(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានសម្តែងការងឿងឆ្ងល់ថា តើចង្រៃអ្វីនៅកម្ពុជា? រាជរដ្ឋាភិបាលបានខិតខំស្វែងរកឱកាសការងារ នៅក្រៅប្រទេសឱ្យពលរដ្ឋរបស់ខ្លួន បែរជាត្រូវគេចោទថា យើងបញ្ជូនពលរដ្ឋខ្លួនឱ្យទៅស៊ីឈ្នួលគេទៅវិញ។

ថ្លែងទៅកាន់រដ្ឋមន្រ្តីការងារ៥ប្រទេស ក្នុងពិធីបើកសន្និសីទថ្នាក់រដ្ឋមន្ត្រីការងារលើកទី៣ ក្នុងក្របខ័ណ្ឌ CLMTV នៅខេត្តសៀមរាប នាព្រឹកថ្ងៃទី១៧ ខែកញ្ញា ឆ្នាំ២០១៩នេះ សម្តេចតេជោ ហ៊ុន សែន បានមានប្រសាសន៍ថា «សព្វថ្ងៃនេះ ខ្ញុំមិនដឹងថា តើប្រទេសអស់លោក ឯកឧត្តម លោកជំទាវ មាននិន្នាការបែបណាទេ ក៏ប៉ុន្តែចង្រៃអីនៅកម្ពុជានេះ ការដែលយើងខិតខំស្វែងរកឱកាសការងារធ្វើនៅក្រៅប្រទេស ដូចជានៅកូរ៉េខាងត្បូង ដូចជានៅជប៉ុន នៅម៉ាឡេស៊ី ដូចជានៅថៃ សាំងហ្គាពួរជាដើម បែរជាគេចាត់ទុកថា យើងបានបញ្ជូនមនុស្សឱ្យទៅស៊ីឈ្នួលគេ ទៅធ្វើខ្ញុំគេ ប៉ុន្តែឥឡូវសូមយើងដាក់ជាសំណួរសួរមើលថា បើមិនធ្វើការទេ តើនរណាអាចរស់ទៅបាននោះ?»។

សម្តេចបានបន្តថា «ការធ្វើការមាននៅក្នុងប្រទេស និងការធ្វើការនៅក្រៅប្រទេស ក៏ប៉ុន្តែពួកគេបានប្រែក្លាយបញ្ហា ការធ្វើចំណាកស្រុកដើម្បីរកការងារធ្វើនៅក្រៅប្រទេស វាទៅជារឿងថា យើងមិនអាចដោះស្រាយបញ្ហាឱ្យប្រជាពលរដ្ឋខ្លួនឯងបាន ហើយឱ្យពលរដ្ឋខ្លួនឯងធ្វើចំណាកស្រុកទៅរកការងារធ្វើ ប៉ុន្តែផ្ទុយទៅវិញ ការរកការងារធ្វើនេះវាជាក្របខណ្ឌ នៃការខិតខំប្រឹងប្រែងរបស់អាស៊ាន ហើយដែលមុនដំបូង យើងត្រូវមើលឃើញថា ក្នុងក្របខណ្ឌអាស៊ានរបស់យើង គឺប្រទេសហ្វីលីពីន គឺជាប្រទេស មានពលករច្រើនជាងគេក្នុងការចេញទៅធ្វើការនៅក្រៅប្រទេស»។

សម្តេចតេជោ ហ៊ុន សែន ក៏បានសម្តែងនូវការងឿងឆ្ងល់ដែរថា ហេតុអ្វីពលករខ្មែរដែលទៅធ្វើការនៅក្រៅប្រទេស ត្រូវបានគេចោទថា ជាពួកប្រឆាំងរដ្ឋាភិបាល ឬត្រូវបានរដ្ឋាភិបាលបណ្តេញឱ្យទៅធ្វើការនៅក្រៅប្រទេសទៅវិញ។

គិតត្រឹមខែសីហា ឆ្នាំ២០១៩ កម្ពុជាមានពលរដ្ឋប្រមាណ១,២លាននាក់ កំពុងធ្វើការនៅក្រៅប្រទេស ក្នុងនោះមាននៅប្រទេសថៃ ម៉ាឡេស៊ី ជប៉ុន អារ៉ាប់ប៊ីសាអូឌីត សិង្ហបុរី កូរ៉េខាងត្បូង និង ហុងកុង (ប្រទេសចិន) ជាដើម។ ពលករទាំងនោះបានផ្ញើប្រាក់ ប្រមាណ២,៧ពាន់លានដុល្លារ មកគ្រួសារនៅស្រុកកំណើត។

ឮសម្តេចតេជោ ហ៊ុន សែន ក៏បានរំលឹកអំពីការអំពាវនាវរបស់ លោកស្រី អោង សានស៊ូជី មេដឹកនាំមីយ៉ាន់ម៉ា ក្រោយឈ្នះឆ្នោត ដែលប្រាប់ឱ្យពលករមីយ៉ាន់ម៉ាចេញពីប្រទេសថៃ ទៅធ្វើការនៅស្រុកកំណើតវិញ ដែលការអំពាវនាវនេះ ត្រូវបានបក្សប្រឆាំងនៅកម្ពុជា បានយកមកចំអកឱ្យសម្តេចថា លើកទឹកចិត្តឱ្យពលរដ្ឋខ្លួនទៅធ្វើការប្រទេសថៃទៅវិញ ប៉ុន្តែទីបំផុត រហូតដល់ពេលនេះ ពលករមីយ៉ាន់ម៉ាមិនបានត្រឡប់ទៅស្រុកកំណើតវិញទេ មានតែចេញពីមីយ៉ាន់ម៉ាទៅរកការងារធ្វើនៅប្រទេសថៃច្រើនជាងមុន ដោយសារតែកម្លាំងពលកម្មនៅប្រទេសថៃ ខ្ពស់ជាងមីយ៉ាន់ម៉ា៕