(ភ្នំពេញ)៖ គណៈកម្មការជ្រើសរើសយុវជនស្ម័គ្រចិត្ត ចូលបម្រើកងយោធពលខេមរភូមិន្ទបំពេញក្របខ័ណ្ឌឱ្យកងទ័ពជើងគោក បានសេចក្តីជូនដំណឹងស្តីពី ការទប់ស្កាត់ភាពមិនប្រក្រតី នៅក្នុងដំណើរការជ្រើសរើសយុវជនស្ម័គ្រចិត្តចូលបម្រើកងយោធពលខេមរភូមិន្ទ បំពេញក្របខ័ណ្ឌឱ្យកងទ័ពជើងគោក។

យោងតាមសេចក្តីជូនដំណឹងកាលពីថ្ងៃទី១ ខែវិច្ឆិកា, សាធារណជន ជាពិសេសយុវជន ដែលមានបំណងចូលបម្រើការងារជាយោធិនក្នុងក្របខ័ណ្ឌកងទ័ពជើងគោកឱ្យបានជ្រាបថា ដើម្បីផ្តល់ឱកាសប្រកបដោយតម្លាភាព និងយុត្តិធម៌ដល់យុវជនទូទៅក្នុងការដាក់ពាក្យចូលបម្រើកងយោធពលខេមរភូមិន្ទ ជាពិសេសចូលរួមទប់ស្កាត់ក្នុងករណីមានបុគ្គលមួយចំនួនឆ្លៀតឱកាស កេងចំណេញ តាមរយៈការធ្វើសកម្មភាពសូកប៉ាន់ផ្សេងៗប្រាសចាកគោលការណ៍កំណត់របស់រាជរដ្ឋាភិបាល និងក្រសួងការពារជាតិ គណៈកម្មការសូមអំពាវនាវដល់សាធារណជន អាណាព្យាបាល និងបេក្ខជនទាំងអស់ សហការផ្តល់ព័ត៌មានបន្ទាន់ក្នុងករណីមានបុគ្គលណាទារលុយ ឬតម្រូវឱ្យបង់ប្រាក់ជាថ្នូរនឹងការចែកពាក្យ ទទួលពាក្យ ដើម្បីទទួលបានក្របខ័ណ្ឌ។

គណៈកម្មការសូមធ្វើការបញ្ជាក់ជាថ្មីម្តងទៀតថា «រាល់ការស្ម័គ្រចិត្តដាក់ពាក្យសុំបម្រើការងារក្នុងក្របខ័ណ្ឌកងទ័ពជើងគោក គឺមិនតម្រូវឱ្យបេក្ខជនបង់ប្រាក់ឡើយ។ រាល់បុគ្គលដែលប្រព្រឹត្តខុសនឹងគោលការណ៍ខាងលើនេះត្រូវទទួលខុសត្រូវចំពោះមុខច្បាប់ជាធរមាន»។

ករណីមានបុគ្គលឆ្លៀតឱកាសដូចជម្រាបជូនខាងលើ សូមសាធារណជន អាណាព្យាបាល និងបេក្ខជនទាំងអស់ សហការផ្តល់ព័ត៌មានមកក្រុមការងារដោយផ្ទាល់តាមទូរស័ព្ទលេខ 081319662 /081 319 688/ 099 306 162 / 099 253 677 /097 5 920 420/ 097 5 920 189។

គណៈកម្មការជ្រើសរើសយុវជនស្ម័គ្រចិត្តចូលបម្រើកងយោធពលខេមរភូមិន្ទបំពេញក្របខ័ណ្ឌឱ្យកងទ័ពជើងគោក សូមថ្លែងអំណរគុណយ៉ាងជ្រាលជ្រៅចំពោះសាធារណជន អាណាព្យាបាល និងបេក្ខជនទាំងអស់ ដែលសហការគាំទ្រដល់ដំណើរការជ្រើសរើសនេះឱ្យទទួលបានជោគជ័យ និងប្រសិទ្ធភាពខ្ពស់៕