(កំពត)៖ លោក ទិត្យ ចន្ថា រដ្ឋមន្ត្រីស្តីទីក្រសួងទេសចរណ៍ បានអំពាវនាវដល់មន្ត្រីជំនាញ និងអ្នកពាក់ព័ន្ធ រួមទាំងប្រជាពលរដ្ឋផង ត្រូវបង្កើនការយកចិត្តទុកដាក់ ក្នុងការចូលរួមអភិវឌ្ឍ លើវិស័យទេសចរណ៍ នៅក្នុងតំបន់ និងខេត្តរបស់ខ្លួន។
ការអំពាវនាវបែបនេះធ្វើឡើងក្នុងពិធីអបអរសាទរទិវាទេសចរណ៍ពិភពលោក ២០១៩ ក្រោមប្រធានបទ «ទេសចរណ៍ និងការងារ៖ អនាគតកាន់តែប្រសើរសម្រាប់យើងទាំងអស់គ្នា» នៅថ្ងៃទី២៥ ខែកញ្ញា ឆ្នាំ២០១៩ នៅសាលប្រជុំសាលាខេត្តកំពត។
លោករដ្ឋមន្ត្រីស្ដីទី បានលើកឡើងបន្តថា ការចូលរួមអភិវឌ្ឍ និងលើកស្ទួយវិស័យទេសចរណ៍នេះ គឺអនុវត្តទាំងការអភិវឌ្ឍកន្លែងកម្សាន្តឲ្យសម្បូរបែប មានអនាម័យ និងបរិស្ថានបៃតងស្អាត ព្រមទាំងបង្កើនការយកចិត្តទុកដាក់បន្ថែមទៀត នូវការផ្តល់សេវាកម្មល្អ ដល់ភ្ញៀវទេសចរណ៍ ដើម្បីឲ្យភ្ញៀវទេសចរណ៍មកកម្សាន្តស្នាក់នៅបានយូរ មកម្តងហើយចង់តែមកម្តងទៀត។
លោក ទិត្យ ចន្ថា ក៏បានលើកឡើងបញ្ជាក់ផងដែរថា វិស័យទេសចរណ៍ គឺជាវិស័យមួយសំខាន់ គឺជាឆ្អឹងខ្នងមួយដ៏មានប្រសិទ្ធភាពខ្ពស់បំផុតក្នុងការទ្រទ្រុងសេដ្ឋកិច្ចរបស់ប្រទេសជាតិ។ លោកបានអំពាវនាវឲ្យមន្ត្រីជំនាញ និងអ្នកពាក់ព័ន្ធវិស័យនេះទាំងអស់គ្នា ត្រូវចូលរួមអភិវឌ្ឍន៍វិស័យទេសចរណ៍កាន់តែរីកចម្រើនឡើង ព្រោះថា បើវិស័យទេសចរណ៍រីកចម្រើនឡើង នោះវានឹងផ្តល់ផលប្រយោជន៍ជាច្រើនដល់សេដ្ឋកិច្ច សង្គម និងការងារដល់ប្រជាពលរដ្ឋដោយផ្ទាល់ និងដោយប្រយោល។
ម្យ៉ាងទៀត វិស័យទេសចរណ៍កម្ពុជា ជាទេសចរណ៍វប្បធម៌ និងធម្មជាតិ ហើយទេសចរណ៍ គឺជាមាសបៃតង មានន័យថាវិស័យនេះ បានជួយជាច្រើននៅក្នុងការអភិវឌ្ឍបៃតង ការផ្តល់នូវចំណូលសេដ្ឋកិច្ច ការអភិវឌ្ឍន៍សង្គម និងការងារ។ ដូច្នេះហើយទើបរាជរដ្ឋាភិបាល បានកំណត់ចេញនូវចក្ខុវិស័យ ក៏ដូចជាយុទ្ធសាស្ត្រនៃការអភិវឌ្ឍន៍វិស័យទេសចរណ៍នេះ។
លោករដ្ឋមន្ត្រីស្តីទី ក៏បានបញ្ជាក់ថា ឆ្នាំកន្លងទៅពិភពលោកមានកំណើនភ្ញៀវទេសចរក្នុងរង្វង់ ពី៤ទៅ៥ភាគរយ គឺប្រមាណជា១៤០០លាននាក់ ហើយនឹងកើនឡើង ១៨០០លាននាក់ នៅឆ្នាំ២០៣០។ ចំពោះកម្ពុជាកាលពីឆ្នាំ២០១៨ ទូទាំងប្រទេសមានភ្ញៀវទេសចរអន្តរជាតិ ជាង៦លាននាក់ និងភ្ញៀវទេសចរជាតិជាង ១០លាននាក់ ដែលមានកំណើនរង្វង់ប្រមាណ ៥ភាគរយ។
លោក ទិត្យ ចន្ថា បានគូសបញ្ជាក់ថា នៅទូទាំងប្រទេស អ្នកដែលទទួលបានការងារដោយផ្ទាល់ពីវិស័យទេសចរណ៍មាន ចំនួន៦២ម៉ឺននាក់ ហើយការងារដោយប្រយោលប្រមាណជា ២លាននាក់ ក្នុងនោះសូម្បីតែអ្នកដាំបន្លែផ្លែឈើ អ្នកផ្គត់ផ្គង់សាច់ អ្នកចិញ្ចឹមសត្វ អ្នកនេសាទ អ្នកប្រកបរបរខាងដឹកជញ្ជូន សុទ្ធតែបានទទួលបានផល និងបម្រើដល់ការអភិវឌ្ឍវិស័យទេសចរណ៍ផងដែរ។ អ្នកធ្វើការងារក្នុងវិស័យទេសចរណ៍ម្នាក់ អាចចិញ្ចឹមគ្រួសារបាន ៣នាក់ ដូច្នេះហើយការជំរុញធ្វើឲ្យវិស័យទេសចរណ៍ រីកចម្រើនឡើង វានឹងផ្តល់ផលជាច្រើនដល់ សេដ្ឋកិច្ច សង្គម និងការងារ៕
