(ភ្នំពេញ)៖ ប្រជាពលរដ្ឋរស់នៅក្នុងភូមិកន្លែងគល់ចំនួន ២គ្រួសារ ដែលកំពុងជួបការលំបាក និងជិវិភាពខ្វះខាត ហើយសព្វថ្ងៃរស់នៅលើចិញ្ចើមផ្លូវក្នុងភូមិ ត្រូវប្រឈមបញ្ហាជាច្រើន បានទទួលអំណោយពីលោក ហ៊ុយ សាវឿន ហៅឌេល និងភរិយា តាមរយៈលោកប្រធានប្រជាការពារសង្កាត់ពន្សាំង និងលោកវរសេនីយ៍ត្រី លោក ប៉ិន ថារ៉ាន់ នាយប៉ុស្តិ៍ពន្សាំង លោក ចែម សួយ នាយរងប៉ុស្តិ៍ពន្សាំង ។

ឆ្លៀតឱកាសក្នុងម៉ោងបំពេញការងារនៅរសៀលថ្ងៃទី០១ ខែតុលា ឆ្នាំ២០១៩ លោក ហ៊ុយ សាវឿន ហៅឌេល ជាសប្បុរជន និងជាប្រធានបញ្ជាតំណាងទិញសម្លៀកបំពាក់ និងគ្រប់គ្រងគុណភាពរបស់ក្រុមហ៊ុន Matalan uk Reatainler នៅកម្ពុជា ព្រមទាំងលោកវរសេនីយ៍ត្រី ប៉ិន ថារ៉ាន់ នាយនគរបាលប៉ុស្តិ៍ រដ្ឋបាលពន្សាំង លោកអនុសេនីយ៍ទោ ចែម សូយ នាយរងប៉ុស្តិ៍ នគរបាលរដ្ឋបាលសង្កាត់ពន្សាំង ប្រធានប្រជាការពារសង្កាត់ និងបងប្អូនប្រជាការពារសង្កាត់ភូមិ បានចុះជួបសួសុខទុក្ខ ក៏ជាបានរួមគ្នានូវថវិការមួយចំនួនឧបត្ថម្ភដល់គ្រួសារក្រីក្រ ចំនួន២គ្រួសារ មានដូចជា៖ ថវិកា អង្ករ កាបតាប សៀវភៅ ជូនគ្រួសារទី១ មានឈ្មោះ ម៉ឺយ តូច (ប្រពន្ធ) ម៉ុល បាន (ប្តី) និងកូនៗ ហើយគ្រួសារទី២ មានឈ្មោះ សែត ចាន់ (ប្រពន្ធ) និងកូនៗ រស់នៅភូមិកន្លែងគល់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ។

លោក ប៉ិន ថារ៉ាន់ បានលើកឡើងថា ការជួយនេះជាទឹកចិត្តរបស់លោក ហ៊ុយ សាវឿន ហៅឌេល និងភរិយា ព្រមទាំងនគបាលរដ្ឋបាលប៉ុស្តិ៍ពន្សាំង ដើម្បីជួយសម្រួល ដល់ការលំបាក និងការដោះទល់មួយគ្រា ពិសេសក្មួយៗឲ្យមាននូវសម្ភារសម្រាប់ការសិក្សារ ទោះបីជាមិនច្រើនយ៉ាងក៏ដោយ រូបលោក និងបងប្រុស ហ៊ុយ សាវឿន ឌេល និងក្រុមការងារប៉ុស្តិ៍រដ្ឋបាលពន្សាំង នឹងបន្តកិច្ចការងារជួយដល់បងប្អូនក៏ដូចជា ប្រជាពលរដ្ឋនៅទូទាំងសង្កាត់ពន្សាំង ដែលជួបការលំបាក និងជីវភាពខ្វះខាត។

ជួសមុខឲ្យគ្រួសារក្រីក្រទាំង២ លោកនាយនគរបាលប៉ុស្តិ៍ពន្សាំង សូមថ្លែងអំណរអរគុណយ៉ាងជ្រាលជ្រៅដល់ចិត្តសប្បុរសធម៌លោក ហ៊ុយ សាវឿន និងភរិយា ដែលតែងតែជួយមិនថាបងប្អូនប្រជាកាពារសង្កាត់ភូមិ និងប្រជាពលរដ្ឋក្រីក្រគ្រប់ទីកន្លែង តាមបណ្តាខេត្តផងដែរ។

សូមបញ្ជាក់ថា ឆ្លៀតក្នុងឱកាសនោះដែរ លោក ហ៊ុយ សាវឿន និងប៉ូលីសប៉ុស្តិ៍នគរបាលពន្សាំង ចូលរួមថវិការ ចំនួន ២០ម៉ឺនរៀល ចួលរួមពិធីបុណ្យនៅក្នុងភូមិដដែលនោះ ដោយលោកស្រី សំ សារុំ បានទទួលមរណភាពដោយរោគគាពាធ៕