃល្អ និងមានអនាគតរីកចម្រើន និងប្រើប្រាស់សមស្របតាមមុខជំនាញ ដែលបានបណ្តុះបណ្តាល។
*ទី៧៖ ការងារសន្តិសុខផ្ទៃក្នុងត្រូវយកចិត្តទុកដាក់ជ្រើសរើស និងប្រើប្រាស់យោធិនឲ្យគោរពច្បាប់ មានភាពស្មោះត្រង់ចំពោះជាតិ សាសនា ព្រះមហាក្សត្រ និងគោរពច្បាប់បង្ការ ទប់ស្កាត់ការជ្រៀតចូលកម្លាំងអមិត្តក្នុងកងយោធពលខេមរភូមិន្ទ។

សូមបញ្ជាក់ថា អង្គសិក្ខាសាលាបូកសរុបការងារបុគ្គលិករយៈពេល ៥ឆ្នាំ នឹងដំណើរការរយៈពេល ២ថ្ងៃ នៅសាកលវិទ្យាល័យការពារជាតិ ដែលមានសមាសភាពចូលរួមពីបណ្តាប្រភេទទ័ពជំនាញ យោធភូមិភាគ តំបន់ប្រតិបត្តិការសឹករង ព្រមទាំងថ្នាក់ដឹកនាំស្ថាប័ន និងបណ្តាសាលាចំណុះក្រសួងការពារជាតិ និងអគ្គបញ្ជាការដ្ឋាន៕