(ភ្នំពេញ)៖ លោក ជិន ម៉ាលីន អ្នកនាំពាក្យក្រសួងយុត្តិធម៌ នៅថ្ងៃទី២៤ ខែកញ្ញា ឆ្នាំ២០១៩នេះ បានលើកឡើងថា ការបន្តប្រមាថធ្ងន់ធ្ងរដល់ អង្គព្រះមហាក្សត្រ យ៉ាងគឃ្លើនពីសំណាក់ ទណ្ឌិត សម រង្សី មេក្រុមឧទ្ទាម គឺជាចរិតជនពាលនយោបាយ របស់ទណ្ឌិតរូបនេះ។

ការលើកឡើងបែបនេះរបស់ អ្នកនាំពាក្យក្រសួងយុត្តិធម៌ បានធ្វើឡើង បន្ទាប់ពីទណ្ឌិត សម រង្ស៉ី នៅក្រៅប្រទេស​ នៅតែបន្តប្រមាថដល់ព្រះចេស្តា និងអង្គព្រះមហាក្សត្រ ទោះបីជាតុលាការកម្ពុជា បានចេញដីកាកោះហៅ និងបង្គាប់ឱ្យចាប់ខ្លួនយ៉ាងណាក្តី។

លោក ជិន ម៉ាលីន បានបញ្ជាក់ប្រាប់បណ្តាញព័ត៌មាន​ Fresh News ឱ្យដឹងថា «ការបន្តប្រមាថ ដល់អង្គព្រះមហាក្សត្រយ៉ាងគឃ្លើន ពីសំណាក់ទណ្ឌិត សម រស្សី មិនត្រឹមតែជាការបំពានច្បាប់ និងរដ្ឋធម្មនុញ្ញដែលជាច្បាប់កំពូលរបស់កម្ពុជាប៉ុណ្ណោះទេ ប៉ុន្តែថែមទាំងជាការប្រមាថយ៉ាងធ្ងន់ធ្ងរដល់របបរាជានិយម កេរ្តិ៍ឈ្មោះ កិត្តិយស និងសេចក្តីថ្លៃថ្នូរ របស់ជាតិសាសន៍ខ្មែរទាំងមូល ដែលនេះជាចរិតជនពាលនយោបាយរបស់ ទណ្ឌិត សម រង្សី ហើយដែលប្រជាពលរដ្ឋខ្មែរទូទាំងប្រទេសមិនអាចទទួលយកបានឡើយ»។

លោកបានបន្តទៀតថា តាមចរិតជនពាលនយោបាយរបស់ ទណ្ឌិត សម រង្ស៉ី គឺគេហ៊ានធ្វើអ្វីគ្រប់យ៉ាងបានទាំងអស់ ដើម្បីតែប្រយោជន៍ និងអំណាចផ្ទាល់ខ្លួន ទោះជាត្រូវប្រមាថព្រះមហាក្សត្រ របបរាជានិយម និងបំផ្លាញជាតិសាសន៍ខ្លួនឯងយ៉ាងណាក៏ដោយ ដូចជាការឱនក្បាលធ្វើជាអាយ៉ងរបស់បរទេស និងសុំអង្វរឱ្យបរទេសដាក់ទណ្ឌកម្ម គៀបសង្កត់ មកលើជាតិសាសន៍ខ្លួនឯងជាដើម។ល។

លោកអះអាងថា ករណីទណ្ឌិត សម រង្សី ប្រមាថធ្ងន់ធ្ងរដល់អង្គព្រះមហាក្សត្រ ក្រសួងយុត្តិធម៌ ធ្លាប់បានចេញអធិបញ្ជាម្តងរួចហើយ ដូច្នេះ ក្នុងករណីមានការប្រមាថជាបន្តបន្ទាប់មកទៀតនេះ ស្ថាប័នមានសមត្ថកិច្ច ជាពិសេសស្ថាប័នអយ្យការ អាចចាត់ការបន្តនៅក្នុងគោលការណ៍ដដែលបាន។

ពាក់ព័ន្ធនឹងករណីប្រមាថដល់អង្គព្រះមហាក្សត្រនេះ កាលពីថ្ងៃទី១៦ ខែកញ្ញា ឆ្នាំ២០១៩ លោក កូយ សៅ អនុប្រធាន និងចៅក្រមស៊ើបសួរ នៃសាលាដំបូងរាជធានីភ្នំពេញ បានចេញដីកាមួយទៀត បង្គាប់ឲ្យសមត្ថកិច្ចគ្រប់ជាន់ថ្នាក់ ស្រាវជ្រាវ និងនាំខ្លួន ទណ្ឌិត សម រង្ស៉ី ដើម្បីយកមកចាត់ការតាមផ្លូវច្បាប់ផងដែរ។

គិតរហូតមកទល់ពេលនេះ ទណ្ឌិត សម រង្ស៉ី កំពុងញុះញីដោយសំណុំរឿងក្តីជាច្រើន នៅក្នុងដៃតុលាការ។ បើតាម លោក ជិន ម៉ាលីន អ្នកនាំពាក្យក្រសួងយុត្តិធម៌ គឺពេលនេះ លោក សម រង្ស៉ី មានសំណុំរឿងនៅតុលាការចំនួន១៤ករណី ក្នុងនោះមាន៦សំណុំរឿងហើយ ដែលសាលក្រម បានចូលជាស្ថាពរ៕