(ភ្នំពេញ)៖ សមាគមសហព័ន្ធវេជ្ជសាស្ត្រ ឱសថសាស្ត្រ និងទន្តសាស្ត្រ និងសមាគមសហព័ន្ធទេសចរណ៍ និងបដិសណ្ឋារកិច្ច ក្រោមការគ្រប់គ្រងនិងដឹកនាំដោយលោកបណ្ឌិត ឡី សុភាព បានអំពាវនាវដល់ម្ចាស់-អ្នកគ្រប់គ្រងភោជនីយដ្ឋាន អាហារដ្ឋាន ចុងភៅ និងអ្នកផ្តល់សេវាម្ហូបអាហារទាំងអស់ ត្រូវអនុវត្តតាម «កូនសោគន្លឹះ៥យ៉ាង សម្រាប់ធ្វើឲ្យចំណីអាហារមានសុវត្ថិភាព» ឲ្យបានល្អជាប្រចាំ ដើម្បីញ៉ាំងការទទួលទានចំណីអាហារផ្សេងៗ នាឱកាសពិធីបុណ្យភ្ជុំបិណ្ឌឱ្យមានភាពល្អប្រសើរ។

ចំណុចគន្លឹះទាំង៥យ៉ាង ដែលសមាគមរបស់លោក ឡី សុភាព បានដាក់ចេញនោះ រួមមាន៖

១៖ រក្សាភាពស្អាត (ក/លាងដៃនឹងសាប៊ូមុនពេលរៀបចំធ្វើម្ហូប និងក្រោយពេលបន្ទោបង់, ខ/ចង្រ្កាន កន្លែងលាងចាន ចានក្បានស្អាត និងស្ងួត, គ/ការពារផ្ទះបាយ និងអាហារពីសត្វ ដូចជាកណ្តុរ កន្លាត រុយ និងសត្វល្អិតផ្សេងៗ)។

២៖ ទុកដាក់ចំណីអាហារឆៅ និងឆ្អិនដាច់ដោយឡែកពីគ្នា។

៣៖ ចម្អិនអាហារឲ្យបានឆ្អិនល្អ។

៤៖ ទុកដាក់អាហារនៅសីតុណ្ហភាពមានសុវត្ថិភាព៖
* ចូរទុកអាហារឆ្អិនស្រាប់នៅសីតុណ្ហភាពធម្មតាក្នុងបន្ទប់ មិនលើសពីពីរម៉ោង។
* ទុកដាក់ចំណីអាហារដែលងាយស្អុយ ឬខូច និងអាហារដែលចម្អិនរួចទៅក្នុងទូរទឹកកក ឬធុងទឹកកកភ្លាមក្នុងកម្រិតសីតុណ្ហភាពតិចជាង ៥អង្សារសេ។
* ទុកអាហារឆ្អិនឲ្យនៅក្តៅជានិច្ចក្នុងកម្រិតសីតុណ្ហភាពលើសពី ៦០អង្សារសេ។
* ចូរកុំទុកអាហារយូរពេក ទោះបីដាក់ក្នុងទូរទឹកកកក៏ដោយ។

៥៖ ប្រើប្រាស់ទឹកស្អាត និងវត្ថុធាតុដើមឆៅល្អ៖
* ចូរប្រើប្រាស់ទឹកស្អាត។
* ជ្រើសរើសអាហារដែលនៅស្រស់ និងនៅទាំងមូល (មិនឆែប មិនបែកមាត់ចានជាដើម)។
* លាងបន្លែផ្លែឈើ (ដោយទឹកស្អាត) ពិសេសប្រសិនបើត្រូវរៀបចំញ៉ាំឆៅ។
* លាងចាន ស្លាបព្រា សម ចង្កឹះ កែវដោយទឹកស្អាត។
* កន្លែងលាងចានត្រូវស្ថិតនៅលើធ្នើដែលមានកម្ពស់យ៉ាងតិច ៦០សង់ទីម៉ែត្រ (៦តឹកខ្ពស់ពីដី ឬពីផ្ទៃបាត)៕