(កំពង់ចាម)៖ អាវរងាដែលជាអំណោយរបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ត្រូវបានយកទៅចែកជូនមន្ដ្រីអាវុធហត្ថជាច្រើននាក់ នៅទូទាំងខេត្តកំពង់ចាម។
ពិធីនេះ ត្រូវបានធ្វើឡើងនៅរសៀលថ្ងៃទី២៤ ខែតុលា ឆ្នាំ២០១៩នេះ នៅក្នុងបញ្ជាការដ្ឋានកងរាជអាវុធហត្ថខេត្ត ក្រោមអធិបតីភាព លោកឧត្តមសេនីយ៍ត្រី សោ សាវឿន មេបញ្ជាការកងរាជអាវុធហត្ថខេត្តកំពង់ចាម ក្នុងឱកាសដឹកនាំកិច្ចប្រជុំផ្សព្វផ្សាយសភាពការណ៍ថ្មីៗ (ឧបាយកល សកម្មភាពពួកឧទ្ទាម) និងការងារអប់រំចិត្តសាស្ដ្រកងរាជអាវុធហត្ថ។
លោកឧត្តមសេនីយ៍ត្រី សោ សាវឿន បានបញ្ជាក់ថា អំណោយនេះមិនមែនចែកជូនតែឥឡូវនេះទេ គឺចែកជូនជារៀងរាល់ឆ្នាំ សម្តេចតែងតែយកចិត្តទុកដាក់ នាពេលរដូវភ្លៀង លោកតែងតែយកអាវភ្លៀងមកជូន នៅពេលរដូវរងារលោកតែងតែយកអាវរងារមកជូន។
សូមជម្រាបថា ក្នុងកិច្ចប្រជុំគណៈរដ្ឋមន្ត្រី នៅថ្ងៃទី១១ ខែតុលា ឆ្នាំ២០១៩ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាឲ្យយកអាវរងាប្រមាណ ៤ម៉ឺនអាវ ទៅចែកជូនកងកម្លាំងប្រដាប់នៅទិសភូមិភាគទី១, ទី៤ និងទី៥។
សម្តេចតេជោ ហ៊ុន សែន ក៏បានបញ្ជាឲ្យចែកអាវរងានេះ រហូតដល់គ្រប់៨ម៉ឺនអាវជូនកងកម្លាំងប្រដាប់អាវុធគ្រប់ទិស ដែលកំពុងឈរជើងតាមខ្សែបន្ទាត់ព្រំដែន និងតាមបណ្តាកោះក្នុងដែនសមុទ្រ ដែលតែងតែងខិតខំថែរក្សាការពារសុខសន្តិភាព និងបូរណភាពទឹកដី ជាតិមាតុភូមិដោយអង់អាចក្លាហាន និងឥតងាករេ។
សម្តេចតេជោ ហ៊ុន សែន ត្រូវបានកងទ័ពប្រសិទ្ធនាមជាអគ្គភស្តុភារបស់កងទ័ព ដោយសម្តេចតេជោតែងតែ ផ្គត់ផ្គង់រាល់តម្រូវការរបស់កងទ័ព មិនដែលឲ្យខ្វះនោះឡើយទាំងសម្ភារប្រើប្រាស់ និងគ្រឿងឧបភោគបរិភោគ រួមទាំងអាវភ្លៀង និងអាវរងាទៅតាមរដូវ៕
