(កំពត)៖ រស់នៅភូមិកោះចំការ ឃុំបឹងសាលាខាងត្បូង ស្រុកកំពង់ត្រាច ខេត្តកំពត កសិករម្នាក់បានចាត់ទុកថា ទង្វើរបស់ទណ្ឌិត សម រង្ស៉ី ដែលបានប្រមាថ ព្រះចេស្ដារព្រះមហាក្សត្រ គឺជាទង្វើអាក្រក់ ញុះញង់ក្បត់ជាតិ និងបំបែកបំបាក់សាមគ្គីរបស់ប្រជាពលរដ្ឋខ្មែរ ហើយក៏ជាទង្វើដែលមានទោសធ្ងន់ធ្ងរណាស់ មិនអាចអត់ឱនបានឡើយ។

បុរសដែលមានវ័យចំណាស់ បានអះអាងទៀត ក្នុងនាមជាជនជាតិខ្មែរ ត្រូវតែគោរពច្បាប់ គោរពព្រះមហាក្សត្រ ដូច្នេះហើយបើលោក សម រង្ស៉ី បានប្រព្រឹត្តផ្ទុយហើយនោះ គប្បីកុំចូលមកប្រទេសកម្ពុជាអី ព្រោះប្រជាពលរដ្ឋជាច្រើនណាស់ស្ទើរពេញមួយប្រទេស មិនគាំទ្រលោកនោះទេ។ ពលរដ្ឋរូបនេះ បានចាត់ទុកថា លោក សម រង្ស៉ី ចូលមកកម្ពុជាគ្មានចំណេញនោះទេ គឺមានតែញុះញង់ និងបំបែកបំបាក់ជាតិតែប៉ុណ្ណោះ។

កសិកររូបនេះ បានលើកឡើងយ៉ាងដូច្នេះថា «ទង្វើរបស់គាត់ (សម រង្ស៉ី) ជាទង្វើអាក្រក់ក្បត់ជាតិ ញុះញង់ចាក់ដោត ដើម្បីបំបែកបំបាក់ ទង្វើនេះខ្ញុំអត់គាំទ្រទេ ព្រោះខ្មែរត្រូវតែសាមគ្គី។ ហើយមិនត្រឹមតែប៉ុណ្ណឹង ប្រមាថដល់ព្រះមហាក្សត្រទៀត ទង្វើនេះគឺគាត់មានទោសធ្ងន់ណាស់ លើសពីក្បត់ជាតិទៅទៀត។ ទោសនេះជាទោសមួយ ដែលបានជេរប្រមាថដល់ព្រះមហាក្សត្រ គឺមិនធម្មតាទេ។ ចឹងទង្វើនេះ ចំពោះខ្ញុំ ខ្ញុំមិនពេញចិត្តនឹងជនក្បត់ជាតិនេះទេ»។

សូមជំរាបថា នៅក្នុងកិច្ចសម្ភាសន៍វិទ្យុអាស៊ីសេរី (RFA) នាយប់ថ្ងៃទី២០ ខែកញ្ញា ឆ្នាំ២០១៩ កន្លងទៅ, សម្តីជនថោកទាប ក្បត់ជាតិសាសន៍ ក្បត់ព្រះមហាក្សត្រគឺទណ្ឌិត សម រង្ស៉ី បានបន្តប្រមាថព្រះករុណា ព្រះបាទ សម្តេចព្រះនរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដែលជាទីគោរពដ៏ខ្ពង់ខ្ពស់បំផុតនៃរាស្រ្តខ្មែរ យ៉ាងធ្ងន់ធ្ងរបំផុតនៅក្នុងកម្មវិធី Hello VOA ដោយប្រើពាក្យប្រមាថធ្ងន់ៗបំផុត។

សម្តីជនថោកទាប សម រង្ស៉ី បាននិយាយយ៉ាងដូច្នេះថា៖ «...ព្រះមហាក្សត្រមិនដែលបើកព្រះនេត្រ ឃើញទុក្ខវេទនារបស់ប្រជារាស្រ្តខ្មែរទេ ព្រះមហាក្សត្រសព្វថ្ងៃ ដូចខ្ញុំនិយាយម្តងទៀត ចង់កាត់ទោសខ្ញុំមួយម៉ឺនដងទៀត អត់ខ្វល់ដែរ ព្រះមហាក្សត្រសព្វថ្ងៃ ជាចំណាប់ខ្មាំងរបស់ ហ៊ុន សែន ព្រះមហាក្សត្រសព្វថ្ងៃជាអាយ៉ងរបស់ ហ៊ុន សែន ព្រះមហាក្សត្រសព្វថ្ងៃ ធ្វើអ្វីតាមដែល ហ៊ុន សែន បញ្ជាឲ្យព្រះអង្គធ្វើទាំងអស់ ដូច្នេះព្រះមហាក្សត្រសព្វថ្ងៃ ជាព្រះមហាក្សត្រអត់បានការ អត់ប្រយោជន៍ ខ្ញុំអត់ចាប់អារម្មណ៍ អត់គោរពព្រះមហាក្សត្រសព្វថ្ងៃ....»។

រដ្ឋធម្មនុញ្ញនៃព្រះរាជាណាចក្រកម្ពុជា មាត្រា៧ បានចែងថា «អង្គព្រះមហាក្សត្រ មិនអាចនរណារំលោភបំពានបានឡើយ»។ មាត្រា៨ បានចែងថា «ព្រះមហាក្សត្រ ព្រះអង្គទ្រង់ជានិមិត្តរូបនៃឯកភាពជាតិ និងនិរន្តរ៍ភាពជាតិ។ ព្រះមហាក្សត្រ ទ្រង់ជាអ្នកធានាឯករាជ្យជាតិ អធិបតេយ្យ និងបូរាណភាពទឹកដីនៃព្រះរាជាណាចក្រកម្ពុជា ទ្រង់ជាអ្នកធានាការគោរពសិទ្ធិ និងសេរីភាពរបស់ប្រជាពលរដ្ឋ និងការគោរពសន្ធិសញ្ញាអន្តរជាតិ»។

ជនក្បត់ជាតិ សម រង្ស៉ី បានប្រកាសនឹងវិលត្រឡប់មកកម្ពុជាវិញនៅថ្ងៃទី០៩ ខែវិច្ឆិកា ឆ្នាំ២០១៩ខាងមុខ ដើម្បីប្រឆាំង និងផ្តួលរបបដឹកនាំដោយសម្តេចតេជោ ហ៊ុន សែន បច្ចុប្បន្ន។ ការវិលត្រឡប់នេះត្រូវបានរាជរដ្ឋាភិបាលកម្ពុជា ប្រកាសថា ជាការប៉ុនប៉ងធ្វើរដ្ឋប្រហាររាជរដ្ឋាភិបាលស្របច្បាប់កើតចេញពីការបោះឆ្នោត៕