(ភ្នំពេញ)៖ រដ្ឋបាលរាជធានៅភ្នំពេញ សូមចូលរួមរំលែកទុក្ខ ដោយសេចក្តីសោកស្តាយ អាឡោះអាល័យជាទីបំផុត ចំពោះការយាងទទួល ព្រះអនិច្ចធម្មរបស់ សម្តេចព្រះធម្មលិខិតកិត្តិបណ្ឌិត លាស់ ឡាយ សម្តេចព្រះសង្ឃនាយករងទី១ ព្រះប្រធានថេរសភាសង្ឃ នៃព្រះពុទ្ធសាសនា នៅព្រះរាជាណាចក្រកម្ពុជា និងជាព្រះចៅអធិការវត្តសន្សំកុសល ដែលព្រះអង្គបានបូជាព្រះកាយ ក្នុងមួយព្រះជន្មរបស់ព្រះអង្គ ឧទ្ទិសដើម្បីព្រះពុទ្ធសាសនា បានគង់វង្ស និងចម្រើនរុងរឿង ពុទ្ធបរិស័ទចូលរួមគោរពប្រតិបត្តិតាមគន្លងឱវាទ។

ក្នុងនាមក្រុមប្រឹក្សា គណៈអភិបាល មន្ត្រីរាជការ កងកម្លាំង និងប្រជាពលរដ្ឋទាំងអស់ក្នុងរាជធានីភ្នំពេញ ទូលព្រះបង្គំ យើងខ្ញុំព្រះករុណា ទាំងអស់គ្នា មានក្តីរន្ធត់ចិត្តឥតឧបមា និងមានសេចក្តីត្រៀមក្រំជាពន់ពេក រកអ្វីប្រៀបផ្ទឹមពុំបាន ចំពោះការទទួល ព្រះអនិច្ចធម្មរបស់ សម្តេចព្រះធម្មលិខិតកិត្តិបណ្ឌិត លាស់ ឡាយ កាលពីថ្ងៃអង្គារ ២កើត ខែកត្តិក ឆ្នាំកុរ ឯកស័កព.ស ២៥៦៣ ត្រូវនឹងថ្ងៃទី២៩ ខែតុលា ឆ្នាំ២០១៩ វេលាម៉ោង១៥៖00 នាទី ក្នុងព្រះជន្មាយុ ១០៦ ព្រះវស្សា ដោយព្រះជរាពាធ។

នៅក្នុងសារលិខិតរំលែកទុក្ខ របស់រដ្ឋបាលរាជធានីភ្នំពេញ បានឱ្យដឹងថា ស្ថិតក្នុងក្តីវិយោគដ៏សែនសោកសង្រេងខ្សឹបខ្សួលរំជួលចិត្តឥតឧបមាទនេះ ទូលព្រះបង្គំ យើងខ្ញុំព្រះករុណាទាំងអស់គ្នា សូមចូលរួមរំលែក ព្រះរាជមរណទុក្ខ ប្រកបដោយក្តីក្លូកក្កលជាទីបំផុត និងពោរពេញទៅដោយសេចក្តី សោកស្ដាយសង្វេគស្រណោះអាឡោះអាល័យយ៉ាងក្រៃលែង ចំពោះការបាត់បង់ សម្ដេចព្រះធម្មលិខិតកិត្តិបណ្ឌិត លាស់ ឡាយ ដែលជាមន្ត្រីជាន់ខ្ពស់ នៃព្រះរាជាណាចក្រកម្ពុជា ប្រកបដោយព្រហ្មវិហារធម៌ ចំណេះដឹង និងទឹកព្រះទ័យជ្រះ ថ្លាបំផុតក្នុងវិស័យព្រះពុទ្ធសាសនា។

ព្រះអនិច្ចធម្មរបស់ព្រះអង្គ គឺជាការបាត់បង់សមាណសង្ឃ ជាពហុស្សតដ៏ឆ្នើមបំផុត ក្នុងការបើកស្ទួយតម្លៃព្រះពុទ្ធ សាសនា និងជាព្រះកវីនិពន្ធ ពោលពេញដោយព្រះពុទ្ធិជ្រៅជ្រះ ដែលស្ទើរពេញមួយជីវិត ព្រះអង្គបានបន្សល់ទុកនូវស្នាព្រះហស្ត ច្រើនឥតគណនា ក្នុងវិស័យពុទ្ធចក្រ អាណាចក្រ និងរួមចំណែកព្រះរបរិច្ចាគ ទ្រទ្រង់ចលនាមនុស្សធម៌កាកបាទក្រហមកម្ពុជា ដោយព្រះសទ្ធាជ្រះថ្លា បរិសុទ្ធវិសេសវិសាលបំផុត។

ក្នុងឱកាសសមានទុក្ខដ៏សែនក្រៀមក្រំនេះ ទូលព្រះបង្គំ យើងខ្ញុំព្រះករុណាទាំងអស់គ្នា សូមចូលរួមរំលែកនូវព្រះរាជ មរណទុក្ខដោយសេចក្តី សង្វេគជាទីបំផុត និងវិទ្យាឧទ្ធិសបូងសួងដល់ព្រះវិញ្ញាណក្ខន្ធរបស់ សម្តេចព្រះធម្មលិខិតកិត្តិបណ្ឌិត លាស់ ឡាយ សូមយាងនិមន្តសោយសុខ ក្នុងសុគតិភព កុំបីឃ្លៀងឃ្លាតឡើយ៕