(កំពង់ចាម)៖ មន្ត្រីសាខាកាំកុងត្រូលខេត្តកំពង់ចាម សហការជាមួយមន្ទីរពេទ្យពាណិជ្ជកម្មខេត្ត និងអាជ្ញាធរដែនដី នៅថ្ងៃទី១៩ ខែវិច្ឆិកា ឆ្នាំ២០១៩នេះ បានចុះត្រួតពិនិត្យទំនិញ នៅផ្សារស្រែវាល ឃុំមេសរជ្រៃ ស្រុកស្ទឹងត្រង់ ខេត្តកំពង់ចាម ដោយបានរកឃើញទំនិញ ហួសកាលបរិច្ឆេទប្រើប្រាស់មួយចំនួន និងដកហូតភ្លាមៗយកទៅកម្ទេចចោល។

មន្រ្តីសាខាកាំកុងត្រូល ខេត្តកំពង់ចាម បានឲ្យដឹងថា ក្រោយពេលចុះត្រួតពិនិត្យនោះ ក្រុមការងារបានរកឃើញទំនិញ ហួសការប្រើប្រាស់មួយចំនួនដូចជា៖ នំលីលី៤៨កញ្ចប់, coca cola ៣៩ដប, ទឹក reddragon ១៦ ដប ទឹក AD ១០ដប, ទឹក G park ៦កំប៉ុង, ទឹក AQU Rius ៧ដប, ចាហួយ Dee Do ២៩ដប។

មន្រ្តីបានបន្តទៀតថា ក្នុងឱកាសនោះ មន្ដ្រីជំនាញ ក៏បានចែកផ្សាយនូវរូបភាព Poster និងផ្សព្វផ្សាយដល់អាជីវករអ្នកលក់ដូរ អ្នកប្រើប្រាស់ឲ្យបានយល់ ដឹងអំពីផលវិបាកដែលបណ្តាលមកពីការ បរិភោគអាហារ ហួសកាលបរិច្ឆេទ ប្រើប្រាស់ និងការដាក់លាយបន្ថែមសារធាតុគីមី ហាមឃាត់ចូលក្នុងម្ហូបអាហារផងដែរ។

ទន្ទឹមនឹងនេះ ក្រុមការងារ បានធ្វើការណែនាំ ដល់អាជីវករឲ្យជៀសវាង ក្នុងការប្រើប្រាស់សារធាតុគីមីបន្ថែម ទៅលើផលិតផលម្ហូបអាហារ ឬការកែច្នៃម្ហូបអាហារ ដែលធ្វើឲ្យមានគ្រោះថ្នាក់ដល់សុខភាព និងបានណែនាំ អាជីវករឲ្យយល់ដឹងពីអនាម័យ និងការរៀបចំទំនិញលក់ដូរ ឲ្យមានសណ្តាប់ធ្នាប់ទៅ តាមប្រភេទទំនិញហូបចុក និងទំនិញប្រើប្រាសផ្សេងៗ ដាក់ដាច់ដោយឡែកៗពីគ្នា។

ជាមួយគ្នានោះ សាខាកាំកុងត្រូលខេត្តកំពង់ចាម បានអំពាវនាវដល់អាជីវករ អ្នកលក់ដូរទាំងអស់ ឲ្យប្រុងប្រយ័ត្ន និងយកចិត្តទុកដាក់ខ្ពស់ ចំពោះការចែកចាយ ព្រមទាំងនាំចូលទំនិញមកលក់បន្ដ៕