(ព្រៃវែង)៖ ក្រៅពីការពង្រឹងការការពារ សន្ដិសុខ សណ្ដាប់ធ្នាប់ និងសុវត្ថិភាពនៅតាមមូលដ្ឋាន និងតាមច្រកព្រំដែននោះ កងកម្លាំងអាវុធហត្ថទូទាំងខេត្តព្រៃវែង នៅព្រឹកថ្ងៃទី០៩ ខែវិច្ឆិកា ឆ្នាំ២០១៩នេះ បានចូលរួមពិធីពិសាអំបុកការពារជាតិ សាសនា និងព្រះមហាក្សត្រ។

ពិធីដែលបានធ្វើឡើងយ៉ាងសប្បាយរីករាយ តាមការអំពាវនាវរបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជានេះ។

មន្រ្តីអាវុធហត្ថបានឲ្យដឹងថា ការរៀបចំពិធីអកអំបុកថ្ងៃនេះ គឺដើម្បីអបអរសាទរដល់បុណ្យឯករាជ្យជាតិ ក៏ដូចជា បង្ហាញអំពីការសាមគ្គី របស់ប្រជាពលរដ្ឋ ក្នុងការទទួលទានអំបុកដើម្បី ការពារសន្តិភាព ការពារជាតិ សាសនា ព្រះមហាក្សត្រ។ ការទទួលទានអំបុកនេះ ក៏ជាការឆ្លើយតប ចំពោះក្រុមក្បត់ជាតិ ដែលចង់បំផ្លិចបំផ្លាញដល់សន្តិភាព ដោយបង្ហាញថា ប្រជាពលរដ្ឋស្រលាញ់សន្តិភាព មិនចាញ់ឧបាយកលជនក្បត់ជាតិឡើយ។

ដោយឡែក នៅសួនច្បារ «សម្តេច ជា ស៊ីម» ក៏មានមន្ត្រីរាជការតាមមន្ទីរជុំវិញខេត្ត ប្រជាពលរដ្ឋ សិស្សានុសិស្សយ៉ាងច្រើនកុះករ ចូលរួមដាល់អំបុក ហូបជួបជុំគ្នា បង្ហាញពីភាពស្និទស្នាល ខ្មែរស្រឡាញ់ខ្មែរ រួបរួមគ្នាថែរក្សាសន្តិភាព ជាមួយនិងសំឡេងចេញពីភាសាបេះដូងនៃជនរួមជាតិយ៉ាងដូច្នេះថា៖ «យើងចូលរួមកសាងអំពើល្អ ចែករំលែកក្តីស្រឡាញ់ និងស្នាមញញឹមគ្រប់ទីកន្លែង»។

សូមបញ្ជាក់ថា សម្តេចតេជោ ហ៊ុន សែន បានដាក់ចេញនូវចលនា ទទួលទានអំបុកការពារជាតិ សាសនា ព្រះមហាក្សត្រ នៅទូទាំងប្រទេស ដើម្បីឆ្លើយតបទៅនឹងការអំពាវនាវរបស់ លោក សម រង្ស៉ី ឱ្យប្រជាពលរដ្ឋបះបោផ្តួលរំលំរាជរដ្ឋាភិបាល នៅថ្ងៃទី០៩ ខែវិច្ឆិកា ឆ្នាំ២០១៩នេះ៕