(ភ្នំពេញ)៖ ប្រជាពលរដ្ឋរស់នៅស្រុកបាទី ខេត្តតាកែវ បានលើកឡើងថា រូបគាត់ក៏មិនខុសពីប្រជាពលរដ្ឋខ្មែរទូទាំងប្រទេសនោះទេ គឺសូមប្រកាសប្រឆាំងយ៉ាងដាច់ខាត មិនឲ្យជនក្បត់ជាតិ សម រង្ស៉ី វិលចូលស្រុកខ្មែរនោះទេ ព្រោះលោក សម រង្ស៉ី បានប្រមាថព្រះមហាក្សត្រ ហើយចង់ផ្ដួលរំលំរាជរដ្ឋាភិបាលស្របច្បាប់។

ប៉ុន្ដែប្រសិនបើលោក សម រង្ស៉ី ពិតជាចង់ចូលស្រុកខ្មែរពិតមែន សូមសមត្ថកិច្ចគ្រប់ជាន់ថ្នាក់ ត្រូវតែចាប់ទណ្ឌិត សម រង្ស៉ី ដាក់ពន្ធនាគារភ្លាមៗ ព្រោះបុគ្គលរូបនេះមិនបានផ្ដល់ការចំណេញដល់ប្រទេសជាតិនោះទេ។ នេះជាអ្វីដែលជាការលើកឡើង របស់ប្រជាពលរដ្ឋនៅខេត្តតាកែវ។

ប្រជាពលរដ្ឋរូបនេះ បាននិយាយយ៉ាងដូច្នេះថា «ខ្ញុំសូមថ្កោលទោសដាច់ខាត អាជនក្បត់ជាតិ សម រង្ស៉ី គោលបំណងវាចូលមកស្រុកនេះ គឺវាចង់ផ្ដួលរំលំរាជរដ្ឋាភិបាលស្របច្បាប់ បើចឹងខ្ញុំប្រឆាំងដាច់ខាតមិនឲ្យវាចូលទេ។ វាហ៊ានជេរប្រមាថព្រះមហាក្សត្រ របស់ព្រះរាជាណាចក្រកម្ពុជាយើងទៀត ចឹងមិនឲ្យចូលដាច់ខាត។ សូមអំពាវនាវប្រជាពលរដ្ឋក្នុងប្រទេសខ្មែរទាំងមូល ឬក្រៅប្រទេស ប្រឆាំងដាច់ខាតមិនឲ្យជនក្បត់ជាតិ សម រង្ស៉ី ចូលស្រុកដាច់ខាត តែបើចូលថ្ងៃណាចាប់ថ្ងៃណុងឲ្យតែឃើញ ចាប់ដាក់គុក»។

សូមជំរាបថា នៅក្នុងកិច្ចសម្ភាសន៍វិទ្យុអាស៊ីសេរី (RFA) នាយប់ថ្ងៃទី២០ ខែកញ្ញា ឆ្នាំ២០១៩ កន្លងទៅ, សម្តីជនថោកទាប ក្បត់ជាតិសាសន៍ ក្បត់ព្រះមហាក្សត្រគឺទណ្ឌិត សម រង្ស៉ី បានបន្តប្រមាថព្រះករុណា ព្រះបាទ សម្តេចព្រះនរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដែលជាទីគោរពដ៏ខ្ពង់ខ្ពស់បំផុតនៃរាស្រ្តខ្មែរ យ៉ាងធ្ងន់ធ្ងរបំផុតនៅក្នុងកម្មវិធី Hello VOA ដោយប្រើពាក្យប្រមាថធ្ងន់ៗបំផុត។

សម្តីជនថោកទាប សម រង្ស៉ី បាននិយាយយ៉ាងដូច្នេះថា៖ «...ព្រះមហាក្សត្រមិនដែលបើកព្រះនេត្រ ឃើញទុក្ខវេទនារបស់ប្រជារាស្រ្តខ្មែរទេ ព្រះមហាក្សត្រសព្វថ្ងៃ ដូចខ្ញុំនិយាយម្តងទៀត ចង់កាត់ទោសខ្ញុំមួយម៉ឺនដងទៀត អត់ខ្វល់ដែរ ព្រះមហាក្សត្រសព្វថ្ងៃ ជាចំណាប់ខ្មាំងរបស់ ហ៊ុន សែន ព្រះមហាក្សត្រសព្វថ្ងៃជាអាយ៉ងរបស់ ហ៊ុន សែន ព្រះមហាក្សត្រសព្វថ្ងៃ ធ្វើអ្វីតាមដែល ហ៊ុន សែន បញ្ជាឲ្យព្រះអង្គធ្វើទាំងអស់ ដូច្នេះព្រះមហាក្សត្រសព្វថ្ងៃ ជាព្រះមហាក្សត្រអត់បានការ អត់ប្រយោជន៍ ខ្ញុំអត់ចាប់អារម្មណ៍ អត់គោរពព្រះមហាក្សត្រសព្វថ្ងៃ....»។

រដ្ឋធម្មនុញ្ញនៃព្រះរាជាណាចក្រកម្ពុជា មាត្រា៧ បានចែងថា «អង្គព្រះមហាក្សត្រ មិនអាចនរណារំលោភបំពានបានឡើយ»។ មាត្រា៨ បានចែងថា «ព្រះមហាក្សត្រ ព្រះអង្គទ្រង់ជានិមិត្តរូបនៃឯកភាពជាតិ និងនិរន្តរ៍ភាពជាតិ។ ព្រះមហាក្សត្រ ទ្រង់ជាអ្នកធានាឯករាជ្យជាតិ អធិបតេយ្យ និងបូរាណភាពទឹកដីនៃព្រះរាជាណាចក្រកម្ពុជា ទ្រង់ជាអ្នកធានាការគោរពសិទ្ធិ និងសេរីភាពរបស់ប្រជាពលរដ្ឋ និងការគោរពសន្ធិសញ្ញាអន្តរជាតិ»។

ជនក្បត់ជាតិ សម រង្ស៉ី បានប្រកាសនឹងវិលត្រឡប់មកកម្ពុជាវិញនៅថ្ងៃទី០៩ ខែវិច្ឆិកា ឆ្នាំ២០១៩ខាងមុខ ដើម្បីប្រឆាំង និងផ្តួលរបបដឹកនាំដោយសម្តេចតេជោ ហ៊ុន សែន បច្ចុប្បន្ន។ ការវិលត្រឡប់នេះត្រូវបានរាជរដ្ឋាភិបាលកម្ពុជា ប្រកាសថា ជាការប៉ុនប៉ងធ្វើរដ្ឋប្រហាររាជរដ្ឋាភិបាលស្របច្បាប់ កើតចេញពីការបោះឆ្នោត៕