(ស្វាយរៀង)៖ សត្វននាល គឺជាសត្វកម្រមួយ ដែលចង់បាត់វត្តមានពីខេត្តស្វាយរៀងទៅហើយ តែនៅពេលថ្មីៗនេះ មានហ្វូងសត្វននាល ប្រមាណជាង១ពាន់ក្បាល បានហើរឆ្វែលឆ្វាត់មកចុះនៅក្នុងវាលស្រែ ដើម្បីរកចឹកចំណីជិតច្រកទ្វារព្រំដែនអន្តរជាតិបាវិត ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ដែលនាំឱ្យប្រជាពលរដ្ឋ ចង់ទស្សនាកម្សាន្ត។

ប្រជាពលរដ្ឋបានលើកឡើងថាថា សត្វននាលហើរ និងចុះមករកចំណីទីនេះ គឺនៅចម្ងាយតែជាង២០០ម៉ែត្រ ពីច្រកទ្វារព្រំដែនអន្តរជាតិបាវិត ហើយវាសំបូររដូវទឹកសម្រក សំបូរត្រីដែលជាចំណីរបស់វា ស្របពេលទីនេះគ្មានអ្នកបរបាញ់ ដោយឆ្នាំមុនមានមិនដល់១០០ក្បាលនោះទេ តែពេលរសៀលវាហើរទៅប្រទេសវៀតណាម រកទីជម្រករបស់វាវិញ។

បើតាមមន្រ្តីនគបាលអន្តោប្រវេស្ត៍ប្រចាំការច្រកទ្វារព្រំដែន បានឱ្យដឹងថា សត្វននាលប្រមាណជាង១ពាន់ក្បាលនេះ ទើបតែហើរមកចុះ រកចាប់ចំណីរយៈពេលបីបួនថ្ងៃនេះទេ កន្លងមក ពួកវាចុះរកចំណីតាមវាលស្រែនៅតាមព្រំដែន ហើយពេលល្ងាចគេឃើញសត្វននាលទាំងនេះ ហើរចូលទៅក្នុងប្រទេសវៀតណាម ហើយសត្វននាលទាំងនេះយប់ហើរទៅដេកនៅឯភ្នំជើងមីដែង បច្ចុប្បន្នភ្នំតៃនិញ ខេត្តតៃនិញ ប្រទេសវៀតណាម លុះព្រឹកឡើងសត្វននាលទាំងនេះបានហើរ ត្រឡប់មកវិញរកចំណីនៅតាមវាលស្រែជាប់ព្រំដែន នៃក្រុងបាវិត ខេត្តស្វាយរៀង។

សមត្ថកិច្ចបានឃ្លាំមើលមិនឱ្យមានការបរបាញ់ ឬទាក់សត្វននាលនេះទេ ហើយតំបន់នេះបើមានទីជម្រកឱ្យវាពងកូនបាន ច្បាស់ជាពួកវានាំគ្នាមករស់នៅទីនេះ ព្រោះគ្មានអ្នកចាប់ត្រី ឆក់ត្រី ដូចនៅប្រទេសជិតខាងនោះឡើយ ដូច្នេះមន្ត្រីជំនាញគួរតែគិតគូ ចំពោះរកទីជម្រកដល់សត្វប្រភេទកម្រនេះផង៕