(ពោធិ៍សាត់)៖ លោក ម៉ៅ ធនិន អភិបាលខេត្តពោធិ៍សាត់ បានអញ្ជើញជាអធិបតី បើកមហាសន្និបាតអាណត្តិទី៣ សមាគមក្រុមប្រឹក្សាក្រុង ស្រុក ឃុំ សង្កាត់ ខេត្តពោធិ៍សាត់ ដែលបានការគាំទ្រដោយរដ្ឋបាលខេត្ត សហគមអឺរ៉ុប និងសម្ព័ន្ធភាពជាតិ ក្រុមប្រឹក្សាថ្នាក់មូលដ្ឋាន ដែលបានប្រារព្ធធ្វើឡើងនៅសាលប្រជុំសាលាខេត្ត រយៈពេល២ថ្ងៃ ដើម្បីពិនិត្យ និងអនុម័ត នូវរចនាសម្ព័ន្ធអភិបាលកិច្ចសមាគម និងប្រតិភូទៅចូលរួមនៅក្នុងក្រុមប្រឹក្សាជាតិ និងដោយមានការចូលរួមពីលោក សយ កុសល ប្រធានសម្ព័ន្ធភាពជាតិ ក្រុមប្រឹក្សាថ្នាក់មូលដ្ឋាន និងលោក សំរឹទ្ធ អេង ប្រធានក្រុមប្រឹក្សាក្រុងពោធិ៍សាត់ រួមទាំងមានអ្នកចូលរួមប្រមាណជាង ២០០នាក់។
លោក សយ កុសល និងលោក ម៉ៅ ធនិន បានថ្លែងក្នុងពិធីបើកមហាសន្និបាតនាថ្ងៃទី២៤ ខែតុលា ឆ្នាំ២០១៩ថា សមាគមក្រុមប្រឹក្សាថ្នាក់មូលដ្ឋានខេត្តពោធិ៍សាត់ ត្រូវបានបង្កើតឡើង តាមរយៈមហាសន្និបាត នៅថ្ងៃទី២១-២២ ខែវិច្ឆិកា ឆ្នាំ២០១៣ ក្នុងគោលបំណងលើកកម្ពស់ឋានៈ អភិវឌ្ឍសមត្ថភាព ការពារផលប្រយោជន៍ គុណប្រយោជន៍ ពង្រឹងនីតិរដ្ឋស្របច្បាប់ ជំរុញលទ្ធិប្រជាធិបតេយ្យនៅមូលដ្ឋាន និងសុខុមាលភាពរបស់ប្រជាពលរដ្ឋ តាមរយៈគណនេយ្យភាព តម្លាភាព និងប្រសិទ្ធិភាព នៃការផ្តល់សេវាសាធារណនៅមូលដ្ឋាន ដែលក្នុងនោះខេត្តពោធិ៍សាត់ មានក្រុមប្រឹក្សាក្រុង ស្រុក ចំនួន១២១រូប និង ឃុំ សង្កាត់ មានចំនួន៣៤៣រូប។
ថ្នាក់ដឹកនាំទាំង២បានថ្លែងទៀតថា មហាសន្និបាតអាណត្តិទី៣ របស់សមាគមក្រុមប្រឹក្សានេះ រៀបចំឡើងក្នុងគោលបំណងបង្កើនការយល់ដឹង អំពីការអនុវត្តតួនាទី ភារកិច្ច និងដាក់ចេញនូវផែនការអភិវឌ្ឍស្ថាប័ន តាមរយៈការបូកសរុប និងឆ្លុះបញ្ចាំង លទ្ធផលការងារសម្រេចបានរយៈពេល៥ឆ្នាំ (២០១៤-២០១៩)។ ជាមួយគ្នានោះអង្គសន្និបាត ក៏បានផ្តល់ឱកាសដល់ថ្នាក់ដឹកនាំ និងសមាជិកពិនិត្យ ឆ្លុះបញ្ចាំង រៀនសូត្រពីគ្នា ទៅវិញទៅមក និងកំណត់បាននូវបញ្ហាប្រឈម និងរកដំណោះស្រាយ។
ថ្នាក់ដឹកនាំទាំង២បានលើកឡើងថា សមាគមក្រុមប្រឹក្សា ថ្នាក់មូលដ្ឋាខេត្តពោធិ៍សាត់ទាំងអស់ ខិតខំបន្ត និងចូលរួមអនុវត្តគម្រោង លើកកម្ពស់សមត្ថភាពស្ថាប័ន និងការប្រតិបត្តិ ដើម្បីធានានូវការពេញចិត្ត របស់សមាជិកក្រុមប្រឹក្សាមូលដ្ឋាន ទាំងការងារគ្រប់គ្រងដឹកនាំ បំពេញមុខងារ និងការទទួលខុសត្រូវ។ ក្នុងអាណត្តិទី៣នេះ សមាគមក្រុមប្រឹក្សា ត្រូវផ្តោតការយកចិត្តទុកដាក់ ក្នុងការផ្តល់សេវាសាធារណៈកាន់តែរហ័ស និងកាន់តែគួរឲ្យទុកចិត្ត ឆ្លើយតបចំពោះតម្រូវការរបស់ប្រជាពលរដ្ឋ។
ថ្នាក់ដឹកនាំទាំង២បានបញ្ជាក់ទៀតថា ជាមួយគ្នានោះមានកិច្ចសហការជាមួយអង្គការដៃគូអភិវឌ្ឍន៍ និងវិស័យឯកជនក្នុង ការចូលរួមជួយជ្រោមជ្រែងក៏ដូចជួយដោះស្រាយទុកកង្វល់នានារបស់ប្រជាពលរដ្ឋ ជាពិសេសស្ត្រីក្រីក្រ កុមារកំព្រា និងក្រុមជនងាយរងគ្រោះ។ តាមរយៈមហាសន្និបាតនេះ ក្នុងនាមរដ្ឋបាលខេត្ត សូមឲ្យសមាជិក សមាជិកាទាំងអស់ មេត្តាយកចិត្តទុកដាក់ស្តាប់ ពិភាក្សា និងអនុម័តលក្ខន្តិកៈ ព្រោះថាសមាគមក្រុមប្រឹក្សាថ្នាក់មូលដ្ឋាន គឺជាដៃគូររបស់រាជរដ្ឋាភិបាល នៅក្នុងដំណើរការកំណែទម្រង់វិមជ្ឈការ និងវសហមជ្ឈការនៅកម្ពុជា។
ក្នុងថ្ងៃដដែលនោះ បន្ទាប់ពីអញ្ជើញបើកមហាសន្និបាតអាណត្តិទី៣ សមាគមក្រុមប្រឹក្សាក្រុង ស្រុក ឃុំ សង្កាត់ ខេត្តពោធិ៍សាត់ និងថតរូបទុកជាអនុស្សាវរីយ៍រួចមក, លោក ម៉ៅ ធនិន បានបន្តជួបសំណេះសំណាល និងដោះស្រាយបញ្ហាប្រឈម ក៏ដូចជាសំណូមពរមួយចំនួន ជូនបងប្អូនពុកម៉ែប្រជាពលរដ្ឋ បានជាច្រើនករណី នៅអគារបូរាណខេត្តផងដែរ៕
